Shimbi 12 - MUKANDA USANDU WA ZAMBI 1975

¹ Yiyulo yino, ni upatwilo uno, munukanyama kulinga mu chifuchi ananwehecho kuli Yehova Zambi ya tulamba twenu mukuchizuka, matangwa eswe munutwama hashi.

² Chamwenemwene nukonwone yihela yeswe mavungu munwahuma avumbikilileho tuzambi two, ni ha milundu yisuku ni ha milundu ni ku mitondo yeswe ya wisu.

³ Nupuzule yilumbilo yo, nukapuzwole yipinji manguji jo, nwoche ni kahia Ashera jo, nupatule tuponya two twa kusonga twa tuzambi two, nujimiseko majina jo.

⁴ Kanda nulinga chocho kuli Yehova Zambi yenu.

⁵ Alioze kuze Yehova Zambi yenu manutongwela ku minyachi yenu yeswe mukusa jina lienyi, te matwama iye, nukafupeko.

⁶ Kwenako munuya, nukaheteseko milamba yenu ya kulumba, ni yitapo yenu, ni yihanda yenu ya ku kumi, ni milambu ya kuzundula ni moko jenu, ni yilakenyo yenu, ni milambu yenu ya mbunge, ni tupula-majimo a ngombe jenu, ni a yimuna jenu.

⁷ Munukalilako kulia kumeso ja Yehova Zambi yenu, nukawahilile ni yeswe munukalinga ni moko jenu; ni yenu, ni akwa mazuwo jenu, ni yuma yeswe hananuwahishilamo Yehova Zambi yenu.

⁸ Kanda nukalinga nikulita ni yeswe tunapu nikulinga kuno musono, mutu ni mutu ngwe chinate ku meso jenyi mwene.

⁹ Mumu kanda nuchiheta kwa kuhwimina ni ku chihinga Yehova Zambi yenu ananwehecho.

¹⁰ Alioze muze munuzauka Yordau nikutwama mu chifuchi ananwehecho chihinga kuli Yehova Zambi yenu, muze hanuhwimisa kuli akwa kole jenu eswe ananujingilika, chocho munutwama kawape,

¹¹ kuze Yehova Zambi yenu makatongola kusa jina lienyi, nukaheteseko yeswe ngunanwambeyo; milambu yenu ya kulumba, ni yitapo yenu, ni yihanda yenu ya ku kumi, ni milambu ya kuzundula ni moko jenu, ni yilakenyo yenu yeswe yilemu munulakenya kuli Yehova.

¹² Nukawahilile kumeso ja Yehova Zambi yenu; ni yenu, ni ana jenu a malunga, ni ana jenu a mapwo, ni ngamba jenu a malunga, ni ngamba jenu a mapwo, ni A-Levi ali mu yihunda yenu, se o keshi chihanda chipwe chihinga hamwe ni yenu.

¹³ Nukanyame ngwami, Kanda nukalambwila milambu yenu ya kulumba kweswako munumona,

¹⁴ shina kuze Yehova matongola ku munyachi umwe wa yenu, nukalambwileko milambu yenu ya kulumba, nukalingileko yeswe ngunanwambeyo.

¹⁵ Chipwe chocho, munuhasa kushiha ni kulia yifwo mu yihunda yenu yeswe, nikulita ni chize munuzanga, nikulita ni chiwape hananwehecho kuli Yehova Zambi yenu; ni mutu wa luchisa ni mutu mupema mahasa kulia, ngwe kai ni kapaji.

¹⁶ Chino wika, kanda nulia manyinga, nukaazujile hashi ngwe meya.

¹⁷ Kanda nukalila mu yihunda yenu chihanda cha ku kumi cha mbuto yenu, chipwe cha vinyu yenu, chipwe cha maji jenu, chipwe cha tupula-majimo a ngombe jenu, chipwe a yimuna jenu, chipwe cha yilakenyo yenu yeswe nunalakenya, chipwe cha milambu yenu ya mbunge, chipwe cha milambu ya kuzundula ni moko jenu.

¹⁸ Alioze nukayilile kumeso ja Yehova Zambi yenu kuze makatongola Yehova Zambi yenu; ni yenu, ni ana jenu a malunga, ni ana jenu a mapwo, ni ngamba jenu a malunga, ni ngamba jenu a mapwo, ni A-Levi ali mu yihunda yenu, nukawahilile kumeso ja Yehova Zambi yenu ni yeswe munulinga ni moko jenu.

¹⁹ Nukanyame ngwami, Kanda nwehuka A-Levi miaka yeswe munutwama mu chifuchi chenu.

²⁰ Muze Yehova Zambi yenu hatohesa njiza yenu ngwe anulakenyene iye, mba munwamba ngwenu, Mutulia yifwo; mumu te nunazange kulia yifwo, nulie ye yifwo, nikulita ni chize munuzanga.

²¹ Nyi kuma kuze Yehova Zambi yenu makatongola kusa jina lienyi mukupwa kusuku naye hali yenu, mba nukashihe ngombe jenu, ni yimuna jenu hananweho kuli Yehova, ngwe nanwambile; nukalile mu yihunda yenu, nikulita ni chize munuzanga.

²² Ngwe malia kai ni kapaji, chocho nukalie, ni mutu wa luchisa ni mutu mupema, munuhasa kulia chizechene.

²³ Chino wika, nuse chinyingi ngwami, Kanda nulia manyinga; mumu te manyinga kapwa mwono; kanda nulia mwono hamwe ni yifwo.

²⁴ Kanda nwalia, nukaazujile hashi ngwe meya.

²⁵ Kanda nwalia, hanga nutwame kawape, ni ana jenu atwame kawape kulutwe lienu, ha kulinga chize chinate kumeso ja Yehova.

²⁶ Chino wika, yuma yenu yisandu nuli nayo ni yilakenyo yenu, nuyitwale, nuye kuze Yehova matongola,

²⁷ nulambule milambu yenu ya kulumba, ni yifwo, ni manyinga ha chilumbilo cha Yehova Zambi yenu. Manyinga a yitapo yenu nukaazujile ku chilumbilo cha Yehova Zambi yenu, nulie ye yifwo.

²⁸ Nufunge, nwivwe maliji ano eswe ngunanwambe hanga nutwame kawape, ni ana jenu atwame kawape kulutwe lienu ndo ku miaka ya mutolo, ha kulinga chipema chize chinate kumeso ja Yehova Zambi yenu.

²⁹ Muze Yehova Zambi yenu mateta mavungu kumeso jenu, nunayi kwahuma, ha kwahuma ni kutwama mu chifuchi cho,

³⁰ nukanyame ngwami, Kanda nufwa mu kambwila ha kwembulula, o te hakuwa kumeso jenu, kanda nukahula hali tuzambi two ngwenu, Ngwe kuchi mavungu ano anavumbikila tuzambi two? Tulingenu chizechene nawa.

³¹ Kanda nulinga chocho kuli Yehova Zambi yenu, mumu yizelwokeso yeswe Yehova anayivwila lwaji, o te hanalingi ku tuzambi two; mumu o, chipwe ana jo a malunga ni ana jo a mapwo anaochela kuli tuzambi two.

³² Cheswacho ngunanwambecho, nukanyame kuchilinga. Kanda nuwezako, chipwe kanda nutepululako.