Shimbi 13 - MUKANDA USANDU WA ZAMBI 1975

¹ Kachi mukachi kenu mukupwa profeta, hanji mukwa kulota yilota, manwaha chilayi, hanji chikomokeso,

² mba che chilayi, hanji che chikomokeso muchiza kupwa ngwe iye te hamba kuli yenu ngwenyi, Tukaulenu tuzambi tweka tutuvumbike, enu kunwatunyingikine;

³ kanda nupanjika maliji a yoze profeta, hanji yoze mukwa kulota yilota, mumu Yehova Zambi yenu ananweseka kunyingika nyi nunazange Yehova Zambi yenu ni mbunge jenu jeswe, ni alma jenu jeswe.

⁴ Nukakaule Yehova Zambi yenu, numuvwile woma, nufunge maliji jenyi a shimbi, nuzeyele liji lienyi, numuvumbike, numulalaminye.

⁵ Yoze profeta, hanji yoze mukwa kulota yilota mushihenu, mumu te iye hahanjika maliji a kukolema Yehova Zambi yenu, yoze wanuchijile mu chifuchi cha Engitu, nikunukula ku zuwo lia upinji ngwenyi, Nuhambuluke ku jila yize Yehova Zambi yenu anwambileyo ngwenyi, Nwendemo. Chocho nukatwise che chipi hakachi kenu.

⁶ Kachi yayenu, hanji mwanakwenu, ana ja noko, hanji ana je a malunga, hanji ana je a mapwo, hanji pwo lie wamuzanga, hanji sepa lie wamuzanga ngwe mbunge ya yena mwene, makusongojola ku tenga ngwenyi, Tatuye, tuvumbike tuzambi tweka, yena kwatunyingikine, ni yena, chipwe akakenu;

⁷ tuzambi twa mavungu anakujingilika, hehi ni yena, hanji kusuku ni yena, chize ku songo limwe lia hashi ndo ku songo likwo lia hashi,

⁸ kanda uta kuli iye, chipwe kanda umupanjika, chipwe liso lie kanda Umuvwila keke, kanda umutelela, chipwe kanda umusweka;

⁹ umushihe lume. Kwoko lie Upwe Utangu kumushiha, mba kukaula, moko ja atu eswe.

¹⁰ Umwase mawe, afwe, mumu iye te wafupile kukuhambulwisa kuli Yehova Zambi ye wakuchijile mu chifuchi cha Engitu, ku zuwo lia upinji.

¹¹ A-Izalele eswe achivwe, evwe woma, kanda alinga nawa ungulungulu upwa hoho ngwe uno uli mukachi kenu.

¹² Kachi manwambulwila mu limbo Umwe hakachi ka membo aze Yehova Zambi yenu ananweho kutwamamo ngwo,

¹³ Malunga amwe amokomoko hatuhuka mukachi kenu, hakondolola akwa limbo lio ngwo, Tatuyenu, tuvumbike tuzambi tweka, kunwatunyingikine,

¹⁴ Henaho nuhule, nuhengule, nusunge kanawa, kumanyi, nyi chamwenemwene, cha pundu ngwo, Ungulungulu upwa hoho anaulingi mukachi kenu,

¹⁵ nukashihe ni katana akwa limbo lize, nikulionwona liakulu ni yeswe yilimo, ni yimuna jamo ni katana.

¹⁶ Nukakungile upite walio weswe mukachi ka tapalo lialio, nwoche lie limbo ni kahia, ni upite weswe lukombo kuli Yehova Zambi yenu, likapwe mulumba wa mutolo. Kanda alitunga nawa.

¹⁷ Niyimwe ya yuma yajila kanda nuyikwata ni moko jenu, hanga Yehova alumuke ku usasu wa utenu wenyi, anuvwile keke, anuvwile vumbi, anwokese, ngwe alishingile kuli tulamba twenu,

¹⁸ ha kuzeya ku liji lia Yehova Zambi yenu mukufunga maliji jenyi a shimbi eswe ngunanwambe musono, mukulinga chize chinate kumeso ja Yehova Zambi yenu.