Shimbi 3 - MUKANDA USANDU WA ZAMBI 1975

¹ Henaho yitulikonda, yitukanduka ku jila yinayi ku Mbashane. Oge, mwanangana wa Mbashane, yatuhuka ni kulimika ni yetu, iye ni atu jenyi eswe, mukwasa jita ku Endreya.

² Yehova wambile kuli yami ngwenyi, Kanda umuvwila woma, mumu te hinamukunjika mu kwoko lie ni atu jenyi eswe, ni chifuchi chenyi, ukamulinge ngwe walingile ni Sahone, mwanangana wa A-Amore atwamine ku Heshebone.

³ Chocho Yehova Zambi yetu yakunjika mu moko jetu ni Oge nawa, mwanangana wa Mbashane, ni atu jenyi eswe, yitumulamba ndo kukwapwile mutu unamusalila.

⁴ Yitulwa membo jenyi eswe ha mwaka uze. Kukwapwile limbo kutwalwilelio kuli ayo, te makumi asambano a membo, chifuchi cheswe cha Argobe, wanangana wa Oge mu Mbashane.

⁵ Eswe apwile membo ni yipanga yisuku yakujingilika, ni yajilo, ni njalo; kuwezaho yihunda yinji chikolo kuyishi yipanga.

⁶ Yetu yitwaonwona liakulu, ngwe twalingile ni Sahone mwanangana wa Heshebone, yitwonwona liakulu membo eswe, ni malunga, ni mapwo, ni ana akepe.

⁷ Alioze yimuna eswe ni yikumba ya mu membo yitutambulayo yipwe niyetu.

⁸ Ha mwaka uze yitutambula chifuchi ku moko ja mianangana aali a A-Amore apwile mu sali lia Yordau, katuke ku chikulo cha Arnone ndo ku mulundu wa Hermone.

⁹ (Hermone, A-Sendone anauvuluka ngwo, Sirione. A-Amore anauvuluka ngwo, Senire.)

¹⁰ Membo eswe a mu chana, ni kweswe ku Ngiliate ni kweswe ku Mbashane ndo ku Saleka, ni ku Endreya, membo a mu wanangana wa Oge mu Mbashane.

¹¹ Mumu Oge Mwanangana wa Mbashane wika ukawenyi wasalile wa ku masalilo ja A-Refane. Kutala! Muhela wenyi wapwile wa utale; uli mu Raba lia kuli A-Amone. Usuhe wawo te mbandu livwa, utohe wawo ngwe mbandu jiwana, nikulita ni cheseko cha mutu.

¹² Chifuchi chino twazukile chikapwe nichetu ha mwaka uze, katuke ku Aroere kwatwama ni chikulo cha Amone, ni chipinji cha hakachi cha chifuchi cha milundu cha Ngiliate, ni membo jacho nahanyine kuli A-Rupene, ni kuli A-Ngate.

¹³ Chihanda chikwo cha Ngiliate ni kweswe ku Mbashane, ni we wanangana wa Oge, yinguhana ku chihanda cha munyachi wa Manase. Chifuchi cheswe cha Argobe, kweswe ku Mbashane jina liako ngwo, Chifuchi cha Refane.

¹⁴ Njaire, mwana wa Manase, yalwa chifuchi cheswe cha Argobe ndo ku njiza ya A-Ngeshure ni ya A-Makata. Yaluka Mbashane jina lienyi ngwenyi, Havote-Njaire ndo ku tangwa lino.

¹⁵ Yinguhana Ngiliate kuli Makire.

¹⁶ Kuli A-Rupene ni kuli A-Ngate yinguhana katuke ku Ngiliate ndo ku chikulo cha Amone hakachi ka chikulo, yipwe njiza yacho, ndo ku lwiji Yapoke watwama ku njiza ya ana ja Amone.

¹⁷ Ni Arapa nawa ni Yordau ni njiza yacho, katuke ku Chinerote ndo ku kalunga-lwiji wa Arapa, Chitende cha Mungwa, ku mwanda wa Pisiga ni kutala ku Chivumbuko.

¹⁸ Yingunwamba ha mwaka uze ngwami, Yehova Zambi yenu hananwehe chifuchi chino chihinga. Munuzauka ni yitwa yenu kumeso ja akwenu, A-Izalele, malunga eswe a hamu.

¹⁹ Alioze mapwo jenu, ni ana jenu akepe ni yimuna jenu (ngunanyingika ngwami, Nuli ni yimuna anji) kumakatwama mu membo jenu nanuhelo,

²⁰ ndo Yehova mahana uhwimino kuli akwenu ngwe ahanyine kuli yenu, mba o nawa azuke chifuchi Yehova Zambi yenu anaahecho mu sali lia Yordau; henaho munuhiluka mutu ni mutu ku chihinga chenyi nanuhelecho.

²¹ Nambile Yoshua ha mwaka uze ngwami, Meso jenu hanamono yeswe alingile Yehova Zambi yenu kuli mianangana wano aali. Yehova alinge chizechene ku mawanangana eswe muze munuzauka.

²² Kanda nwavwila woma, mumu Yehova Zambi yenu iye makanwashila jita.

²³ Yinguliumba kuli Yehova ha mwaka uze ngwami,

²⁴ Mwene Yehova, hinwaputuka kulweza unene wenu, ni kwoko lienu lia tachi kuli yami kavumbi kenu; mumu kazambi kaka, hanji mwilu, hanji hashi kanahase kulinga nikulita ni yitanga yenu, nikulita ni yilinga yenu ya ngolo?

²⁵ Ngutayize, nguzauke, ngunakulembe, ngutale chifuchi chipema chili mu sali lia Yordau, mulundu uze upema, ni Lebano.

²⁶ Alioze Yehova yatenuka ni yami mumu hali yenu, kapanjikile kuli yami. Yehova yamba kuli yami ngwenyi, Kwahwa! Kanda uhanjika nawa ni yami ha kutwala ku chikuma chino.

²⁷ Ukanduke ku mbulwa mulundu wa Pisiga uhetule meso je utale ku Chitokelo, ni ku Norte, ni ku Sule, ni ku Chivumbuko, utale ni meso je; mumu kuchi kazauka yono Yordau.

²⁸ Alioze uhane shimbi kuli Yoshua umukolese umujikijise, mumu iye makazauka kumeso ja atu ano, iye makaatungisa mu chifuchi yena mumona.

²⁹ Chocho yitutwama mu chikulo chalitalangana ni Mbete-Peore.