Shimbi 20 - MUKANDA USANDU WA ZAMBI 1975

¹ Muze munutuhuka mukwasa jita ni akwa kole jenu, ha kumona tuvwalu, ni matemba, ni atu amwe ananuhiana ha kwoka, kanda nwavwila woma; mumu Yehova Zambi yenu kwali hamwe ni yenu, iye wanuchijile mu chifuchi cha Engitu.

² Ha kuheta ku jita, sasendote akakundame, akahanjike ni atu,

³ ambe kuli ayo, ngwenyi, Enu A-Izalele, ivwenu, musono nunakundama mukwasa jita ni akwa kole jenu, mbunge jenu kanda jilezumuka, chipwe kwivwa woma ka, chipwe kanda nuchikima, chipwe kanda nususuka mumu hali ayo;

⁴ mumu Yehova Zambi yenu anayi hamwe ni yenu, mukunwashila jita ni akwa kole jenu mukunulamwina.

⁵ Yilolo ahanjike ni atu ngwo, Lunga muka uliko hatunga zuwo liaha, kanda achilitumbikila? Ahiluke ku zuwo lienyi, kuchina mafwa ku jita, mba mutu weka malitumbikila.

⁶ Lunga muka hatumba munda wa uva, kanda achilia mbuto yawo? Ahiluke ku zuwo lienyi, kuchina mafwa ku jita mba mutu weka malia mbuto yawo.

⁷ Lunga muka hatenda pwo, kanda achimumbata? Ahiluke ku zuwo lienyi, kuchina mafwa ku jita mba lunga weka mamumbata.

⁸ E yilolo ahanjike ni atu nawa ngwo, Lunga muka unevu woma, mbunge yenyi yinalezumuka? Ahiluke ku zuwo lienyi, kuchina mbunge ja akwo mujilela ngwe mbunge yenyi.

⁹ Ha kumanununa kuhanjika ni e atu, yilolo atongole miata a yizavu apwe helu lia atu.

¹⁰ Ha kukundama ku limbo limwe mukwasa jita nalio, nukalilweze sambukila.

¹¹ Nyi manukumbulula ni sambukila nikunwazulwila, mba atu eswe alimo akapwe ngamba jenu akanuvumbike.

¹² Ahoze nyi kasolo kuwana ni yenu, ahoze mazanga kwasa jita ni yenu, nwaseleke.

¹³ Ha kwakunjika ku moko jenu kuli Yehova Zambi yenu nukalambe malunga jamo eswe ni katana.

¹⁴ Hindu, mapwo ni ana akepe, ni yimuna, ni yeswe yili mu limbo, te upite wamo weswe, nukahchijile yenwene, mba nukalie upite wa akwa kole jenu, Yehova Zambi yenu ananwehewo.

¹⁵ Chocho nukalinge ku membo eswe ali kusuku chikolo ni yenu, hi membo ko a mavungu ano.

¹⁶ Ahoze membo a atu ano Yehova Zambi yenu ananweho apwe chihinga, kanda nukafunga niumwe wa mwono wakuhwima mwiku,

¹⁷ ahoze nukaakuwise liakulu, ni A-Hete, ni A-Amore, ni A-Kanana, ni A-Perize, ni A-Hevwe, ni A-Yepushe, ngwe anwambile Yehova Zambi yenu;

¹⁸ kuchina manulongesa kwimbulula yizelwokeso yo yeswe, o hanayilingi ku tuzambi two, chocho munuvulumuna Yehova Zambi yenu.

¹⁹ Ha kuseleka limbo matangwa anji, nikwasa nalio jita hanga nukalikumbe, kanda nwonwona mitondo yalio ha kuyilamba ni njimbu, mumu munuhasa kuhako. Kanda nuyipakula. Mutondo wa mu yambu te mutu nyi? Nukase nawo jita?

²⁰ Mitondo wika nunayinyingika hi ya kulia ko, nukayionwone, nikuyipakula, nukayitunge yipanga ya kwasa nayo jita ni limbo lize ndo nwalikumba.