Shimbi 23 - MUKANDA USANDU WA ZAMBI 1975

¹ Chilema ku mbili jenyi hanji wamuteta ku mahienyi, kanda akanjila mu chikungulwila cha Yehova.

² Mwana wa upangala kanda akanjila mu chikungulwila cha Yehova, ndo ku chisemuko chamuchikumi niumwe wa kuli ana jenyi kanda akanjila mu chikungulwila cha Yehova.

³ Niumwe Ka-Amone, chipwe Ka-Moape, kanda akanjila mu chikungulwila cha Yehova, ndo ku chisemuko chamuchikumi niumwe wa kuli ayo kanda akanjila mu chikungulwila cha Yehova ku miaka ya mutolo.

⁴ Mumu te o kanunehenene kulia ni meya mu jila muze nwakatukile ku Engitu, nawa mumu te yafweta Mbalau, mwana Mbeore wa ku Petore, ya mu Mesopotamia, alimike ni yenu nikunushinga.

⁵ Hindu, Yehova Zambi yenu katayile kupanjika kuli Mbalau, alioze Yehova Zambi yenu yalumuna shingo likapwe chiwape cha yenu mumu te Yehova Zambi yenu kanuzanga.

⁶ Kanda nufupa apwe ni sambukila, chipwe hanga awahe matangwa jenu eswe a mutolo.

⁷ Kanda nuvwila kole Ka-Endome mumu iye mukwenu. Kanda nuvwila kole Ka-Engitu mumu yenu nwapwile yilambala mu chifuchi chenyi.

⁸ Ana jo makasemuka ku chisemuko chamuchitatu kumakanjila mu chikungulwila cha Yehova.

⁹ Muze munutuhuka nikwasa jita ni akwa kole jenu, mba nukalifunge ku yuma yeswe yipi.

¹⁰ Kachi mukupwa mukachi kenu lunga umwe kapemene mumu ha mukunda wa chuma chamuwana ha ufuku, atuhuke haze lia chilombo, kanda anjila muchima lia chilombo.

¹¹ Ha chingoloshi, akasane meya; ha kutoka cha tangwa iye anjile muchima lia chilombo.

¹² Nupwe ni chihela nawa haze lia chilombo, munutuhukilako.

¹³ Hakachi ka yitwa yenu mbatenu katemo mba muze munuya ku musenge munufula nako kawina nikushikila yipi yenu.

¹⁴ Mumu Yehova Zambi yenu kakwenda mukachi ka chilombo enenu, mukunupulula, mukukunjika kumeso jenu akwa kole jenu. Kashika chilombo chenu chikapwe chisandu, kanda amonamo chuma nichimwe cha sonyi kuchina manumba nyima.

¹⁵ Nyi ndungo machina kako, meza kuli yenu, kanda numukunjika kuli kako.

¹⁶ Iye akatwame ni yenu, mukachi kenu kweswako iye matongola ku chimwe chihunda cha yenu kwamuwahila iye kanawa, kanda numumwesa lamba.

¹⁷ Kanda kupwa chikoi kuli ana-mapwo ja A-Izalele, chipwe kanda kupwa mukwa utumwa kuli ana-malunga ja A-Izalele.

¹⁸ Fweto ya chikoi, chipwe ndando ya kawa kanda nuyinjisa mu zuwo lia Yehova Zambi yenu ha chilakenyo nichimwe, mumu te yeswe ni yiali kuyapwa yizelwokeso kuli Yehova Zambi yenu.

¹⁹ Kanda nuhana makongo kuli mukwenu mukutambula mbwezo, chipwe mbwezo ya mbongo, chipwe mbwezo ya kulia, chipwe ya yuma yeswayo nwahana mukutambula mbwezo.

²⁰ Munuhasa kuhana makongo kuli tundaka nutambule mbwezo. Alioze kuli mukwenu kanda nuhana makongo mukutambula mbwezo, hanga Yehova Zambi yenu akanuwahise ni yeswe nunalingi ni moko jenu, mu chifuchi nunayi mukuzuka.

²¹ Ha kulakenya chilakenyo chimwe kuli Yehova Zambi yenu, kanda nulaluka kuchilinga, mumu Yehova Zambi yenu kumakanufwetesacho, mba muchipwa mulonga kuli yenu.

²² Nyi munuchina kulakenya kuchichi kupwa mulonga kuli yenu.

²³ Nukanyame, nulinge ngwe nwahanjikile ni makanwa jenu nikulita ngwe nwalakenyene kuli Yehova Zambi yenu, mulambu wa mbunge, nwalakenyene ni makanwa jenu.

²⁴ Ha kunjila mu munda wa uva wa mukwenu munuhasa kulia uva nikukuta ngwe munuzanga, alioze kanda nusa niyimwe mu yikwachilo yenu.

²⁵ Ha kunjila mu munda wa mbuto wa mukwenu munuhasa kuhulula mitwe ni moko jenu, alioze kanda misako kwengo ku mishachi ya mbuto ya mukwenu.