Shimbi 32 - MUKANDA USANDU WA ZAMBI 1975

¹ Enu malilu panjikenu mba munguhanjika; ena hashi ivwa maliji a mu kanwa liami.

² Longeso liami likasotoke ngwe vula, kuhanjika chami chikapwe ngwe mume, ngwe vula wa kuwayangila ha mwambu wovu, ngwe vula wa chehu ha yiputa.

³ Mumu mungulumbununa Yehova chize apwa. Fumanyisenu Zambi yetu!

⁴ Iye Liwe. Yitanga yenyi yingunu, mumu majila jenyi eswe ja ululi. Iye Zambi ya jika; keshi uhenge; mukwa pundu, mukwa umwenemwene.

⁵ O hamulinga mafwefwe, kapwile nawa ana jenyi mumu ha kupiha cho. Chisemuko cha kupiya ni kuhenga.

⁶ Chocho munukundulula kuli Yehova, enu atu a uhepuke ni lwelia? Te hi tatenu ko? Yoze wanutangile, wanuwumbile, wanukolesele?

⁷ Iwulukenu matangwa a shakulu. Zewulenu miaka ya yisemuko ya kushi. Hulenu atatenu, manulweza. Hulenu makulwana jenu, manwambulwila.

⁸ Muze mwe Chitunda wahanyine yihinga ku mavungu, muze wahandunwine ana ja Alama, wafunjikile njiza ja minyachi nikulita ni kwalula cha A-Izalele.

⁹ Mumu chihanda cha Yehova chapwa atu jenyi. Yakomba yapwa chihinga chenyi cha kutongola.

¹⁰ Wamuwanyine mu chifuchi cha puya, mwe mu makanga ahululu mwakupozonoka ngongo. Yamujingulula, yamulela, yamufunga ngwe katumba ka liso lienyi.

¹¹ Chizechene ngwe pupa kakuvundula walo wenyi nikuhuha helu lia ana jenyi, nikuzazulula mapulwa jenyi kwakwata nikwambata ha tonga jenyi,

¹² chocho Yehova wika wangusongwelele, te mazambi a tundaka keshiko hamwe nenyi.

¹³ Wamwendesele ha manangamo a hashi. Yamulisa kulia cha ku minda. Yamwaha kushisa wuchi ku liwe. Ku liwe lia utale yamwaha maji.

¹⁴ Maji a yamwa ya ngombe, ni yamwa ya mapanga, ni maji a ana-mapanga ni kuji a mapanga, yendo ya ku Mbashane hamwe ni pembe, hamwe ni tiliku yipema yahiana. Wanwine vinyu—e manyinga a uva.

¹⁵ Yeshurene watohele mba yatwa chishindo, ngwami, Nwatohele, ni kumeta, ni kusenena ni maji mba yehuka Zambi tangi yo, yalelesa Liwe lia ulamwino wo.

¹⁶ Yamwihia evwe ukwa ni tuzambi twa tundaka, yamwihia ni yitanga yo ya kuzelwokesa.

¹⁷ Alambwile milambu ku ndemoniu—hi tuzambi ko; te ku tuzambi katunyingikine nilimwe tangwa, te ku tuzambi hitwasoloka helu, atatenu katuvwilile woma nilimwe tangwa.

¹⁸ Kunwasele mbunge Liwe yoze wanusemene. Nwavulamine Zambi chisemi chenu.

¹⁹ Yehova yachimona, yaalelesa mumu ha kwihia cha anenyi a malunga ni a mapwo.

²⁰ Yamba ngwenyi, Mungwaswekela meso jami nguchitale chize muchipwa songo lio. Mumu o kapwa chisemuko chapiya ana keshi mbunge.

²¹ Hangwihia ngwivwe ukwa ni chuma kuchalumbunukine ngwe umwe zambi. Hangwihia ni tuponya two. Kashika ni yami mungwehia evwe ukwa wa waze kapwile atu. Mungwehia ni vungu lia uhepuke.

²² Mumu mu utenu wami hinawika kahia kukanalengenya ndo ku mashima a Shiole. Kukanalese hashi ni mbuto yaho. Kukanachocheka fundamentu ya milundu.

²³ Mungulumbikila hali ayo yuma yipi; mungumana hali ayo mivi yami yeswe.

²⁴ Makawangama ni zala. Makakuwa ni kusasaminya chá, ni yilungo ya utende. Mungwatuma mazo a ngongo ni utende wa tushitu a kukalala mu fufuta.

²⁵ Haze mafwa ni katana, mu mazuwo mukupwa mwongo nikwonwona mukweze ni mwana-pwo, ni mwana unamu, ni lunga wa kambu jitoma.

