Shimbi 33 - MUKANDA USANDU WA ZAMBI 1975

¹ Mose mwe mutu wa Zambi shimbu kanda afwa wawahishile A-Izalele ni yiwape yino,

² ngwenyi, Yehova wakatukile ku Sinai, ku Sere wavumbukile hali ayo ngwe mwalwa. Ku mulundu wa Parane wapangulukile. Yakatuka ku kumi lia tununu twa asandu ni shimbi ya kahia mu kwoko lienyi lia chindume.

³ Chamwenemwene kazanga atu jenyi. Asandu jenyi eswe ali mu kwoko lie. Eswe kakutwama ku molu je. Kakutambula maliji je.

⁴ Mose yatwaha shimbi, ayo chihinga cha chikungulwila cha Yakomba.

⁵ Iye te mwanangana mu Yeshurene muze akwa lutwe ja atu akungulukile, minyachi yeswe ya Izalele hamuwika.

⁶ Rupene atwame ni mwono; kanda afwa. Chipwe malunga jenyi kanda atepuluka.

⁷ Ha kutwala kuli Yunda yamba ngwenyi, Yehova, ivwa kama liji lia Yunda, ukamunehe kuli atu jenyi. Ukamwashile jita ni moko je, ukamukwase kulimika ni akwa kole jenyi.

⁸ Ha kutwala kuli Levi yamba ngwenyi, Tumimi twe ni Urimi we, kuyili kuli mukwa uwayilo we, yoze wamwesekele ku Masa, walitachikile nenyi ku meya a Meripa.

⁹ Yoze te wambile ha kutwala kuli tato ni naye ngwenyi, Chaasele mbunge. Katayijile usoko wenyi. Katalile kuli ana jenyi. Mumu wafungile liji lie, katangwile usendo we.

¹⁰ Makalongesa Yakomba upatwilo we. Makalongesa Izalele shimbi je. Makasa insensu kumeso je. Makasa milambu ya kulumba ya muwundu ha chilumbilo che.

¹¹ Yehova, wahisa kama yikumba yenyi. Tambula kanawa yitanga ya moko jenyi. Wonda kama miongo ya akwa kulimika nenyi, ni ya akwa kole jenyi, kanda ahinduka nawa.

¹² Ha kutwala kuli Mbenjamine yamba ngwenyi, Iye kamuzanga kuli Yehova, hakamwihi nenyi makatwama kawape. Makamufuka tangwa lieswe nganganga. Iye makatwama hakachi ka yipaya yenyi.

¹³ Ha kutwala kuli José yamba ngwenyi, Yehova akawahise chifuchi chenyi, ni yawana ya mwilu yize yahiana kupema, ni ya mume, ni ya meya atwama kushi.

¹⁴ Akamwehe mihuko yipema ya ha mwalwa, ni mbuto yeswe ya tungonge tweswe,

¹⁵ ni yuma yipema ya ku milundu yikulu, ni kulumbama cha milundu ya mutolo,

¹⁶ ni yawana yahiana ya mu mavu ni kulumbama cho, ni uwape wa yoze Watwamine mu mungonga. Yino yeswe yikatwame ha mutwe wa José, ha mbanda-mutwe wa yoze amuhandunwine hakachi ka ayayo.

¹⁷ Uhenya wenyi wapwa ngwe ngombe yenyi wa kuji mutangu kusemuka, mbinga jenyi japwa ngwe ja mbau mashinjika najo mavungu, e eswe lume, ndo ku masongo a hashi. Chocho apwa kumi lia tununu a Eframe ni tununu twa Manase.

¹⁸ Ha kutwala kuli Zapulone yamba ngwenyi, Wahilila, ena Zapulone, mu kutuhuka che, ena Isaka, wahilila mu mbalaka je.

¹⁹ Makalakenya atu ku we mulundu. Kwenako makalambwila milambu ya ululi, mumu makashisa cha kulumbama cha ku tulunga-lwiji, ni ku upite waswama mu masekeseke.

²⁰ Ha kutwala kuli Ngate yamba ngwenyi, Kawaha mweswe matohesa Ngate! Ngate katwama ngwe ndumba. Yapapulula kwoko, chipwe mbanda-mutwe.

²¹ Yalitongwela chihanda chipema cha chifuchi. Kwenako afungile chihanda cha mukwa kuyula. Wejile kuli akwa lutwe a atu, walingile upatwilo wa Yehova ni shimbi jenyi ja ululi kuli Izalele.

²² Ha kutwala kuli Ndane yamba ngwenyi, Ndane yapwa ngwe mwevu wa ndumba. Makakatuka ku Mbashane nikunyangumuka.

²³ Ha kutwala kuli Napatali yamba ngwenyi, Ena Napatali, hakuyukisa ni vumbi, uli wa tò ni yiwape ya Yehova, zuka Chitende ni chifuchi cha ku Sule.

²⁴ Ha kutwala kuli Ashe yamba ngwenyi, Akawahise Ashe ni ana anji a malunga. Akapemene kuli usoko wenyi, akachupike kulu lienyi mu maji.

²⁵ Njalo je mujikapwa ja utale ni unengu. Tachi je mujikalita ni matangwa je.

²⁶ Niumwe walifwa ni Zambi ya Yeshurene yoze kakuzomboka ha malilu mukukukwasa, kakuzomboka mu tetela ni wanangana.

²⁷ Zambi ya mutolo iye chiswamo che mba kushi kwatwama moko a mutolo. Iye makahuma akwa kole kumeso je mamba ngwenyi, Aonwonenu.

²⁸ Chocho Izalele makatwama kawape ukawenyi. Fuji lia Yakomba makatwama mu chifuchi cha mbuto ni vinyu, mba malilu jenyi makamwaha mume.

²⁹ Izalele! Kuwawaha. Iya walifwa ni yena? Uli vungu alilamwinyine kuli Yehova. Iye lukepwe wa kukukwasa. Iye katana ka kukumba che Akwa kole je kumakeza nikuliumba kuli yena mba kumukaliata ha manangamo jo.