Shimbi 25 - MUKANDA USANDU WA ZAMBI 1975

¹ Kachi kulihangujola chimwe muchipwa hakachi ka malunga, maheta ha lwaza mba ngaji maapatwila, asambise mukwa ululi, ahise chingulungulu.

² Mba, nyi chingulungulu hatela kumulamba, ngaji amupombese, amulambe kwe kumeso ja ngaji nikulita ni ungulungulu wenyi, alule mijiji.

³ Amwehe makumi awana a mijiji, kanda ayihiana, kuchina nyi mayihiana, nikumulamba mijiji yinji yahiana, munutala mukwenu ni kaleleso.

⁴ Kanda nukasa kata ku kanwa lia ngombe shimbu mazungula mbuto.

⁵ Kachi asongo-ni-mutu matwama hamwe, umuwika mafwa, keshi mwana wa lunga, pwo lia mufu kanda ahichika usoko mukuya ulo kuli chilambala. Nyalienyi anjile kuli iye, amumbate kupwa mukwo-pwo, alinge kuli iye milimo ya nyalienyi.

⁶ Kapula-jimo yoze masema ahinge jina lia yayo wafwile, kuchina jina lienyi mulikajimuka mu Izalele.

⁷ Kachi lunga kazangile kumbata nyalienyi, nyalienyi aye ku chikolo kuli makulwana, ambe ngwenyi, Nyali kasolo kusangwila yayo jina mu Izalele. Kazangile kulinga kuli yami milimo ya nyali.

⁸ Mba makulwana a limbo amutambike, ahanjike nenyi. Nyi makolesaho ngwenyi, Chichi kumumbata,

⁹ pwo lia yayo ahete kuli iye kumeso ja makulwana amuzule luhaku ku kulu lienyi, afwile mate ku meso jenyi, akumbulule ngwenyi, Chocho achilinge kuli lunga yoze kasolo kwokesa akwa zuwo ja yayo.

¹⁰ Amuluke jina mu Izalele ngwo, Zuwo lia mutu anamuzulu luhaku wenyi.

¹¹ Nyi malunga aali malitachika, mba pwo lia umwe mahetako akapulule mukwo-lunga ku kwoko lia mutu yoze anamulambe, mba mazoza kwoko lienyi amukwate ku mahienyi,

¹² numutete kwoko, meso jenu kanda evwa keke.

¹³ Kanda nupwa ni pezu jeka ni jeka mu njeke jenu, jimwe jinene, jimwe jikepe.

¹⁴ Kanda nupwa ni njongo jeka ni jeka mu mazuwo jenu, jimwe jinene, jimwe jikepe.

¹⁵ Nupwe ni pezu jinalite, ja ululi; nupwe ni njongo jinalite, ja ululi; hanga matangwa jenu oke mu chifuchi Yehova Zambi yenu ananwehecho.

¹⁶ Mumu mweswe malinga yuma yipwa hoho, te yuma ya uhenge, hapwa chizelwokeso kuli Yehova Zambi yenu.

¹⁷ Iwulukenu chize anulingile Amaleke mu jila, yenu te munuchikatuka ku Engitu,

¹⁸ ngwe anupatwijile mu jila, yalamba akwenu waze asalile kunyima, eswe anakokoloka kunyima yenu; enu te nunachilezumuka, nunachivu yikatalo, iye kevwilile Zambi woma.

¹⁹ Kashika ngwami, Muze hanuhwimisa kuli Yehova Zambi yenu kuli akwa kole jenu eswe ananujingilika, mu chifuchi Yehova Zambi yenu ananwehecho, chikapwe chihinga, nukachizuke, kanda nuvulama kujimuna jina lia Amaleke kwishi lia lilu.