Shimbi 15 - MUKANDA USANDU WA ZAMBI 1975

¹ Ha kusula cha miaka shimbiali, shimbiali, kukapwe kutusula.

² Ndako ya kutusula yikapwe yino, eswe akwa kuhana mikuli, mutu ni mutu akatusule mikuli ayihanyine kuli mukwo. Kanda ayizanjika kuli mukwo, hanji kuli usoko wenyi, mumu hanambujola kutusula cha Yehova.

³ Nuyizanjike kuli kandaka, ahoze cheswacho cha yenu muchipwa kuli usoko wenu, moko jenu akachitusule.

⁴ Hindu kanda kupwa kuli yenu chiswale niumwe, mumu chamwenemwene Yehova makanuwahisa mu chifuchi ananwehecho kuli Yehova Zambi yenu, chikapwe chihinga, nukachizuke,

⁵ nyi munupanjika kanawa ku liji lia Yehova Zambi yenu, ni kukanyama kulinga liji lino lieswe ha shimbi ngunanwambelio musono.

⁶ Mumu Yehova Zambi yenu kumakanuwahisa, ngwe anulakenyene, munukahana mikuli ku mavungu anji, ahoze kanda nukatambula mikuli. Munukayula mavungu anji, alioze o kechi kayula yenu.

⁷ Kachi mukupwa ni yenu chiswale umwe wa akwenu, mu yihunda yenu, mu chifuchi chenu Yehova Zambi yenu ananwehecho, kanda nukalisa mbunge jenu, kanda nufukukila moko jenu kuli mukwenu chiswale.

⁸ Numufukwile wate moko jenu, numwehe mukuli nikulita ni yeswe anahono iye.

⁹ Kanyamenu, kanda lipwa mu mbunge jenu nyonga ha uzazali ngwenu, Mwaka wamuchishimbiali, we mwaka wa kutusula unahete, meso jenu mapwa api kuli mukwenu chiswale, mba kunuchi kumwaha nichimwe, iye nikuteta kuli Yehova mumu hali yenu, muchipwa mulonga kuli yenu.

¹⁰ Chamwenemwene nukamwehe, mbunge jenu kanda jivwa kupiha ha kunwahacho, mumu te ha chuma chino Yehova Zambi yenu makanuwahisa ku milimo yenu yeswe ni ku yeswe munulinga ni moko jenu.

¹¹ Mumu chifuchi chenu kuchichi kuhona chiswale, kashika ngunanwambe ngwami, Chamwenemwene nukafukwile mukwenu moko jenu, ni akwa kuhona ni yiswale, mu chifuchi chenu.

¹² Kachi malanjisa kuli yena umwe Ka-Hepreu ni mukwenu, chipwe lunga, chipwe pwo, mba makuvumbika miaka yisambano, henaho ha mwaka wamuchishimbiali, ukamutusule kuli yena.

¹³ Ha kumutusula kuli yena, kanda umutusula mokomoko.

¹⁴ Umupangile nikuvungumiona ya ku mapanga je, ya ku yizungwilo ye, ya ku ukamino we wa uva, ngwe akuwahishile kuli Yehova Zambi ye chocho ukamwehe.

¹⁵ Wiwuluke ngwami, Ena wapwile kapinji mu chifuchi cha Engitu, Yehova Zambi ye yakukula. Kashika ngunakwambe chuma chino musono.

¹⁶ Alioze kachi iye mamba kuli yena ngwenyi, Chichi kukatuka kuli yena; mumu iye kanakuzange yena ni akwa zuwo lie, mumu te iye kanatwama kawape ni yena.

¹⁷ Henaho wande katwalo, umutuwe twitwi lienyi ha pito, iye akapwe ndungo ye wa mutolo, ni kuli ndungo ye wa pwo ulinge chizechene.

¹⁸ Kanda chipwa chikalu kuli yena ha kumutusula kuli yena, mumu iye hanakuvumbika miaka yisambano, ngwe milimo ya kufweta ngamba aali. Yehova Zambi ye kumakuwahisa ku yeswe mulinga.

¹⁹ Tupula-majimo eswe a kuji masemuka ku ngombe jenu ni ku mapanga jenu, nukaasele ku usandu kuli Yehova Zambi yenu. Kanda nulinga milimo ni tupula-majimo a ngombe, kanda nutewula tupula-majimo a mapanga.

²⁰ Mwaka ha mwaka kumeso ja Yehova Zambi yenu nukaalile kuma kuze matongola kuli Yehova, ni yenu, ni akwa mazuwo jenu.

²¹ Nyi chipa akwete, ngwe chitonji, hanji kapuputa, te chipa cheswacho chipi kanda numulambula chitapo kuli Yehova Zambi yenu.

²² Nukaalile mu yihunda yenu, ni mutu wa luchisa ni mutu mupema mahasa kulia chizechene ngwe kai, ni ngwe kapaji.

²³ Chino wika, kanda nulia manyinga jenyi, nukaazujile hashi ngwe meya.