Shimbi 24 - MUKANDA USANDU WA ZAMBI 1975

¹ Lunga ha kumbata pwo, nyi kamuwahilile, mumu te hawana chuma cha sonyi muli iye, amusonekene mukanda wa kulakula, amwehewo mu kwoko lienyi amukatwise ku zuwo lienyi.

² Mba ha kukatuka ku zuwo lienyi, kanahase kuya ulo kuli lunga weka.

³ Kachi lunga lienyi wamuchiali mamuvwila kole nikumusonekena mukanda wa kulakula, mamwahawo mu kwoko lienyi ni kumukatwisa ku zuwo lienyi, chipwe kachi lunga lienyi wamuchiali mafwa,

⁴ lunga lienyi mutangu, wamukatwishile, kanda akamumbata cheka nawa kupwa mukwo-pwo muze te halichisa, mumu acho chizelwokeso kumeso ja Yehova. Kanda nuvulumwisa chifuchi chize Yehova Zambi yenu ananwehecho chikapwe chihinga.

⁵ Lunga nyi hachimbata pwo, kanda atuhuka ni chizavu cha tujita, chipwe kanda amutwika milimo niyimwe, akatwame tuhu ku mahio mwaka umuwika, akawahise mukwo-pwo yoze hambata.

⁶ Mutu niumwe kanda achiza mawe a kucheka no wunga, chipwe liwe lia helu kupwa chifungo, mumu kanachiza mwono wa mutu autenge chifungo.

⁷ Kachi mawana mutu uneyi umwe wa kuli usoko wenyi, wa A-Izalele, mamupwisa ngwe ndungo, hanji mamulanjisa; mwe mwiji afwe. Chocho munukatwisa che chipi mukachi kenu.

⁸ Nukanyame ni musongo wa mbumba, nutale kanawa, nulinge nikulita ni yeswe manulongesa kuli asasendote, A-Levi, ngwe hinaamba, chocho nukanyame kulinga.

⁹ Iwulukenu chize alingile Yehova Zambi yenu kuli Miriame mu jila, muze te munuchikatuka ku Engitu.

¹⁰ Ha kuhana kongo lieswalio kuli mukwenu, kanda unjila mu zuwo lienyi nikuchiza chifungo chenyi.

¹¹ Umane haze, mba mwe mutu watambula kongo kuli yena matuhuka nikukunehena che chifungo.

¹² Ahoze nyi iye chiswale, chifungo chenyi kanda chisala ni yena ufuku,

¹³ ukamuhilwishile chifungo ha kutoka cha tangwa, apombe ni mazalo jenyi, akuwahise, mba muchipwa ululi kuli yena kumeso ja Yehova Zambi ye.

¹⁴ Kanda numwesa lamba mukwa milimo wa kufweta, chiswale, mukwa kuhona, apwe wa kuli akwenu, apwe wa kuli njize waze ali mu chifuchi chenu, mu yihunda yenu.

¹⁵ Numwehe fweto yenyi tangwa ha tangwa, shimbu tangwa kanda litoka mumu iye chiswale, kanaselako mbunge yenyi, kuchina mateta kuli Yehova mumu hali yenu, mba muchipwa mulonga kuli yenu.

¹⁶ Kanda ashiha yisemi mumu hali ana, chipwe kanda ashiha ana mumu hali yisemi. Ashihe mutu ni mutu ha mulonga wenyi mwene.

¹⁷ Kanda nuhengesa upatwilo wa chilambala, chipwe wa shiwa, chipwe kanda nuchiza mazalo a twamishi kupwa chifungo,

¹⁸ alioze nwiwuluke ngwami, Nwapwile tupinji mu Engitu, Yehova Zambi yenu yanukulako, kashika ngunanwambe nulinge chuma chino.

¹⁹ Ha kucha mbuto jenu mu munda, nyi munuvulama chichita chimwe mu munda, kanda nuya nawa nuchisake, chikapwe cha yilambala, cha shiwa, cha twamishi, hanga Yehova Zambi yenu akanuwahise mu milimo yeswe ya moko jenu.

²⁰ Ha kuhulula mutondo wenu wa olevwe, kanda nuhuhujola, yikapwe ya yilambala, ya shiwa, ya twamishi.

²¹ Ha kuhela uva ja mu munda wenu wa uva kanda nukahiluka ni kuhuhujola, yikapwe ya yilambala, ya shiwa, ya twamishi.

²² Iwulukenu ngwami, Nwapwile tupinji mu chifuchi cha Engitu. Kashika ngunanwambe nulinge chuma chino.