Shimbi 34 - MUKANDA USANDU WA ZAMBI 1975

¹ Mose yakatuka ku yana ya Moape, yakanduka ha mulundu wa Nebo, ndo ku mbulwa Pisiga, yatalangana ni Yeriku. Yehova yamulweza chifuchi cheswe cha Ngiliate ndo ku Ndane,

² ni kweswe ku Napatali, ni chifuchi cha Eframe, ni Manase, ni chifuchi cheswe cha Yunda ndo ku kalunga-lwiji wa ku Chitokelo,

³ ni ku Negeve ni chana cha chikulo cha Yeriku, limbo lia mingaji ndo ku Zoare.

⁴ Yehova yamba kuli iye ngwenyi, Chifuchi chino nalishingile kuli Apalahama, ni kuli Izake, ni kuli Yakomba, ngwami, Mungukachihana kuli ana jenu. Hinakumwesacho ku meso je, alioze kuchi kazauka nikuyako.

⁵ Chocho Mose, kavumbi ka Yehova, yafwila mu chifuchi cha Moape nikulita ni liji lia Yehova.

⁶ Yamufunda mu chikulo, mu chifuchi cha Moape, kwatalangana ni Mbete-Peore, alioze niumwe unanyingika fuka lienyi ndo ku tangwa lino.

⁷ Mose wapwile ni kulakaji lia miaka ni makumi aali a miaka muze afwile, meso jenyi kafuwileko, chipwe tachi ja mujimba wenyi kujatepulukile.

⁸ A-Izalele yalilila Mose mu yana ya Moape makumi atatu a matangwa, chocho matangwa a kulila, a kwimbila Mose lungungu yahwa.

⁹ Yoshua, mwana wa Nune, wazalile tò ni Spiritu ya mana, mumu te Mose hasayika hali iye moko jenyi. A-Izalele yapanjika kuli iye, yalinga ngwe Yehova ambile Mose.

¹⁰ Kukwasolokele mu Izalele profeta niumwe walifwa ni Mose, Zambi te yamunyingika meso ni meso.

¹¹ Ni yilayi yeswe, ni yikomokeso, Yehova wamutumine kulinga mu chifuchi cha Engitu, ni kuli Falau, ni kuli ngamba jenyi eswe, ni ku chifuchi chenyi cheswe.

¹² Ni kwoko lieswe lia ndundo, ni yuma yeswe yinene ya kukola mwongo, Mose walingile kumeso ja A-Izalele eswe.