Shimbi 17 - MUKANDA USANDU WA ZAMBI 1975

¹ Kanda nutambula chitapo kuli Yehova Zambi yenu, ngombe hanji panga ukwete chipa, hanji chilonda chimwe, mumu acho kuchapwa chizelwokeso kuli Yehova Zambi yenu.

² Kachi hakachi kenu, mukachi ka yihunda yimwe ya yenu Yehova Zambi yenu ananweheyo, mawana lunga, chipwe pwo analingi chipi kumeso ja Yehova Zambi yenu ha kutangula usendo wenyi,

³ te haya ni kuvumbika tuzambi tweka, hatuwayila, chipwe hawayita tangwa chipwe kakweji, chipwe chimwe cha chizavu cha malilu chanwambileyo,

⁴ kachi manwambulwitacho, mba nwachivwa, mba munuhuta kanawa, nyi chamwenemwene, nyi cha pundu, ngwo, Hanalingi chizelwokeso chipwa hoho mu Izalele,

⁵ nuhetese mwe lunga ku yikolo, hanji mwe pwo walinga chipi chino, numwase mawe, afwe.

⁶ Yoze chatamba kufwa, akafwe ku Shindakenyo ya yela aali, hanji atatu. Kanda munushiha ku Shindakenyo ya chela umuwika.

⁷ Moko ja yela aliange kumukwata mukumushiha, mba ha kusula, moko ja atu eswe. Chocho munukatwisa che chipi hakachi kenu.

⁸ Nyi chikuma chimwe muchisoloka chakala naye chakupatula hakachi ka kushiha chimwe ni kushiha chikwo; hanji hakachi ka chikuma chimwe ni chikuma chikwo; hanji kulamba chimwe ni kulamba chikwo; yikuma ya kuhangujola mu yihunda yenu, mba munukatuka nukaye kuze Yehova Zambi yenu matongola,

⁹ nuhete kuli asasendote, A-Levi, kuli ngaji makapwako ha matangwa aze, nukaahule, mba o manulweza liji lia upatwilo.

¹⁰ Nukalinge nikulita ni liji lia upatwilo o manulwezalio kuma kuze Yehova matongola. Nukanyame kulinga nikulita ni yeswe o manulongesa.

¹¹ Nukalinge nikulita ni liji lia shimbi o manulongesalio, nikulita ni upatwilo o manwambulwilawo; kanda nukondoloka ku upatwilo manulwezawo, chipwe ku chindume, hanji ku chimeso.

¹² Mutu yoze malengumuka, kechi kupanjika kuli sasendote akumana kuvumbika kumeso ja Yehova Zambi yenu, hanji kuli ngaji, iye afwe. Chocho munukatwisa che chipi hakachi ka A-Izalele.

¹³ Atu eswe evwe, apwe ni woma, kanda alinga nawa ni kulengumuka.

¹⁴ Muze munukanjila mu chifuchi Yehova Zambi yenu ananwehecho, muze munuchizuka ni kutwamamo, hanji munwamba ngwenu, Mutulitongwela mwanangana wa yetu, ngwe akulinga mavungu eswe anatujingilika.

¹⁵ Chamwenemwene nukalitongwele mwanangana yoze Yehova Zambi yenu mamusakula, umwe wa kuli akwenu nulitongwele akapwe mwanangana wenu. Kandaka kanda anuyula, iye te hi mukwenu ko.

¹⁶ Chino wika, kanda aliokesela tuvwalu, hanji kuhilwisa atu ku Engitu hanga okese tuvwalu, mumu te Yehova wambile kuli yenu ngwenyi, Kunuchi kuhilukila ku jila yize nilimwe tangwa.

¹⁷ Chipwe kanda aliokesela mapwo kuchina mbunge yenyi muyihambuluka, chipwe kanda aliokesela chikolo prata ni oru.

¹⁸ Mba muze hatwama ha ngunja ya wanangana wenyi, iye akalisonekene shimbi yino mu mukanda umwe; machiza maliji ku mukanda uli kumeso ja asasendote, A-Levi.

¹⁹ Mukanda atwame nawo, iye akapwe nikutangamo matangwa eswe matwama ni mwono, alilongese kuvwila woma Yehova Zambi yenyi, mukufunga maliji eswe a shimbi yino, ni yiyulo yino, mukuyilinga,

²⁰ kuchina mbunge yenyi muyilifuza ni atu jenyi, kuchina mahambuluka ku liji lia shimbi nikuya ku chindume, hanji ku chimeso, hanga akokese matangwa jenyi mu wanangana wenyi, neye ni ana jenyi, hakachi ka A-Izalele.