Shimbi 31 - MUKANDA USANDU WA ZAMBI 1975

¹ Mose yaya, yambulula maliji ano kuli A-Izalele eswe.

² Yamba ngwenyi, Musono uno nguli ni kulakaji lia miaka ni makumi aali a miaka, Chahashile nawa kutuhwoka ni kunjilanjila. Yehova hamba kuli yami ngwenyi, Kuchi kuzauka yono Yordau.

³ Yehova Zambi yenu makanutetekela, makonwona mavungu aze kumeso jenu, nukaazuke. Yoshua, iye makazauka kumeso jenu, ngwe ambile Yehova.

⁴ Yehova makalinga kuli ayo ngwe alingile iye kuli Sahone, ni kuli Oge, mianangana ja A-Amore ni ku chifuchi cho, iye yaonwona.

⁵ Yehova makaakunjika kumeso jenu, munukalinga kuli ayo nikulita ni liji lieswe lia shimbi hingunanwambelio.

⁶ Takamenu, hamukenu, kanda nwivwa woma, kanda nususamiana mumu hali ayo, mumu Yehova Zambi yenu iye kanayi hamwe ni yenu; kechi kanuhichika, chipwe kunwehuka, ka.

⁷ Mose yasanyika Yoshua, yamba kuli iye kumeso ja A-Izalele eswe ngwenyi, Takama, uhamuke; mumu kumukaya ni wano atu ku chifuchi Yehova walishingile kuli tulamba two mukwaahacho, mukaatungisamo.

⁸ Yehova, iye kanayi kumeso je, kumakapwa hamwe ni yena; kechi kakuhichika, chipwe kukwehuka, ka; kanda wivwa woma, chipwe mwongo, ka.

⁹ Mose yasoneka shimbi yino, yayihana kuli asasendote, A-Levi, waze ambachile mushete wa usendo wa Yehova, ni kuli makulwana eswe a Izalele.

¹⁰ Mose yaamba ngwenyi, Ha kusula cha miaka shimbiali, miaka shimbiali, ha mwaka wa kutusula, ha kakweji wa kutongola, ha chiwanyino cha yisakila,

¹¹ muze A-Izalele eswe makasoloka kumeso ja Yehova Zambi yenu kuze iye matongola, ukatange shimbi yino kumeso ja A-Izalele eswe, akayivwe.

¹² Ukungulule atu, ni malunga, ni mapwo, ni ana akepe, ni njize ali mu yihunda yenu, hanga akevwe, akalilongese, akavwile woma Yehova Zambi yenu, akakanyame kulinga maliji eswe a shimbi yino,

¹³ ni ana jo waze kayinyingikine, akevwe, akalilongese kuvwila woma Yehova Zambi yenu, matangwa eswe munukatwama mu chifuchi nunazauka Yordau kuchizuka.

¹⁴ Yehova yamba kuli Mose ngwenyi, Tangwa lia kufwa che linakundama. Tambika Yoshua, numane mu mbalaka ya chikungulwila, hanga ngumwehe chiyulo. Mose ni Yoshua yaya, yamana mu mbalaka ya chikungulwila.

¹⁵ Yehova yasoloka mu ye mbalaka mu nguji lia lelwa; nguji lia lelwa yilizulamina helu lia chikolo cha mbalaka.

¹⁶ Yehova yamba kuli Mose ngwenyi, Kutala! Yena kumuoya tulo ukalifutule ni tulamba twenu. Atu ano makakatuka, makalinga ukoi nikukaula tuzambi twa tundaka a chifuchi, kuze anayi kutwama. Makangwehuka, makatangula usendo wami nakolesele no.

¹⁷ Mba utenu wami muukaakasumukina ha tangwa lize, mungukaehuka, mungukaaswekela meso jami, makaamanuna. Yipi yinji ni lamba linji mulikaawana, chocho o mahamba ha tangwa lize ngwo, Kuma, yipi yino yeswe yinatuwana mumu te Zambi yetu keshi hakachi ketu nyi?

¹⁸ Chamwenemwene kumungukasweka meso jami tangwa lize mumu ha yipi yeswe o halinga, mumu atewulukilile ku tuzambi tweka.

¹⁹ Kashika, haliapwila, ulisonekene mwaso uno, ukaulongese kuli A-Izalele, ukause mu makanwa jo, hanga ukapwe chela cha yami, wa kukumisa A-Izalele.

²⁰ Muze mungwahetesa mu chifuchi nalishingile kuli tulamba two mukwaahacho, kuze kunokela yamwa ni wuchi, ha kulia, ha kukuta, ha kutoha, henaho o makatewulukila ku tuzambi tweka, nikutuvumbika, makangulelesa, makatangula usendo wami.

²¹ Ha kwiza hali ayo yipi yinji ni lamba linji, mwaso uno muukashindakenya kumeso jo ukapwe chela; mumu kechi kauvulama ku makanwa ja ana jo; mumu ngunanyingika kutaka cho anatake haliapwila, shimbu kanda ngwahetesa mu chifuchi nalishingile kwaaha.

²² Chocho Mose yasoneka we mwaso tangwa lize liene, yaulongesa kuli A-Izalele.

²³ Yehova yahana kuli Yoshua, mwana wa Nune, chiyulo ngwenyi, Takama, uhamuke, mumu kumukahetesa A-Izalele mu chifuchi nalishingile kuhana kuli ayo. Mungukapwa hamwe ni yena.

²⁴ Mba muze te Mose hamanununa kusoneka maliji a shimbi yino mu mukanda ndo hahwa,

²⁵ Mose yamba A-Levi apwile nikumbatambata mushete wa usendo wa Yehova ngwenyi,

²⁶ Twalenu mukanda uno wa shimbi, nuuse ku lumbu lia mushete wa usendo wa Yehova Zambi yenu, hanga ukapweko chela wa kunukumisa.

²⁷ Mumu ngunanyingika kukolema chenu ni pami jenu. Kumanyi, shimbu nguchili ni mwono hamwe ni yenu musono kunwakolema Yehova, mba kulutwe lia kufwa chami muchihiana.

²⁸ Ngukungulwilenu makulwana eswe a minyachi yenu, ni yilolo jenu, hanga nguhanjike maliji ano ku matwi jo, ngutambike malilu ni hashi akapwe chela cha kwakumisa.

²⁹ Mumu ngunanyingika ngwami, Kulutwe lia kufwa chami kumunukalilumbula liakulu, munukahambuluka ku jila nanwambileyo, yipi muyiza kunuwana ha matangwa a kusula, mumu munukalinga chipi kumeso ja Yehova, mukumwihia ku yitanga ya moko jenu.

³⁰ Mose yahanjika ku matwi ja chikungulwila cheswe cha A-Izalele maliji a mwaso uno, ndo ahwile.