Shimbi 22 - MUKANDA USANDU WA ZAMBI 1975

¹ Nyi mumona ngombe ya mukwenu matoka, hanji panga yenyi, kanda wakalishila mbunge ye. Ukaahilwise kuli mukwenu.

² Kachi mukwenu keshi hehi ni yena, hanji kwamunyingikine, Ukahetese mwe chimuna ku mahienu mba atwame ni yena ndo mukwenu mamufupa, umuhilwishileye nawa.

³ Chocho ulinge ni chimbulu chenyi; chocho ulinge ni mazalo jenyi; chocho ulinge ni yuma yeswe yatoka kuli mukwenu, yamutoka iye, wayiwana, kanda ukalisa mbunge ye.

⁴ Kanda utala chimbulu cha mukwenu, hanji ngombe yenyi malimbuka hashi, yena mumukalishila mbunge. Chamwenemwene umukwase kwakatwisa nawa.

⁵ Pwo kanda azala mazalo a lunga, chipwe lunga kanda azala hina lia pwo, mumu mweswawo malinga chocho kapwa chizelwokeso kuli Yehova Zambi yenu.

⁶ Kachi mu jila munuwana chaswa cha kajila kumeso jenu, hanji ku mutondo umwe, hanji hashi, chili ni ana hanji monda, naye te kanautama hali ana hanji ha monda, kanda nuchiza naye hamwe ni e ana.

⁷ Chanutamba kwecha mwe naye, alioze munuhasa kulichijila e ana; hanga nutwame kawape, hanga nwokese matangwa jenu.

⁸ Ha kutunga mazuwo aha, munutunga yisakala ha fulumba jenu, kuchina mununeha mutonga wa manyinga ha mazuwo jenu ha kuhotokaho mutu.

⁹ Kanda nukuwa mbuto jiali jeka mu minda yenu ya uva kuchina munuchisa mbuto yeswe, te ye mbuto nwakuwa hamwe ni kwoka chayo mu minda yenu ya uva.

¹⁰ Kanda nuchipa munda ni sharua ni ngombe ni chimbulu a kukasa hamuwika.

¹¹ Kanda nuzala mazalo a hina lia kuchinga, lia kuseleka ni wona wa mapanga hamwe ni linyu.

¹² Nukalitongele sapo ku mapula awana a mahina jenu nwakulifuka no.

¹³ Kachi lunga mambata pwo, manjila kuli iye, mamuvwila kole,

¹⁴ mba mamusuma yuma ya sonyi, maneha hali iye lufuma mupi ngwenyi, Nambachile yono pwo, ha kukundama kuli iye chawanyine yinyingi ya kulumbununa ngwe iye kanda apomba ni lunga.

¹⁵ Mba tato ya mwe pwo ni naye ande yinyingi ya kulumbununa ngwe iye te kanda apomba ni lunga ayisolole kuli makulwana a limbo ku chikolo chalio.

¹⁶ Tato ya mwe pwo ambe kuli makulwana ngwenyi, Nahangishile mwanami kuli yono lunga, kupwa mukwo-pwo, hamuvwila kole.

¹⁷ Kutala! Hamusuma yuma ya sonyi ngwenyi, Chawanyine mwané wa pwo uli ni yinyingi ngwe kanda apomba ni lunga, hindu yinyingi ya mwanami yino. Azazulule hina kumeso ja makulwana a limbo.

¹⁸ Makulwana a limbo lize atwale mwe lunga amulambe.

¹⁹ Amufwetese kulakaji lia shekele ja prata, ajihane kuli tato ya mwe mwana, mumu te iye haneha lufuma mupi kuli mwana-pwo mu Izalele, yoze te kanda apomba ni lunga, apwe mukwopwo. Kanda akamwecha matangwa jenyi eswe.

²⁰ Alioze nyi chino chamwenemwene, te kawanyine kuli mwana-pwo yinyingi ngwe kapombele ni lunga,

²¹ ahetese mwana-pwo ku chikolo cha zuwo lia tato, malunga a limbo lienyi amwase mawe, hanga afwe, mumu te iye hanalingi uhepuke mu Izalele, hapwa chikoi mu zuwo lia tato. Chocho munukatwisa che chipi mukachi kenu.

²² Kachi mawana lunga te hanapombo ni pwo lia uto, eswe ni aali afwe, ni lunga wapomba ni mwe pwo ni mwe pwo nawa. Chocho munukatwisa che chipi mukachi ka A-Izalele.

²³ Kachi kwali umwe mwana-pwo, kanda achipomba ni lunga, anamutende kuli lunga, nyi lunga weka mamuwana mu limbo, mapomba nenyi,

²⁴ nuhetese eswe ni aali ku chikolo cha lie limbo, nwaase mawe hanga afwe, ni mwana-pwo mumu te katetele, se mu limbo ali, ni mwe lunga mumu te halelesa pwo lia mukwo. Chocho munukatwisa che chipi mukachi kenu.

²⁵ Alioze nyi lunga mawana mu yambu mwana-pwo wa kutenda, mba mwe lunga mamukwata ni tachi, mapomba nenyi, mba lunga wapomba nenyi wika afwe.

²⁶ Alioze kanda nulinga chuma kuli mwana-pwo, kumwapwile muli mwana-pwo mutonga wa kutela kufwa. Mumu ngwe mutu makatukila mukwo nikumushiha chocho chapwa chikuma chino;

²⁷ mumu yamuwana mu yambu, mwana-pwo wa kutenda yateta, kukwapwile niumwe kumulamwina.

²⁸ Kachi lunga mawana mwana-pwo, kanda achipomba ni lunga, kamutendele, mamukwata nikupomba nenyi, nyi maawana,

²⁹ mwe lunga wapomba nenyi ahane kuli tato ya mwana-pwo makumi atano a shekele ja prata, apwe mukwo-pwo, mumu te hamulelesa. Kanda akamwecha matangwa jenyi eswe.

³⁰ Lunga kanda ambata pwo lia tato, kanda akafukula pwo lia tato.