Shimbi 18 - MUKANDA USANDU WA ZAMBI 1975

¹ Asasendote, A-Levi, te munyachi weswe wa Levi, kanda apwa ni chihanda, chipwe chihinga hamwe ni A-Izalele, o alie milambu ya Yehova ya kulumba ni kahia, te chihinga chenyi.

² Kanda apwa ni chihinga nichimwe hakachi ka usoko wo. Chihinga cho, Yehova, ngwe iye wambile kuli ayo.

³ Atu chatamba kuhana kuli sasendote yuma yino, te ya kuli akwa kulambula yitapo, apwe ngombe, apwe panga, ahane kuli sasendote chilama, ni mbangachi jeswe ni jiali ni lufu.

⁴ Mbuto yitangu ya ku mbuto yenu, ni ya ku vinyu yenu, ni ya ku maji jenu, ni wona utangu wa ku mapanga jenu, nukamweheyo.

⁵ Mumu te Yehova Zambi yenu hanamutongola wa ku minyachi yenu yeswe, mukumana nikuvumbika ni jina lia Yehova, neye ni ana jenyi a malunga ku miaka ya mutolo.

⁶ Nyi Ka-Levi makatuka kuze atwama ku yihunda yenu yeswayo ya mu Izalele, maheta ni mbunge yenyi yeswe kuze Yehova matongola,

⁷ mba avumbike ni jina lia Yehova Zambi yenyi, chizechene ngwe akulinga A-Levi-ni-akwo, akumana kumeso ja Yehova.

⁸ O atambule yihanda ya kulita ya kulia, kuweza ku yuma iye mawana ha kulanjisa chihinga chenyi.

⁹ Muze munuheta mu chifuchi ananwehecho Yehova Zambi yenu, kanda nulilongesa kwimbulula yizelwokeso ya mavungu.

¹⁰ Kanda awana kuli yenu niumwe yoze masa mu kahia mwanenyi wa lunga hanji mwanenyi wa pwo, chipwe tahi, chipwe mukwa munanyi, chipwe mukwa kupanda, chipwe chimbanda,

¹¹ chipwe mukwa kujilika, chipwe mukwa mahamba, chipwe mukwa tufutafuta, chipwe mukwa kuhula afu.

¹² Mweswawo malinga yino yuma iye chizelwokeso kuli Yehova; mba mumu ha yitanga yino ya kuzelwokesa Yehova Zambi yenu kanahumu kumeso jenu akwa chifuchi.

¹³ Nupwe angunu ni Yehova Zambi yenu.

¹⁴ Mumu mavungu aze munuhuma, kakupanjika kuli akwa munanyi ni kuli tahi, alioze ha kutwala kuli yenu, Yehova Zambi yenu kanutayijile kulinga chocho.

¹⁵ Yehova Zambi yenu kumakanusolwela profeta umwe hakachi kenu wa kuli usoko wenu, malifwa ni yami. Munukamupanjika iye;

¹⁶ nikulita ni yeswe nwazangile kuli Yehova Zambi yenu mu Horepe, ha tangwa lia chikungulwila ngwenu, Kanda twivwa nawa liji lia Yehova Zambi yetu, chipwe kanda tutala nawa ke kahia kano kanene, kuchina mutufwa.

¹⁷ Yehova yamba kuli yami ngwenyi, Chino anambe, kamba kanawa.

¹⁸ Mungukaasolwela profeta hakachi ka usoko wo, malifwa ni yena; mungusa maliji jami mu kanwa lienyi, iye kumakambulula kuli ayo yeswe mungumwambayo.

¹⁹ Mba mweswawo kechi kapanjika maliji jami iye makahanjika mu jina liami, kumungukamuhulacho.

²⁰ Alioze profeta mweswe mahanjika liji lia kulengumuka mu jina liami, ami chamwambilelio kuhanjika, hanji mahanjika ni jina lia tuzambi tweka, profeta yoze afwe.

²¹ Kachi munwamba mu mbunge jenu ngwenu, Kuchi mutunyingika liji kalihanjikile kuli Yehova?

²² Muze profeta mahanjika ni jina lia Yehova, nyi chuma kuchejile hanji kuchasolokele, che chize Yehova kachihanjikile; mwe profeta hachihanjika cha kulengumuka, kanda manuvwila woma.