Shimbi 21 - MUKANDA USANDU WA ZAMBI 1975

¹ Kachi mu chifuchi ananwehe kuli Yehova Zambi yenu nuchizuke, mawanamo umwe hanamushihi, anapombo mu yambu, kanyingikine mutu wamushihile,

² makulwana jenu ni ngaji jenu matuhuka, meseka chize kuli mutu amushihile ndo ku membo anamujingilika.

³ Limbo Uli hakamwihi ni mutu amushihile, makulwana te a limbo lize akwate chimbembe cha chihwo, kalingile nenyi milimo, kamulemene kanga.

⁴ Makulwana a limbo lize apalumwise mwe chimbembe mu chikulo Chikwete meya anapalika, te kanda achichipa, chipwe kukuwamo mbuto, ka, amakwineko kota ya chimbembe, mwe mu chikulo.

⁵ Asasendote, ana a Levi akundame, mumu Yehova Zambi yenu hanaatongola, kumuvumbika, mukuwahisa ni jina ha Yehova, mba nikulita ni liji lio chocho akapatule kulihangujola cheswe ni kulilamba cheswe.

⁶ Makulwana eswe a limbo lili hakamwihi ni mutu yoze ashihile, akasanyine ku moko jo helu lia chimbembe, kota yenyi ayimakwine mu chikulo.

⁷ O akumbulule ngwo, Moko jetu kamwangine manyinga ano, chipwe meso jetu kachimwene.

⁸ Yehova, konekenenu atu jenu A-Izalele, yenu nwaakulile. Kanda nutayiza manyinga a kusamba kusala mukachi ka atu jenu A-Izalele. Mba kumaakonekena mulonga wa manyinga.

⁹ Chocho munukatwisa manyinga a kusamba mukachi kenu, ha kulinga chize chinate kumeso ja Yehova.

¹⁰ Muze munutuhuka mukwasa jita ni akwa kole jenu, muze Yehova Zambi yenu haakunjika ku moko jenu funge,

¹¹ mba mumona hakachi ka funge umwe pwo chenge, unamuzange, unazange kumumbata,

¹² umuhetese ku zuwo lie, iye atewule mutwe wenyi, atende yala yenyi.

¹³ Ambile mazalo jenyi a ufunge wenyi, atwame mu zuwo lie, alile tato ni naye kakweji wa muwundu. Kulutwe, unjile kuli iye, umumbate, iye apwe mukwenu-pwo.

¹⁴ Nyi kwawahile nenyi, mba umweche aye kweswako mazanga, alioze kanda umulanjisa mbongo, kanda ulinga nenyi ngwe apwa kapinji, mumu te wamulelesa.

¹⁵ Kachi lunga uli ni mapwo aali, anazange umwe, anavwila kole umwe, kachi hamusemena ana, eswe ni aali, ni yoze iye anamuzange ni yoze iye anamuvwila kole, hanji mukulwana mapwa wa yoze anamuvwila kole,

¹⁶ mba muze maswanyisa ana jenyi upite wenyi kanda apwisa kulutwe mwana wa pwo yoze amuzanga nikumupwisa iye mutangu se mwana wa yoze kamuzangile iye mukulwana.

¹⁷ Alioze até mwe mutangu, mwana wa yoze iye anamuvwila kole ha kumwaha yihanda yiali ya yeswe ali nayo, mumu iye uputukilo wa ngolo jenyi, chiyulo cha mutangu nichenyi.

¹⁸ Kachi mutu mapwa ni mwana, mukwa upama, mwana wa kukolema, kazeyele ku liji lia tato, hanji ku liji lia naye, chipwe mamulamba kechi kupanjika kuli ayo.

¹⁹ Tato ni naye amukwate, amuhetese kuli makulwana a limbo lienyi, ndo ku chajilo cha chihela chenyi.

²⁰ O ambe kuli makulwana a limbo lienyi ngwo, Yono mwanetu iye mukwa upama, wa kukolema, kazeyele ku liji lietu, iye chikuhukila, iye mukwa kuzengewa.

²¹ Malunga eswe a limbo lize amwase mawe afwe, chocho munukatwisa chipi mukachi kenu, A-Izalele eswe evwe, apwe ni woma.

²² Kachi mutu mavulumuna mulonga unate ni kufwa, kufwa chenyi kumusukika ku mutondo,

²³ mujimba wenyi kanda usala ku mutondo ufuku weswe. Numufunde tangwa lioliene, mumu mutu wasukama ku mutondo kapwa shingo lia Zambi, kuchina munuchisa chifuchi chenu Yehova Zambi yenu ananwehecho chikapwe chihinga.