Shimbi 26 - MUKANDA USANDU WA ZAMBI 1975

¹ Muze muheta mu chifuchi Yehova Zambi ye anakwehecho chihinga, uchizuke, ni kutwamamo,

² Ukande mbuto yitangu ya ku mbuto yeswe muyima hashi, mukunga ku chifuchi Yehova Zambi ye anakwehecho, uyise mu mutonga, uye kuze Yehova Zambi ye matongola kusa jina lienyi.

³ Uhete kuli sasendote mapwa ha matangwa aze, wambe kuli iye ngwe, Ngunatayiza musono kuli Yehova Zambi ye ngwami, Hinaheta mu chifuchi Yehova walishingile kuli tulamba twetu kutwahacho.

⁴ Sasendote achize we mutonga ku kwoko lie, autumbike kulutwe lia chilumbilo cha Yehova Zambi ye.

⁵ Ukumbulule kumeso ja Yehova Zambi ye ngwe, Kulwami wapwile Ka-Seria, te kanambe kutoka. Yapalumukina ku Engitu, yatwamako ni atu akehe. Kwenako yapwa vungu linene, lia ndundo, lia atu anji.

⁶ A-Engitu yatulinga chipi, yatuyindamisa, yatushata upinji ukalu.

⁷ Yituteta kuli Yehova Zambi ya tulamba twetu, Yehova yevwa liji lietu, yatala luyinda wetu, ni kuhondangana chetu, ni lamba lietu atumwesenelio.

⁸ Yehova yatuchiza mu Engitu ni kwoko lia ndundo, ni kwoko lia kwolola, ni yuma yakola mwongo, ni yilayi, ni yikomokeso.

⁹ Yatuneha kuno, yatwaha chifuchi chino, chifuchi kuze kunokela yamwa ni wuchi.

¹⁰ Kutala! Haliapwila, twaneha mbuto yitangu ya ku mavu, yenu Yehova nwatwahayo. Nuyitumbike kumeso ja Yehova Zambi yenu, nuwayile kumeso ja Yehova Zambi yenu.

¹¹ Nukawahilile ni yeswe yipema Yehova Zambi yenu hananweheyo, ni akwa mazuwo jenu, ni yenu, ni Ka-Levi, ni njize yoze uli mukachi kenu.

¹² Ha kumana kuhana yihanda yeswe ya ku kumi ya kwoka chenu ha mwaka wamuchitatu, wenawo mwaka wa kuhana yihanda ya ku kumi, nukachihane kuli A-Levi, ni kuli njize, ni kuli shiwa, ni kuli twamishi, hanga akalite mu yihunda yenu, akakute.

¹³ Nukambe kumeso ja Yehova Zambi yenu ngwenu, Hitwachiza yuma yisandu ku mazuwo jetu, hitwayihana kuli A-Levi, ni kuli njize, ni kuli shiwa, ni kuli twamishi, nikulita ni liji lino lieswe lia shimbi nwatwambile. Kutwatangwile maliji jenu a shimbi niamwe, chipwe kutwaavulamine.

¹⁴ Kutwayilile ha kulila afu, chipwe kutwachijile niyimwe shimbu tuchili a luchisa, chipwe kulambula yimwe kuli afu. Hitwapanjika ku liji lia Yehova Zambi yetu, hitwalinga nikulita ni yeswe nwatwambile.

¹⁵ Mwilu amu nwatwama mu usandu talenu hashi, nuwahise atu jenu A-Izalele, ni mavu nawa nwatwaho, ngwe nwalishingile kuli tulamba twetu, chifuchi kuze kunokela yamwa ni wuchi.

¹⁶ Yehova Zambi yenu wanwamba musono nulinge yiyulo yino ni upatwilo uno, kashika nuyifunge ni kuyilinga ni mbunge jenu jeswe, ni alma jenu jeswe.

¹⁷ Nwalishika ni Yehova musono ngwenu, Yehova iye Zambi yetu, kumutwenda mu majila jenyi eswe, ni kufunga yiyulo yenyi ni maliji jenyi a shimbi, ni upatwilo wenyi, mukupanjika ku liji lienyi.

¹⁸ Yehova halishika ni yenu musono nukapwe atu a mbala a iye, ngwe anulakenyene, hanga nufunge maliji jenyi eswe a shimbi.

¹⁹ Akanunangamise helu lia mavungu eswe waatangile iye, ni uhaliso, ni lufuma, ni ulemu, hanga nukapwe atu asandu a Yehova Zambi yenu, ngwe ambile iye.