Shimbi 11 - MUKANDA USANDU WA ZAMBI 1975

¹ Kashika, zangenu Yehova Zambi yenu, nufunge ulayilo wenyi, ni yiyulo yenyi, ni upatwilo wenyi, ni maliji jenyi a shimbi matangwa eswe.

² Nyingikenu musono ngwami, Mumu chahanjikile ni ana jenu kanyingikine, kamwene kufumba cha Yehova Zambi yenu, ni unene wenyi, ni kwoko lienyi lia ndundo, ni kwoko lienyi lia kwolola,

³ ni yilayi yenyi, ni yitanga yenyi ayilingile iye hakachi ka A-Engitu kuli Falau, mwanangana wa Engitu ni ku chifuchi chenyi cheswe.

⁴ Ni kuli tujita twa A-Engitu, ni kuli tuvwalu two, ni ku matemba jo, ngwe iye aafukile ni meya mu Kalunga-lwiji Muchila, o te ananuhange; ngwe Yehova waonwene ndo ku musono.

⁵ Chize anulingile iye nawa mu puya ndo nwaheta kuno;

⁶ chize alingile nawa ni Ndatane, ni Apirame, ana a Eliape, mwana wa Rupene, ngwe hashi hapakwile kanwa liaho ni kwamina, ni akwa mazuwo jo, ni mbalaka jo, ni akwa mwono eswe aakawile, mukachi ka A-Izalele;

⁷ alioze meso jenu hanamono yitanga yeswe yinene ya Yehova ayilingile iye.

⁸ Kashika, nufunge liji lieswe lia shimbi ngunanwambelio musono, hanga nutakame, nuhetemo ni kuzuka chifuchi, nunazauka mukuchizuka,

⁹ hanga nwokese matangwa jenu mu chifuchi chize alishingile Yehova kuli tulamba twenu mukwaahacho, ni kuli ana jo, chifuchi chize chinokela yamwa ni wuchi.

¹⁰ Mumu che chifuchi nunayi kuchizuka kuchapwile ngwe chifuchi cha Engitu kuze nwakatukile, nwapwile ni kukuwa mbuto jenu ni kujihinjila ni molu jenu, ngwe chala cha yilimalima.

¹¹ Alioze che chifuchi nunazauka kuchizuka kuchapwa chifuchi cha milundu, ni cha yikulo, kuchanwa vula ya mwilu,

¹² chifuchi anachifungu kuli Yehova Zambi yenu. Meso ja Yehova Zambi yenu kwaliho matangwa eswe, chize ku kuputuka cha mwaka ndo ha kusula cha mwaka.

¹³ Kashika, nyi munupanjika kanawa ku maliji jami a shimbi ngunanwambe musono, nukazange Yehova Zambi yenu, mukumuvumbika ni mbunge jenu jeswe ni alma jenu jeswe,

¹⁴ mungunokesa vula ha chifuchi chenu ha mwaka wenyi, vula musazu ni vula wa samakwasa, hanga nuhase kukunga mbuto jenu ja kulia chenu ni vinyu yenu, ni maji jenu.

¹⁵ Mungusokesa kelo ja yimuna jenu mu ulilo wenu, munulia ni kukuta.

¹⁶ Nukanyame, kuchina mbunge jenu mujinwonga, mba munuhambuluka ni kuvumbika tuzambi tweka, ni kutuwayila.

¹⁷ Mba utenu wa Yehova muukanukasumukina, majika mwilu, kukuchi kapwa vula, minda kuyichi kema mbuto yayo, munukakuwa washiwashi mu chifuchi chipema ananwehecho kuli Yehova.

¹⁸ Kashika, pachikilenu wano maliji jami mu mbunge jenu ni mu alma jenu, nukaakase ha moko jenu akapwe chilayi, akapwe nawa a kukashila mukachi ka meso jenu.

¹⁹ Nukaalongese kuli ana jenu ni kwatenga pande ha kutwama mu mazuwo jenu, ni ha kwenda mu jila, ni ha kupomba, ni ha kuhinduka nawa.

²⁰ Nukaasoneke ha yipamba ya mazuwo jenu ni ha yajilo yenu,

²¹ hanga matangwa jenu oke, ni matangwa ja ana jenu mu chifuchi alishingile Yehova kuli tulamba twenu mukwaahacho, akapwe ngwe matangwa ja mwilu hano hashi.

²² Mumu kachi munufunga kanawa liji lino lieswe lia shimbi ngunanwambe, ni kulilinga, nukuzanga Yehova Zambi yenu, mukwenda mu majila jenyi eswe, mukulalaminya kuli iye,

²³ mba Yehova kumakahuma kumeso jenu mavungu ano eswe, munukahuma mavungu ananuhiana ni unene ni ndundo.

²⁴ Kuma kweswe munukaliata ni molu jenu kukapwe nikwenu, katuke ku puya ni ku Lebano, katuke ku lwiji, lwiji Ufrateze ndo ku kalunga-lwiji watwama ku Chitokelo kukapwe njiza yenu.

²⁵ Kukuchi kupwa mutu niumwe makamana kumeso jenu; Yehova Zambi yenu masa woma wenu ni mwongo wenu ha chifuchi cheswe munukaliataho, ngwe iye wambile kuli yenu.

²⁶ Kutala! Ngunase kumeso jenu musono, chiwape ni shingo.

²⁷ Chiwape, nyi munupanjika ku maliji a shimbi a Yehova Zambi yenu ngunanwambe musono.

²⁸ Ngwami, Shingo, nyi kunuchi kupanjika ku maliji a shimbi a Yehova Zambi yenu, alioze nyi munuhambuluka ku jila ngunanwambeyo musono, mukukaula tuzambi tweka, kunwatunyingikine.

²⁹ Ngwami, Muze Yehova Zambi yenu manuhetesa mu chifuchi nunayi mukuchizuka, nukase chiwape ha mulundu wa Ngerizime, ni shingo ha mulundu wa Epale.

³⁰ Kuyapwile mu sali lia Yordau nyi? Mu sali lia tapalo ku Chitokelo, mu chifuchi cha A-Kanana, akutwama mu Arapa, hatalanganyi ni Ngilingali ku kulwa carvalho ya More.

³¹ Mumu munuzauka Yordau, mukuheta mu chifuchi, mukuchizuka, Yehova Zambi yenu ananwehecho. Muze hinwachizuka, nikutwamamo,

³² nukanyame, nulinge yiyulo yeswe ni upatwilo ngunase kumeso jenu musono.