Shimbi 28 - MUKANDA USANDU WA ZAMBI 1975

¹ Nyi munupanjika kanawa ku liji lia Yehova Zambi yenu, ni kukanyama kulinga maliji jenyi eswe a shimbi ngunanwambe musono, mba Yehova Zambi yenu makanunangamisa helu lia mavungu eswe hano hashi.

² Yiwape yino yeswe muyikapwa kuli yenu, muyikanuwana, kachi munupanjika ku liji lia Yehova Zambi yenu.

³ Munukawaha mu membo, munukawaha mu minda.

⁴ Makawaha ana a ku mijimba yenu, ni mbuto ya ku mavu jenu, ni ana ja ngombe jenu, ni kwoka cha yimuna jenu, ni ana ja mapanga jenu.

⁵ Mitonga yenu muyikawaha, ni mboke jenu ja kuchikilamo.

⁶ Munukawaha ha kunjilanjila, munukawaha ha kutuhwoka.

⁷ Akwa kole jenu akunukatukila, Yehova makaalamba kumeso jenu. O makatuhukila jila yimuwika kulimika ni yenu, alioze kumakachina kumeso jenu ku majila shimbiali.

⁸ Yehova kumakanuwahisa ku machila jenu, ni ku yuma yeswe munulinga ni moko jenu. Iye makanuwahisa mu chifuchi chize Yehova Zambi yenu ananwehecho.

⁹ Yehova makanukolesa, nukapwe atu asandu kuli iye mwene, ngwe alishingile kuli yenu, kachi munufunga maliji a shimbi a Yehova Zambi yenu, ni kwenda mu majila jenyi.

¹⁰ Mavungu eswe a hashi makamona ngwo, Hananuluku ni jina lia Yehova, mba makanuvwila woma.

¹¹ Yehova makanuwahisa ni yikumba, ni ana a mijimba yenu, ni ana a yimuna jenu, ni mbuto ya mavu jenu, mu chifuchi chize Yehova walishingile kuli tulamba twenu kunwahacho.

¹² Yehova makanupakwila upite wenyi upema wa mwilu, mukunokesa vula wa chifuchi chenu ha mwaka wenyi, mukuwahisa milimo yeswe ya moko jenu. Munukahana mikuli ku mavungu anji, alioze kunuchi katambula mikuli.

¹³ Yehova makanupwisa mutwe, hi muchila ko, munukapwa helu wika, kunuchi kapwa mushi, nyi munupanjika ku maliji eswe a shimbi a Yehova Zambi yenu ngunanwambe musono, ni kukanyama kwalinga.

¹⁴ Kanda nukondoloka ku liji nilimwe lia maliji ngunanwambe musono, chipwe ku chindume, chipwe ku chimeso, mukukaula tuzambi tweka nikutuvumbika.

¹⁵ Nyi kunuchi kapanjika ku liji lia Yehova Zambi yenu, ni kukanyama kulinga shimbi jenyi jeswe, ni yiyulo yenyi ngunanwambeyo musono, mba mashingo ano eswe makapwa hali yenu, makanuwana.

¹⁶ Munukashingiwa mu membo, munukashingiwa mu minda.

¹⁷ Mitonga yenu muyikashingiwa, ni mboke jenu ja kuchikilamo.

¹⁸ Ana a ku mijimba yenu makashingiwa, ni mbuto ya mavu jenu, ni kwoka cha yimuna jenu, ni ana ja mapanga jenu.

¹⁹ Munukashingiwa ha kunjilanjila, munukashingiwa ha kutuhwoka.

²⁰ Yehova makanutuma shingo, ni kupinda, ni kwámbila, ku yuma yeswe munukalinga ni moko jenu, ndo makanwonwona, ndo munukakuwa washiwashi, mumu te ha yipi ya yilinga yenu, nwangwehukile nayo.

²¹ Yehova makanukwachisa chilungo, ndo makanumanuna ku chifuchi nunayi kuchizuka.

²² Yehova makanulamba ni musongo wa mukaka, ni kachiki, ni chivukuminya chá ku mujimba, ni kusasaminya cha kahia, ni katana, ni kukonyata, ni kuunda. Muyikanuhanga ndo munukakuwa.

²³ Lilu lienu lili helu lia mitwe yenu mulikapwa unengu, hashi hali kushi lia yenu muhakapwa utale.

²⁴ Yehova makapwisa vula wa chifuchi chenu wungawunga, ni fufuta, kwilu muyikanunoka, ndo muyikanwonwona.

²⁵ Yehova makanulambisa kuli akwa kole jenu, munukatuhukila jila yimuwika kulimika no, alioze kumunukachina kumeso jo ku majila shimbiali, kumunukamwangana hakachi ka mawanangana eswe a hashi.