²⁶ Te nambile kwamba ngwami, Mungwamwanga kusuku. Mungwajimisa ku manyonga ja atu.

²⁷ Alioze nevwile woma ngwami, Akwa kole machoka. Akwa kulimika no machimona ngwe chuma cheka, hanji mamba ngwo, Kwoko lietu hinakumba, Yehova kalingile yino yeswe.

²⁸ Mumu hapwa vungu kulishi mana. Chinyingi chakuhi muli ayo.

²⁹ Nyi kachi mana apwile no, kachi machisa chinyingi, kachi mamona kama songo lio.

³⁰ Kuchi umuwika mahuma kanunu hanji aali mazombwesa kumi lia tununu, kachi Liwe lio kaalanjishile kachi Yehova kaambilile?

³¹ Mumu liwe lio kuliapwile ngwe Liwe lietu. Chipwe akwa kole jetu chocho anambe.

³² Mutondo wa uva wo unakatuka ku mutondo wa uva wa Sondome kwe ku minda ya Ngomora. Uva jo ja utende yichakata yo yinasase.

³³ Vinyu yo utende wa tupela ngwe utende usasu wa yihili.

³⁴ Yino yeswe te chayitulikile mu mbunge yami? Chayifungile hamwe ni upite wami, nyi?

³⁵ Kukala nichami, ni kufweta nawa ha tangwa lize malimbuka. Mumu tangwa lio lia kuji-ni-tomo hakamwihi lili. Yuma yize muyiawana, yinakundama fuji.

³⁶ Mumu Yehova makasambisa atu jenyi. Makavwila keke tuvumbi twenyi muze mamona tachi jo hijahwa mba niumwe wasala, apwe ndungo, apwe mwene.

³⁷ Mba mamba ngwenyi, Tuzambi two tulihitwo? Hanji liwe kuze achinyinyine?

³⁸ Tuze twalile maji a milambu yo, twanwine vinyu ya milambu yo ya kunwa, tulihitwo? Tukatuke tuyo, tunukwase! Tunufunge tuyo!

³⁹ Haliapwila talenu. Ngwami, Yami, yami mwene nguliko. Kukushi niumwe zambi hamwe ni yami. Nakushiha mba nakuhana mwono, nakulemeka mba nakuwuka. Kukushi niumwe mahasa kupulula mutu ku kwoko liami.

⁴⁰ Nakuzundula kwoko liami kwilu nikulishinga ngwami, Ni mwono wami wa mutolo.

⁴¹ Nyi munguhela katana kami ka uhenya nikukwata ku upatwilo, kumungulikala hali akwa kulimika ni yami mungufweta waze akunguvwila kole.

⁴² Munguzengewesa mivi yami ni manyinga. Katana kami malia yifwo hamwe ni manyinga a afu ni funge, ni mutwe wa mianangana ja akwa kole.

⁴³ Enu mavungu, halisenu atu jenyi, mumu hafwetesa manyinga a tuvumbi twenyi. Yalikala hali akwa kulimika nenyi. Hapemesa chifuchi cha atu jenyi.

⁴⁴ Mose yaheta, yahanjika maliji eswe a mwaso uno ku matwi ja atu, neye ni Yoshua, mwana Nune.

⁴⁵ Muze te Mose yamana kuhanjika ni A-Izalele eswe maliji ano eswe,

⁴⁶ yamba kuli ayo ngwenyi, Selenu mbunge jenu ku maliji eswe ngunanushindakenyo musono. Munukaamba ana jenu, mukukanyama kulinga maliji eswe a shimbi yino.

⁴⁷ Mumu kuli yenu hi chamokomoko ko, kuchapwa mwono wenu, ku chuma chino munukokesa matangwa jenu mu chifuchi, nunazauka Yordau kuchizuka.

⁴⁸ Yehova yahanjika ni Mose tangwa lize liene ngwenyi,

⁴⁹ Kanduka mulundu uno wa Aparime, ku mulundu wa Nebo uli mu chifuchi cha Moape, watalangana ni Yeriku, utale chifuchi cha Kanana, munguchihana kuli A-Izalele akachizuke.

⁵⁰ Ufwile ha mulundu mukanduka, akutwale kuli atu je, ngwe afwile yayenu Arone ha mulundu wa Hore, amutwalile kuli atu jenyi.

⁵¹ Mumu te nwatangwile shimbi yami hakachi ka A-Izalele ku meya a Meripa-Kandeshe mu puya ya Zini, mumu te kunwanguselele ku usandu mukachi ka A-Izalele.

⁵² Mumu mumona chifuchi chize chili kulutwe lie, alioze kuchi kunjila mu chifuchi ngunahana kuli A-Izalele.