Shimbi 27 - MUKANDA USANDU WA ZAMBI 1975

¹ Mose ni makulwana a Izalele yamba atu ngwo, Fungenu maliji eswe a shimbi ngunanwambe musono.

² Mba ha tangwa munukazauka Yordau, ku chifuchi Yehova Zambi yenu ananwehecho, nukalimike mawe anene, nukaashingule ni ndambo.

³ Nukasonekeho maliji eswe a shimbi yino, te ha kuzauka, ni kunjila mu chifuchi Yehova Zambi yenu ananwehecho, chifuchi kuze kunokela yamwa ni wuchi, ngwe Yehova Zambi ya tulamba twenu anulakenyene.

⁴ Ha kuzauka Yordau nukamike mawe ano ha mulundu wa Epale ngunanwambe musono, nukaashingule ni ndambo.

⁵ Nukatungileko Yehova Zambi yenu chilumbilo cha mawe, kanda nukalambako chikungo cha utale.

⁶ Nukatungile Yehova Zambi yenu chilumbilo cha mawe a muwundu, nukalambwileho milambu ya kulumba kuli Yehova Zambi yenu.

⁷ Nukalambule milambu ya sambukila, nukalileko, nukawahilile kumeso ja Yehova Zambi yenu.

⁸ Nukasoneke ha e mawe maliji eswe a shimbi yino, akalumbunuke pundu.

⁹ Ni Mose, ni asasendote A-Levi, yahanjika ni atu eswe a Izalele ngwo, Enu A-Izalele holenu, nupanjike. Musono hinwapwa atu a Yehova Zambi yenu.

¹⁰ Kashika, zeyenu ku liji lia Yehova Zambi yenu, nulinge maliji jenyi a shimbi ni yiyulo yenyi, ngunanwambeyo musono.

¹¹ Mose yahana shimbi kuli atu ha tangwa lize liene ngwenyi,

¹² Ha kuzauka Yordau, wano makamana ha mulundu wa Ngerizime mukuwahisa atu; ni Simeone, ni Levi, ni Yunda, ni Isaka, ni José, ni Mbenjamine.

¹³ Mba wano makamana ha mulundu wa Epale mukushinga; ni Rupene, ni Ngate, ni Ashe, ni Zapulone, ni Ndane, ni Napatali.

¹⁴ A-Levi akumbulule kuli malunga eswe a Izalele ni liji linene ngwo,

¹⁵ Kashingiwa mutu yoze masonga kaponya, chipwe mazuzulula umwe, chizelwokeso kuli Yehova, yilinga ya moko ja chilangaji, nikumumika ku tenga. Atu eswe até ngwo, Amene.

¹⁶ Kashingiwa mutu yoze malelesa tato hanji naye. Atu eswe até ngwo, Amene.

¹⁷ Kashingiwa mutu yoze matutulula njiza ya mukwo. Atu eswe até ngwo, Amene.

¹⁸ Kashingiwa mutu yoze mapiangula kapuputa mu jila. Atu eswe até ngwo, Amene.

¹⁹ Kashingiwa mutu yoze mahengesa upatwilo wa chilambala, ni wa shiwa, ni wa twamishi. Atu eswe até ngwo, Amene.

²⁰ Kashingiwa mutu yoze mapomba ni pwo lia tato, mumu te iye hafukula pwo lia tato. Atu eswe até ngwo, Amene.

²¹ Kashingiwa mutu yoze mapomba ni kashitu mweswawo. Atu eswe até ngwo, Amene.

²² Kashingiwa mutu yoze mapomba ni ndumbwenyi, mwana wa pwo wa tato, chipwe mwana wa pwo wa naye. Atu eswe até ngwo, Amene.

²³ Kashingiwa mutu yoze mapomba ni naye-weno. Atu eswe até ngwo, Amene.

²⁴ Kashingiwa mutu yoze malamba mukwo ku tenga. Atu eswe até ngwo, Amene.

²⁵ Kashingiwa mutu yoze matambula chindo hanga ashihe mukwa kusamba. Atu eswe até ngwo, Amene.

²⁶ Kashingiwa mutu yoze keshi kukolesa maliji a shimbi yino mukwalinga. Atu eswe até ngwo, Amene.