Shimbi 2 - MUKANDA USANDU WA ZAMBI 1975

¹ Henaho yitutewuluka, yituya wenyi wetu mu puya ya jila ya kuya ku Kalunga-lwiji Muchila, ngwe Yehova ambile kuli yami, Yitujinguluka mulundu wa Sere matangwa anji.

² Yehova yamba kuli yami ngwenyi,

³ Hinwajinguluka mulundu uno, miaka hiyacha. Nutewuluke, nutale ku Norte.

⁴ Ambila atu ngwe, Munupalika ku njiza ya akwenu, ana ja Esau akutwama mu Sere, o kumanuvwila woma. Kashika nukanyame chikolo.

⁵ Kanda nulimika no, mumu te chichi kunwaha chifuchi cho, ka, chipwe haze munusa chiliato chenu, mumu hingunahana chihinga mulundu wa Sere kuli Esau.

⁶ Munulanda kulia kuli ayo ni mbongo, nulie. Munulanda nawa meya kuli ayo, nunwe.

⁷ Mumu te Yehova Zambi yenu hananuwahisa ni milimo yeswe ya moko jenu, iye kananyingika kwendangana chenu mu puya yino yinene. Makumi aze awana a miaka Yehova wapwile hamwe ni yenu, kunwahonene nichimwe.

⁸ Chocho yitupalika kuli akwetu, ana ja Esau atwama mu Sere, yitumbila jila ya ku Arapa, ni ya ku Elate, ni ya ku Ezione-Ngebere. Yitutalikisa ku jila ya ku puya ya Moape.

⁹ Yehova yamba kuli yami ngwenyi, Kanda nupinjisa A-Moape chipwe kulimika no ni jita, ka, mumu chichi kunwaha chifuchi cho nuchizuke, mumu hingunahana chihinga Are kuli ana ja Lote.

¹⁰ A-Emi atwamineko miaka kunyima, atu anene, anji, atolomoka ngwe A-Anake.

¹¹ Eno nawa anaavuluka ngwo, A-Refane ngwe A-Anake, alioze A-Moape yaavuluka ngwo, A-Emi.

¹² A-Hore nawa atwamine mu Sere miaka kunyima, alioze ana ja Esau yaahuma, yaakuwisa kumeso jo, ni kwasalakana mu chifuchi cho, ngwe A-Izalele alingile ku chifuchi cha chihinga cho aahelecho kuli Yehova.

¹³ Katukenu haliapwila, nuzauke chitwetwe cha Zerede. Yituzauka chitwetwe cha Zerede.

¹⁴ Katuke ku Kandeshe-Mbania ndo twazaukile chitwetwe cha Zerede kwapwile makumi atatu a miaka ni miaka nake, ndo chisemuko cheswe cha tujita chakuwile ku chilombo, ngwe Yehova alishingile kuli ayo.

¹⁵ Chikwo nawa kwoko lia Yehova yililimika no, mukwaonwona ku chilombo ndo yakuwa.

¹⁶ Chocho muze tujita eswe hakuwa, hafwa hakachi ka atu,

¹⁷ Yehova yahanjika ni yami ngwenyi,

¹⁸ Tangwa lino himunupalika Are, njiza ya Moape.

¹⁹ Ha kuheta hatalanganyi ni ana ja Amone kanda nwapinjisa, chipwe kulimika no, ka; mumu chichi kunwaha chifuchi cha A-Amone nuchizuke, mumu té hingunachihana chihinga kuli ana ja Lote.

²⁰ (Achi nawa anachivuluka ngwo, Chifuchi cha A-Refane, A-Refane atwamineko miaka kunyima, alioze A-Amone anaavuluka ngwo, Zamezumime,

²¹ atu anene, anji, atolomoka ngwe A-Anake; alioze Yehova yaakuwisa kumeso jo, o yaahuma ni kwasalakana mu chifuchi cho,

²² ngwe alingilile ana ja Esau atwamine mu Sere muze akuwishile A-Hore kumeso jo, o yaahuma ni kwasalakana mu chifuchi cho ndo musono.

²³ A-Avimi atwamine mu yihunda ndo ku Ngeza, A-Kafetore yatuhuka ku Kafetore, yaakuwisa ni kwasalakana mu chifuchi cho.)

²⁴ Katukenu, nuye wenyi wenu, nuzauke chikulo cha Amone. Kutala! Hinakunjika mu moko jenu Sahone Ka-Amore, mwanangana wa Heshebone ni chifuchi chenyi. Putukenu kuchizuka, nulimike nenyi mu jita.

²⁵ Tangwa lino munguputuka kukolesa mwongo wenu ni woma wenu atu eswe ali kushi lia lilu lieswe. Mevwa lufuma wa yenu, kumakachikima, ni kupinda mumu hali yenu.

²⁶ Yingutuma mikeji, chize ku puya ya Kedemote kuli Sahone mwanangana wa Heshebone ni maliji a sambukila ngwami,

²⁷ Ngutayize, ngupalike ku chifuchi che. Mungukaula tapalo linene, chichi kuhambuluka chipwe ku chindume, hanji ku chimeso.

²⁸ Ungulanjishile kulia ni mbongo, ngulie, ungwehe meya ni mbongo, ngunwe; chuma chimuwika, ngutayize ngupalike hashi,

²⁹ ngwe angulingile ana ja Esau akutwama mu Sere ni A-Moape akutwama mu Are ndo mungukazauka Yordau ni kunjila mu chifuchi Yehova Zambi yetu anatwehecho.

³⁰ Alioze Sahone mwanangana wa Heshebone katutayijile kupalika kuli iye, mumu te Yehova Zambi yenu yakalisa manyonga jenyi, yamwaha pami mu mbunge yenyi, hanga amukunjike mu moko jenu, ngwe ha tangwa lino.

³¹ Yehova yamba kuli yami ngwenyi, Kutala! Hinaputuka kukunjika kuli yenu Sahone ni chifuchi chenyi. Putukenu kutungamo hanga chifuchi chenyi chikapwe cha yenu.

³² Henaho kwejile mwe Sahone hamwe ni atu jenyi eswe mukwasa jita ni yetu ku Yahaze.

³³ Yehova Zambi yetu yamukunjika kumeso jetu, yitumulamba ni ana jenyi a malunga ni atu jenyi eswo

³⁴ Yitulwa membo jenyi eswe ha mwaka uze. Yitwonwona liakulu membo eswe, ni malunga, ni mapwo, ni ana akepe. Kutwalajhichikile niumwe, chipwe umuwika, ka.

³⁵ Yitutambula yimuna wika akapwe nijetu, hamuwika ni yikumba ya mu membo twalwile.

³⁶ Katuke ku Aroere kwatwama ku kulwa chikulo cha Amone ni ku limbo lili mu chikulo, ndo ku Ngiliate kukwapwile limbo Ukwete yipanga yatolomoka naye tulihone. Yehova Zambi yetu yakunjika yeswe ku moko jetu.

³⁷ Shina ku chifuchi cha ana ja Amone wika kunwakundamineko, te kweswe ku sesa lia lwiji Yapoke ni ku membo eswe a chifuchi cha milundu, kweswako Yehova Zambi yetu yatukanjisa.