Shimbi 6 - MUKANDA USANDU WA ZAMBI 1975

¹ Achi, liji lino lia shimbi, ni yiyulo yino, ni upatwilo uno, Yehova Zambi yenu wambile ngunulongeseyo hanga nuyilinge mu chifuchi nunazauka kuchizuka.

² Nukavwile woma Yehova Zambi yenu, mukufunga yiyulo yenyi yeswe ni shimbi jenyi ngunanwambeyo, ni yenu, ni ana jenu, ni ajikulu jenu, matangwa eswe a mwono wenu, hanga matangwa jenu akapwe anji.

³ Enu A-Izalele, ivwenu kashika, nukanyame kuyilinga, hanga nutwame kawape, hanga nwoke chinji, ngwe anulakenyene Yehova Zambi ya tulamba twenu, mu chifuchi munokela yamwa ni wuchi.

⁴ Enu A-Izalele, ivwenu, Yehova Zambi yetu iye Yehova umuwika.

⁵ Nuzange Yehova Zambi yenu ni mbunge jenu jeswe ni alma jenu jeswe, ni ndundo jenu jeswe.

⁶ Maliji ano, ngunanwambe musono, akapwe ha mbunge jenu;

⁷ nukaalongese kanawa kuli ana jenu, nukaatenge pande ha ku! wama mu mazuwo jenu, ha kwenda mu jila, ha kupomba chenu, ha kuhinduka chenu.

⁸ Nukaajichike ha moko jenu akapwe chilayi, akapwe a kukashila mukachi ka meso jenu.

⁹ Nukaasoneke ha yipamba ya mazuwo jenu, ni ha yajilo yenu.

¹⁰ Muze Yehova Zambi yenu manuhetesa mu chifuchi alishingile iye kuli tulamba twenu ni kuli Apalahama, ni kuli Izake, ni kuli Yakomba, mukunwaha membo anene, apema, enu kunwaatungile,

¹¹ ni mazuwo a tò ni yuma yeswe yipema enu kunwaazalishile, ni mashima a kutota enu kunwaatotele, ni minda ya uva ni mitondo ya olevwe enu kunwayitumbile; munulia ni kukuta,

¹² henaho, nukanyame kuchina munuvulama Yehova wanuchijile mu chifuchi cha Engitu, ku zuwo lia upinji.

¹³ Nukavwile woma Yehova Zambi yenu, nukamuvumbike iye, nukalishinge ni jina lienyi.

¹⁴ Kanda nukaula tuzambi tweka, tuzambi twa mavungu ananujingilika,

¹⁵ mumu Yehova Zambi yenu yoze uli hakachi kenu iye Zambi ya ukwa, kuchina utenu wa Yehova Zambi yenu muunukasumukina, iye makanukuwisa hashi heswe.

¹⁶ Kanda nweseka Yehova Zambi yenu, ngwe nwamwesekele ku Masa.

¹⁷ Nufunge kanawa maliji a shimbi a Yehova Zambi yenu, ni Shindakenyo jenyi ni yiyulo yenyi anwambileyo.

¹⁸ Nulingelinge chize Chinalulama, chipema kumeso ja Yehova; hanga nutwame kawape, hanga nunjile, nuzuke chifuchi chipema chize alishingile Yehova kuhana kuli tulamba twenu,

¹⁹ mukuhuma akwa kole jenu eswe kumeso jenu, ngwe ambile Yehova.

²⁰ Muze manuhula kuli ana jenu ha miaka muyizaho ngwo, Shindakenyo yinalumbunuka kuchi? ni yiyulo, ni upatwilo, Yehova Zambi yetu anwambileyo?

²¹ Henaho nwambe kuli ana jenu ngwenu, Twapwile tupinji twa Falau mu Engitu, Yehova yatuchiza mu Engitu ni kwoko lia ndundo.

²² Yehova yalweza yilayi, ni yikomokeso yinene, yikalu ni ha Engitu ni hali Falau, ni hali akwa zuwo lienyi eswe, kumeso jetu.

²³ Iye yatuchizamo hanga atunjise mu chifuchi chize alishingile kuhana kuli tulamba twetu.

²⁴ Yehova yatwamba tulinge yiyulo yino yeswe, tuvwile woma Yehova Zambi yetu, chikapwe chipema chetu matangwa eswe, iye atufunge a mwono, ngwe chinapu musono.

²⁵ Kumuchipwa ululi kuli yetu, kachi mutukanyama kulinga liji lino lieswe lia shimbi kumeso ja Yehova Zambi yetu, ngwe atwambilelio iye.