Shimbi 29 - MUKANDA USANDU WA ZAMBI 1975

¹ Wano e maliji a usendo, Yehova wambile Mose kukolesa ni A-Izalele mu chifuchi cha Moape, kuweza ku usendo iye wakolesele no ku Horepe.

² Mose yatambika A-Izalele eswe ngwenyi, Nwamwene yeswe alingile Yehova kumeso jenu mu chifuchi cha Engitu kuli Falau, ni kuli ngamba jenyi, ni ku chifuchi chenyi cheswe.

³ Meso jenu amwene yeseko yinene, ni yilayi, ni yikomokeso yize yinene.

⁴ Alioze Yehova kanuhele mbunge ya kunyingika, ni meso a kumona, ni matwi a kwivwa, ndo ku tangwa lino.

⁵ Nanutwalile mu puya makumi awana a miaka; mazalo jenu kafwileko ha mijimba yenu, haku jenu kujafwile ha molu jenu.

⁶ Kunwalile mbolo, chipwe kunwanwine vinyu, hanji yakunwa yisasu, hanga nunyingike ngwami, Yami Yehova Zambi yenu.

⁷ Muze nwahetele kuma kuno, Sahone, mwanangana wa Heshebone ni Oge, mwanangana wa Mbashane, yatuhuka mukwasa jita ni yetu, yitwalamba.

⁸ Yitutambula chifuchi cho, yituchihana kuli A-Rupene chihinga, ni kuli A-Ngate, ni ku chihanda cha munyachi wa A-Manase.

⁹ Kashika fungenu maliji a usendo uno, nwalinge, hanga nukawahe ni yeswe munukalinga.

¹⁰ Yenu eswe nunamana musono kumeso ja Yehova Zambi yenu, ni akwa lutwe ja minyachi yenu, ni makulwana jenu, ni yilolo jenu, te malunga eswe a Izalele,

¹¹ ni ana jenu akepe ni mapwo jenu, ni njize uli mukachi ka chilombo chenu, chize kuli akwa kuchá kunyi jenu ndo kuli akwa kutaha meya jenu,

¹² hanga nukwate ku usendo wa Yehova Zambi yenu, ni ku shingo lienyi, Yehova Zambi yenu anakolesa ni yenu musono.

¹³ Hanga anukolese musono hali iye mwene nukapwe atu jenyi, hanga iye akapwe Zambi kuli yenu, ngwe ambile kuli yenu, ngwe alishingile kuli tulamba twenu, kuli Apalahama, ni kuli Izake, ni kuli Yakomba.

¹⁴ Chipwe chakolesele usendo uno ni shingo lino ni yenu ukawenu,

¹⁵ alioze ngunaukolesa ni atu anamana kuno musono hamwe ni yetu kumeso ja Yehova Zambi yetu, ni ngunaukolesa ni atu keshiko hamwe ni yetu musono.

¹⁶ Mumu nunanyingika ngwe twatwamine mu chifuchi cha Engitu, ngwe twendele ndusu mukachi ka mavungu aze nwapalikile.

¹⁷ Nwamwene yizelwokeso yo, ni mahamba jo a mitondo ni a mawe, ni a prata, ni a oru, japwile hakachi ko.

¹⁸ Kuchina mukupwa mukachi kenu lunga, hanji pwo, hanji akwa jiko limwe, hanji munyachi, mbunge yenyi yinatewuluka musono kuli Yehova Zambi yetu, nikuya, nikuvumbika tuzambi twa mavungu aze, kuchina mukupwa mukachi kenu muji umwe unemi kasashisa ni musase.

¹⁹ Kuchina ha kwivwa maliji a shingo lino, maliwahisa mwene mu mbunge yenyi ngwenyi, Mungupwa ni sambukila, chipwe mungwenda ni pami ja mbunge yami, ku pwila yami munguweza kuzengewa.

²⁰ Yehova kechi kamukonekena, alioze hohene utenu wa Yehova ni ukwa wenyi muukafwinjila mwishi yoze lunga, shingo lieswe linasonewa mu mukanda uno mulikamushata, Yehova makajimuna jina lienyi mushi lia lilu.

²¹ Yehova makamuhandunwina yipi kumuchiza ku minyachi yeswe ya A-Izalele, nikulita ni mashingo eswe a usendo anasonewa mu mukanda uno wa shimbi.

²² Mba chisemuko muchikapwa, ana jenu aze makasemuka kulutwe lienu, ni kandaka yoze makakatuka ku chifuchi chisuku, ha kumona lamba lia chifuchi chenu, ni weji Yehova anuyijishile nawo.

²³ Chifuchi cheswe chapwa fundanga, ni mungwa, ni mbwemena, chifuchi kachikuwile ni mbuto, kuchemine, chipwe mwambu niumwe kuwasokelemo, ngwe apupile Sondome ni Ngomora, ni Andama, ni Zepoime, Yehova wayipupile ni utenu wenyi, ni ufwatulo wenyi.

²⁴ Te mavungu eswe makamba ngwo, Kuchi te Yehova hanalingi chocho ku chifuchi chino? Kuchi chinalumbunuka chivukuminya cha utenu wenyi unene?

²⁵ Henaho malunga makamba ngwo, Mumu te o ehukile usendo wa Yehova Zambi ya akako, iye waukolesele no muze aachijile mu chifuchi cha Engitu.

²⁶ O yaya, yavumbika tuzambi tweka, yatuwayila, tuzambi o te katunyingikine, iye te kaaheletwo.

²⁷ Kashika utenu wa Yehova yiukasumukina chifuchi chino, mukuhetesaho shingo lieswe linasonewa mu mukanda uno.

²⁸ Yehova yaatukula ku chifuchi cho ni utenu wenyi, ni ufwatulo wenyi, ni matoto anji, yaambila mu chifuchi cheka, ngwe chapwa musono.

²⁹ Yuma yinahengama kuyapwa ya mbala ya Yehova Zambi yetu; alioze yuma yinasoloka te ya yetu ni ya ana jetu ku miaka ya mutolo, hanga tulinge maliji eswe a shimbi yino.