Shimbi 14 - MUKANDA USANDU WA ZAMBI 1975

¹ Enu nuli ana ja Yehova Zambi yenu. Kanda nulichata, chipwe kulitewula ha mahuma jenu hali afu, ka.

² Kunwapwa atu asandu kuli Yehova Zambi yenu, Yehova yanutongola nukapwe atu a mbala a iye, a hakachi ka mavungu eswe ali hashi.

³ Kanda nulia chuma nichimwe cha kuzelwokesa.

⁴ Tushitu munulia wano ngwami, Ni ngombe m panga, ni pembe,

⁵ ni kapaji, ni kai, ni chifwembi, ni pembe wa mu yambu, ni ngulungu, ni tengu, ni songe,

⁶ ni tushitu eswe akupula sende, akwete sende ja kupula hakachi, waze hakachi ka tushitu akusekula, nukaalie.

⁷ Hindu a kuli akwa kusekula hanji waze akwete sende ja kupula kanda nulia wano ngwami, Ni kamelu, ni mbalu, ni sele, mumu o masekula, alioze keshi sende ja kupula, kapwa a luchisa kuli yenu.

⁸ Ni ngulu, mumu iye akwete sende ja kupula alioze keshi kusekula, kapwa wa luchisa kuli yenu. Kanda nulia yifwo yo, kanda nukwata ha mijimba yo ya kufwa.

⁹ A kuli akwa meya eswe nulie wano ngwami, Eswe akwete yihehe ni mahalo, nukaalie.

¹⁰ Eswe keshi yihehe ni mahalo kanda nwalia, o a luchisa kuli yenu.

¹¹ A kuli tujila eswe apema nulie.

¹² Alioze kanda nulia wano eswe ngwami, Ni pupa, ni chihungu, ni chiselele,

¹³ ni ngonga, ni kambuya, ni hula-yula nikulita ni vungu lienyi,

¹⁴ ni yikwakwalo eswe nikulita ni vungu lio,

¹⁵ ni kakulu, ni chambamba, ni ngavota, ni chikoji nikulita ni vungu lienyi,

¹⁶ ni chikulu, ni chikungulu, ni chozo,

¹⁷ ni toji, ni kuyu, ni katovwi,

¹⁸ ni chitwanjimbu, ni chitokola nikulita ni vungu lienyi, ni kolokokwe, ni kafukufuku.

¹⁹ Ni tututu eswe a mapulwa anapu a luchisa kuli yenu, kanda nwalia.

²⁰ Alioze a kuli tujila eswe apema munuhasa kulia.

²¹ Kashitu malifwila mwene kanda munulia, nuchimuhane kuli njize ali mu yihunda yenu, hanga amulie, hanji kumulanjisa kuli kandaka; mumu yenu kunwapwa atu asandu kuli Yehova Zambi yenu. Kanda nuteleka mwana-pembe mu yamwa ya naye.

²² Nuhane chihanda cha ku kumi cha kwoka cha mbuto jenu mujisoka mu minda yenu mwaka ha mwaka.

²³ Nukalile kumeso ja Yehova Zambi yenu kuze iye matongola kusa jina lienyi, chihanda cha ku kumi cha mbuto jenu, ni cha vinyu yenu, ni cha maji jenu, ni tupula-majimo a ngombe jenu, ni a yimuna jenu, hanga nulilongese kuvwila woma Yehova Zambi yenu matangwa eswe.

²⁴ Nyi jila yapwa yisuku naye, chocho kunwahashile kuchimbata, mumu te che chihela chili kusuku naye hali yenu ni kuze Yehova Zambi yenu matongola kusa jina lienyi muze manuwahisa kuli Yehova Zambi yenu,

²⁵ henaho nuchilande mbongo, nuse je mbongo mu moko jenu, nuye kuze Yehova Zambi yenu matongola.

²⁶ Nulande ni je mbongo cheswacho mbunge jenu mujizanga, hanji ngombe, hanji mapanga, hanji vinyu, hanji yakunwa yisasu, hanji cheswacho mbunge jenu mujizanga. Nukalileko kumeso ja Yehova Zambi yenu, nukawahilile, ni yenu, ni akwa mazuwo jenu.

²⁷ Ni A-Levi aze ali mu yihunda yenu, kanda nwaehuka, mumu te o keshi chihanda chipwe chihinga hamwe ni yenu.

²⁸ Ha kusula cha miaka yitatu, miaka yitatu, nukahetese yihanda yeswe ya ku kumi ya kwoka chenu cha mbuto ha mwaka uze, nukayitumbike mu yihunda yenu.

²⁹ A-Levi mumu te o keshi chihanda chipwe chihinga hamwe ni yenu, ni njize, ni shiwa, ni twamishi aze ali mu yihunda yenu, aye, alie, ni kukuta, hanga Yehova Zambi yenu anuwahise ku milimo yeswe ya moko jenu munulinga.