Shimbi 30 - MUKANDA USANDU WA ZAMBI 1975

¹ Muze yino yuma yeswe hiyeza hali yenu, che chiwape ni lie shingo, hinasa kumeso jenu, mba ha kwiwuluka hakachi ka mavungu eswe kuze Yehova Zambi yenu hanuhumina,

² ha kuhiluka kuli Yehova Zambi yenu ni kuzeya ku liji lienyi ni mbunge jenu jeswe, ni alma jenu jeswe, nikulita ni yeswe ngunanwambeyo musono, ni yenu, ni ana jenu,

³ Yehova Zambi yenu kumakalumuna ufunge wenu, makanuvwila keke, nikunukonga ku mavungu eswe kuze Yehova Zambi yenu wanumwanginyine.

⁴ Chipwe amwe a kuli yenu hanaamwange ku masongo a malilu, mba ku kuze Yehova Zambi yenu makanukonga, ku kuze iye makanusaka.

⁵ Yehova Zambi yenu makanuhetesa mu chifuchi chapwile cha akakenu, nukachizuke, makanulinga yipema, makanwokesa, munukapwa anji, akakenu akehe.

⁶ Yehova Zambi yenu makanupwisa ngalami ku mbunge jenu, ni mbunge ja ana jenu, nukazange Yehova Zambi yenu ni mbunge jenu jeswe, ni alma jenu jeswe, hanga nutwame ni mwono.

⁷ Yehova Zambi yenu makasa mashingo ano eswe hali akwa kole jenu, hali eswe ananuvwila kole, anuhungumionene.

⁸ Munukahiluka nikuzeya ku liji Ka Yehova, ni kulinga maliji jenyi eswe a shimbi ngunanwambo musono.

⁹ Yehova Zambi yenu makanufumbula ku milimo yeswe ya moko jenu, ni ana a ku mijimba yenu, ni ana a yimuna jenu, ni mbuto ya ha mavu jenu, hanga nuwahe. Mumu Yehova makawahilila nawa hali yenu, nuwahe, ngwe iye wawahililile hali akakenu,

¹⁰ kachi munukazeya ku liji Ka Yehova Zambi yenu, mukufunga maliji jenyi a shimbi ni yiyulo yenyi yinasonewa mu mukanda uno wa shimbi, kachi munutewulukila kuli Yehova Zambi yenu ni mbunge jenu jeswe, ni alma jenu jeswe.

¹¹ Mumu liji lino lia shimbi ngunanwambelio musono, kulianukalilile, chipwe kuliapwile kusuku.

¹² Kuliapwile mwilu, nwambe ngwenu, Iya matuzezukila mwilu, atuhulumwishinelio? Iya matuvwisalio hanga tulilinge?

¹³ Chipwe kuliapwile mu sali lia kalunga-lwiji, nwambe ngwenu, Iya matuzaukila kalunga-lwiji, atunehenelio? Iya matuvwisalio, hanga tulilinge?

¹⁴ Alioze liji lili hakamwihi chikolo ni yenu, mu makanwa jenu ni mu mbunge jenu, hanga nulilinge.

¹⁵ Kutala! Hinasa kumeso jenu musono mwono ni yipema; kutwa ni yipi.

¹⁶ Ngunanwambe musono, nuzange Yehova Zambi yenu, nwende mu majila jenyi, nufunge maliji jenyi a shimbi, ni yiyulo yenyi, ni upatwilo wenyi, hanga nupwe ni mwono, nwoke, hanga Yehova Zambi yenu anuwahise mu chifuchi nunayi kuchizuka.

¹⁷ Alioze kachi mbunge jenu mujitewuluka, kunuchi kwivwa, alioze manukoka, munuwayila tuzambi tweka ni kutuvumbika,

¹⁸ ngunanwambulwila musono ngwami. Chamwenemwene kumunukakuwa. Kunuchi kwokesa matangwa jenu mu chifuchi nunazauka Yordau kuchizuka.

¹⁹ Ngunatambika malilu ni hashi yinushindakenye musono ngwami, Hinasa kumeso jenu mwono ni kufwa, chiwape ni shingo, kashika, tongolenu mwono hanga nupwe ni mwono, ni yenu ni ana jenu.

²⁰ Mukuzanga Yehova Zambi yenu, mukuzeya ku liji lienyi, mukumulalaminya, mumu iye mwono wenu, ni kwoka cha matangwa jenu, hanga nutwame mu chifuchi Yehova walishingile kuli tulamba twenu, kuli Apalahama, ni kuli Izake, ni kuli Yakomba, akaahecho.