Shimbi 19 - MUKANDA USANDU WA ZAMBI 1975

¹ Muze Yehova Zambi yenu matetaho mavungu a chifuchi chino Yehova Zambi yenu kananwehecho, ni yenu hinwaahumamo, hinwatwama mu membo jo, ni mu mazuwo jo,

² nukalihandunwine membo atatu mukachi ka chifuchi chenu, Yehova Zambi yenu ananwehecho, nuchizuke.

³ Nukalilulikile majila ni kupula chifuchi chenu yihanda yitatu Yehova Zambi yenu ananwehecho chihinga, hanga mweswe mukwa kushiha mutu akachinyineko.

⁴ Chikuma cha mukwa kushiha mutu chino, yoze machinyinako akatwame ni mwono. Ngwami, Mweswawo mashiha mukwo kachihalile, te kamuvwilile kole kunyima,

⁵ ngwe muze mutu maya ku usaki hamwe ni mukwo mukuchá kunyi, mazundula kwoko lienyi apakule mutondo ni njimbu, mba ye njimbu muyisokoka mu muhinyi, muyikwata hali mukwo mba mafwa, iye akachinyine ku limbo limwe lia membo aze, atwame ni mwono.

⁶ Kuchina mukwa kukala manyinga mahanga mukwa kushiha, shimbu mbunge yenyi yinachisasaminya, mamuwana, mumu te jila yisuku, mamulamba, mafwa, katelele kufwa, se kamuvwilile kole kunyima.

⁷ Kashika ngunanwambe ngwami, Nukalihandunwine membo atatu.

⁸ Kachi Yehova Zambi yenu matohesa njiza yenu, ngwe iye walishingile kuli tulamba twenu, kachi makanwaha chifuchi cheswe achilakenyene kuhana kuli tulamba twenu,

⁹ kachi munukafunga liji lino lieswe lia shimbi mukulilinga, ngunanwambelio musono, mukuzanga Yehova Zambi yenu, mukwenda miaka yeswe mu majila jenyi, mba nukaliwezeleho membo atatu akwo ku membo ano atatu,

¹⁰ kuchina mamwanga manyinga ja mukwa kusamba mukachi ka chifuchi chenu Yehova Zambi yenu ananwehecho chikapwe chihinga, kuchina mutonga wa manyinga muupwa kuli yenu.

¹¹ Nyi mutu mavwila kole mukwo, mamujikinyina nikumukatukila, mamulamba, mafwa, nyi machinyina ku limbo limwe lia membo aze,

¹² makulwana a limbo lienyi atume nikumusakako, amukunjike ku kwoko lia mukwa kukala manyinga, hanga afwe.

¹³ Meso jenu kanda amuvwila keke, alioze manyinga a mukwa kusamba nukaakatwise mu Izalele, hanga nutwame kawape.

¹⁴ Mu chihinga chize munutambula mu chifuchi Yehova Zambi yenu kananwehe kuzuka kanda nututulula njiza ya mukwenu, yize ajikile kuli malunga a shakulu.

¹⁵ Chela umuwika kanda akatukila mutu mumu ha uhenge umwe, chipwe ha mulonga umwe, ha mulonga weswawo iye mavulumuna; ku makanwa a yela aali, chipwe ku makanwa a yela atatu, chikuma chikakole.

¹⁶ Kachi chela cha uhenge makatukila mutu mweswawo ni kumusuma ngwo, Kavulumuna.

¹⁷ Henaho atu eswe ni aali analihangujola amane kumeso ja Yehova, ni kumeso ja asasendote, ni ngaji waze mapwako matangwa aze.

¹⁸ E ngaji akahule kanawa, nyi chela cha mahuza, nyi hasuma mukwo ni mahuza,

¹⁹ munulinga kuli iye chizechene ngwe iye amba kulinga kuli mukwo, chocho nukakatwise che chipi mukachi kenu.

²⁰ Atu anasalako evwe, apwe ni woma, mba kulutwe kanda akalinga chipi chipwa hoho nawa mukachi kenu.

²¹ Meso jenu kanda evwa keke, mwono ni mwono, liso ni liso, lizo ni lizo, kwoko ni kwoko, kulu ni kulu.