Shimbi 16 - MUKANDA USANDU WA ZAMBI 1975

¹ Nukafunge kakweji ka Ambimbi, nukalie Chizomboka cha Yehova Zambi yenu, mumu ha kakweji ka Ambimbi ha ufuku Yehova Zambi yenu wanuchijile mu Engitu.

² Che Chizomboka nukachilambule chitapo kuli Yehova Zambi yenu cha ku mapanga, hanji cha ku ngombe, kuze Yehova matongola kusa jina lienyi.

³ Kanda nulia nacho mbolo ya futunwiso. Nuchilie ni mbolo kuyishi futunwiso matangwa shimbiliali; te ye mbolo ya luyinda, mumu yinukatuka ku chifuchi cha Engitu nikawashi; hanga nwiwuluke lie tangwa nwakatukile ku chifuchi cha Engitu, matangwa eswe a mwono wenu.

⁴ Kanda yimoneka kuli yenu futunwiso niyimwe mu njiza jenu jeswe matangwa shimbiali. Chipwe ya ku yifwo, munuyilambula chitapo ha tangwa litangu ha chingoloshi, kanda yisala ufuku weswe ndo mu kucha.

⁵ Kanda malambula chitapo cha Chizomboka mu yihunda yenu yize Yehova Zambi yenu ananwehe.

⁶ Alioze kuze Yehova Zambi yenu matongola kusa jina lienyi, nulambwileko chitapo cha Chizomboka ha chingoloshi, ha kutoka cha tangwa, ola yize nwakatukile ku Engitu.

⁷ Nuchioche nikuchilila kuze Yehova Zambi yenu matongola, mba ha chimene nutewuluke, nuye ku mbalaka jenu.

⁸ Nulie mbolo kuyishi futunwiso matangwa asambano; ha tangwa liamuchishimbiali kukapwe chikungulwila chilemu, cha Yehova Zambi yenu. Kanda nulingaho milimo niyeyimwe.

⁹ Nulialwile semana shimbiali, ha kuputuka kusa kwengo ku mishachi ya mbuto, nuputuke kwalula semana shimbiali.

¹⁰ Nulinge chiwanyino cha masemana kuli Yehova Zambi yenu nikumbata ha moko jenu mulambu wa mbunge, nuuhane nikulita ngwe anuwahishile Yehova Zambi yenu.

¹¹ Nuwahilile kumeso ja Yehova Zambi yenu, ni yenu, ni ana jenu a malunga, ni ana jenu a mapwo, ni ngamba jenu a malunga, ni ngamba jenu a mapwo, ni A-Levi ali mu yihunda yenu, ni njize, ni shiwa, ni twamishi ali hakachi kenu, kuze Yehova Zambi yenu matongola kusa jina lienyi.

¹² Nwiwuluke ngwami, Nwapwile tupinji mu Engitu; nufunge yiyulo yino ni kuyilinga.

¹³ Nulinge chiwanyino cha yisakila matangwa shimbiali, ha kumana kukunga ya ku yizungwilo yenu ni ya ku ukamino wenu wa uva.

¹⁴ Nuwahilile ku chiwanyino chenu, ni yenu, ni ana jenu a malunga, ni ana jenu a mapwo, ni ngamba jenu a malunga, ni ngamba jenu a mapwo, ni A-Levi, ni njize, ni shiwa, ni twamishi ali mu yihunda yenu.

¹⁵ Nulinge chiwanyino kuli Yehova Zambi yenu matangwa shimbiali kuze Yehova matongola. Nuwahilile wika mumu Yehova Zambi yenu kumakanuwahisa ku kwoka cheswe cha mbuto jenu ni ku milimo yeswe ya moko jenu.

¹⁶ Katatu ha mwaka, katatu ha mwaka, malunga jenu eswe akasoloke kumeso ja Yehova Zambi yenu kuze iye matongola; ku chiwanyino cha mbolo kuyishi futunwiso, ni ku chiwanyino cha masemana, ni ku chiwanyino cha yisakila. Kanda asoloka mokomoko kumeso ja Yehova.

¹⁷ Mutu ni mutu akahane nikulita ngwe anahase, nikulita ni chiwape cha Yehova Zambi yenu ngwe iye hananwehecho.

¹⁸ Ni ngaji ni yilolo nulisakwilo mu yihunda yenu yeswe, Yehova Zambi yenu ananweheyo, nikulita ni minyachi yenu, o akayule atu ni upatwilo wa ululi.

¹⁹ Kanda nuhengesa upatwilo; kanda nupwa ni katonde; chipwe kanda nutambula chindo, mumu chindo kuchapupuchisa meso ja mukwa mana, kuchahengesa chikuma cha mukwa ululi.

²⁰ Nukaule we ululi lume, nupwe ni mwono ni kuzuka chifuchi Yehova Zambi yenu ananwehecho.

²¹ Kanda nulitumbila Ashera ja mitondo niyimwe ku kulwa chilumbilo cha Yehova Zambi yenu, chize munutunga.

²² Chipwe kaponya kanda nulijikilaye, Yehova Zambi yenu kanaavwila lwaji.