²⁶ Mijimba yenu muyikapwa kulia cha tujila eswe a ha tetela, ni cha tushitu ali hashi. Kukuchi kapwa niumwe wa kwahuma.

²⁷ Yehova makanulamba ni yivunda ya Engitu, ni hute, ni katoma, ni mukule, kechi kahasa kunuwukayo.

²⁸ Yehova makanulamba uzaluke, ni upuputa, ni mbunge ya kulishikishila.

²⁹ Kumunukapuputa tangwa te ha muchima, ngwe tupuputa akupuputa mu milima. Kunuchi kawaha mu majila jenu, makanumwesa lamba wika, makanuhupa matangwa eswe, kukuchi kapwa niumwe kunulamwina.

³⁰ Munukatenda pwo, mba lunga weka makapomba nenyi. Munukatunga zuwo, mba kunuchi katwamamo. Munukatumba minda ya uva, mba kunuchi kalia mihuko yayo.

³¹ Makashiha ngombe jenu kumeso jenu, kunuchi kaliako. Makanuchiza ni tachi chimbulu chenu kumeso jenu, kechi kanuhilwishilaye. Makahana mapanga jenu kuli akwa kole jenu, kukuchi kapwa niumwe kunulamwina.

³² Kumakahana ana jenu a malunga ni ana jenu a mapwo kuli atu eka, meso jenu matala, makapwa ni usona wo tangwa lieswe, moko jenu makahona tachi.

³³ Mbuto ya ha mavu jenu ni kuhondangana chenu cheswe kumakayilia kuli akwa vungu enu kunwaanyingikine, makanumwesa lamba wika, nikunushata chipi matangwa eswe.

³⁴ Chocho munukazaluka ni yuma yize meso jenu mamona.

³⁵ Yehova makanulamba ha makungunwa, ni ha molu ni yivunda yipi, kechi kahasa kunuwukayo, chize ku yiliato yenu ndo ku mbanda-mitwe yenu.

³⁶ Yehova makanuhetesa ni yenu ni mwanangana wenu nwamutongwele anuyule ku vungu limwe yenu kunwalinyingikine, chipwe yenu, chipwe akakenu, munukavumbikako tuzambi tweka, te mitondo ni mawe.

³⁷ Munukapwa chikomokeso, munukapwa chishima, munukapwa kashilikilo, hakachi ka atu eswe kuze Yehova makanutwala.

³⁸ Munukambata mbuto yinji ku munda, munukakunga yikepe, mumu makumbi makayilia.

³⁹ Munukatumba minda ya uva nikuyilima, alioze kunuchi kanwa vinyu yayo, chipwe kuhela uva, ka, mumu tututu makayilia.

⁴⁰ Munukapwa ni mitondo ya olevwe ndusu chifuchi chenu cheswe, alioze kunuchi kaliwayisa ni maji, mumu mitondo yenu ya olevwe muyikalukumuna mihuko yayo.

⁴¹ Munukasema ana a malunga ni ana a mapwo, alioze kechi kapwa ninyenu, makaya ku ufunge.

⁴² Makumbi kumakalia mitondo yenu yeswe ni mbuto ya ku mavu jenu.

⁴³ Njize uli mukachi kenu makayaya nikunangama helu lienu, yenu munukayaya ni kukehuluka mushi.

⁴⁴ Iye makahana mikuli kuli yenu, yenu kunuchi kahana mikuli kuli iye. Iye makapwa mutwe; yenu munukapwa muchila.

⁴⁵ Mashingo ano eswe makapwa kuli yenu, makanuhanga, makanuwana, ndo makanwonwona, mumu te kunwapanjikile ku liji lia Yehova Zambi yenu, mukufunga maliji jenyi a shimbi, ni yiyulo yenyi iye wanwambile.

⁴⁶ O makapwa hali yenu chilayi, ni chikomokeso, ni hali ana jenu ku miaka ya mutolo.

⁴⁷ Mumu te kunwavumbikile Yehova Zambi yenu ni chiseke ni kuwaha cha mbunge, mumu ha kwoka cha yuma yeswe.

⁴⁸ Kashika munukavumbika akwa kole jenu Yehova makaatuma alimike ni yenu, ni zala, ni pwila, ni uvu, ni kuhona cha yuma yeswe. Makasa kanga ya utale ku kota jenu, ndo makanwonwona.

⁴⁹ Yehova makahetesa vungu limwe Unakatuka kusuku kulimika ni yenu, ku songo lia hashi, ngwe pupa wakuhumuka, vungu Umwe limi lialio enu kunuchi kulivwa,

⁵⁰ vungu lia meso akalu, kulichi kalemesa makulwana, chipwe kulweza vumbi kuli twanuke,

⁵¹ makalia ana ja ngombe jenu, ni mbuto ya ha mavu jenu, ndo makanwonwona. Kechi kanuhichikila mbuto, hanji vinyu, hanji maji, hanji ana ja yimuna jenu, hanji ana ja mapanga jenu, ndo makanukuwisa.

⁵² Makanuseleka ku yihunda yenu yeswe, ndo yipanga yenu yisuku ya tachi muyikapuzuka, yize nwakuyifuliela, ndusu chifuchi chenu cheswe. Iye makanuseleka mu yihunda yenu yeswe ndusu chifuchi chenu cheswe, Yehova Zambi yenu hananwehecho.

⁵³ Ha mwaka wa kunuseleka, wa huli, makanuyindamisa kuli akwa kole jenu, munukalia ana a ku mijimba ya yenwene, musunya wa ana jenu a malunga ni ana jenu a mapwo, Yehova Zambi yenu wanuhelo.

⁵⁴ Lunga mukwa sonyi ni mukwa ngenye hakachi kenu, meso jenyi makapwa api kuli mukwo, ni kuli pwo yoze amuzanga, ni kuli ana jenyi anamusalila.

⁵⁵ Mumu keshi nichimwe chinasala cha ku kuseleka, ni cha ku huli, makanuyindamisa mu yihunda yenu yeswe kuli akwa kole jenu, chocho iye kechi kahana kuli niumwe musunya wa ana jenyi uze anali.

⁵⁶ Pwo mukwa sonyi ni mukwa ngenye hakachi kenu yoze keshi kweseka kuliata ha mavu mumu ha ngenye ni sonyi, iye makamina mukwo-lunga, ni mwanenyi wa lunga, ni mwanenyi wa pwo,

⁵⁷ chingoji chize chakatuka ku molu jenyi, ni ana jenyi a kusema, mumu makaalia ku tenga mumu ha kuhona ha mwaka wa kunuseleka, wa huli, makanuyindamisa kuli akwa kole jenu mu yihunda yenu.

⁵⁸ Kachi kunuchi kukanyama kulinga maliji eswe a shimbi yino anasonewa mu mukanda uno, hanga nwivwe woma wa jina lino lia ulemu, lia kukolesa mwongo, YEHOVA ZAMBI YENU,

⁵⁹ Yehova makapwisa lamba lienu chuma cha kukomwesa, ni lia ana jenu, te lamba linene lia kulindujoka, lia weji upi wa kulindujoka.

⁶⁰ Iye makaneha nawa kuli yenu misongo yeswe ya Engitu, nwayivwilile woma, muyikakwata kuli yenu.

⁶¹ Weji weswe ni lamba lieswe nawa, kuliasonewene mu mukanda wa shimbi yino, Yehova makalineha kuli yenu ndo munukakuwa.

⁶² Chipwe nwapwile mbunga ngwe matongonoshi a mwilu makanuhichika piliwiji, mumu kunwapanjikile ku liji lia Yehova Zambi yenu.

⁶³ Chizechene ngwe Yehova wawahililile hali yenu mukunulinga yipema, mukunwokesa, chocho Yehova makawahilila hali yenu mukunukuwisa, mukunwonwona, makanuchangumuna ku chifuchi nunayi kuzuka.

⁶⁴ Yehova makanumwanga hakachi ka mavungu eswe, katuke ku songo limwe lia hashi ndo ku songo likwo lia hashi. Munukavumbikako tuzambi tweka, kunwatunyingikine chipwe yenu, chipwe tulamba twenu, te mitondo ni mawe.

⁶⁵ Hakachi ka mavungu aze kunuchi kawana uhwimino, chipwe ku yiliato yenu. Yehova makanwahako mbunge ya kuchikima, ni kufuwalala cha meso, ni chinyengo cha mbunge.

⁶⁶ Utoji wa kufwa muukapwa ku meso jenu. Munukevwa mwongo ufuku ni mwalwa, munwamba ngwenu, Hanji mutufwa.

⁶⁷ Ha chimene munwamba ngwenu, Kachi chingoloshi! Mba ha chingoloshi munwamba ngwenu, Kachi chimene! Mumu ha mwongo wa mbunge jenu munukawivwa, mumu ha yuma munukamona ni meso jenu.

⁶⁸ Yehova makanuhetesa nawa ku Engitu mu mato, ku jila nambile kuli yenu ngwami, Kunuchi kayimona nawa nichimwe. Mba, kuli akwa kole jenu munukalikulisa tupinji a malunga, ni tupinji a mapwo, niumwe makanulanda, wakuhi.