Shimbi 10 - MUKANDA USANDU WA ZAMBI 1975

¹ Ha mwaka uze Yehova wambile kuli yami ngwenyi, Ulitotele mawe aali a kulifwa ni atangu, ukanduke kuli yami ha mulundu, ulisongele mushete wa mutondo.

² Maliji aze apwile ha mawe atangu yena washihile, mungwasoneka ha mawe aze ukaase mu mushete.

³ Chocho yingusonga mushete wa mutondo wa mukesha, yingutota mawe aali a kulifwa ni atangu, yingukanduka mulundu, te ngunambata mu kwoko liami e mawe aali.

⁴ Iye yasoneka ha mawe nikulita ni kusoneka chitangu, kumi lia shimbi, Yehova wajambile kuli yenu ha mulundu, liji Unatuhuka mukachi ka kahia ha tangwa lia chikungulwila. Yehova yangwaho yami.

⁵ Yingwalumuka ni kupalumuka mulundu, yingusa e mawe mu mushete nasongele yami, momwali ngwe angwambile Yehova.

⁶ (A-Izalele yaya wenyi wo katuke ku Mberote-Mbene-Jakane ndo ku Mosera, kwenako afwilile Arone, kwenako amufunjile. Ha kumusalakanyisa mwanenyi Eleazare yalinga usasendote.

⁷ Yakatukako, yaya wenyi wo ndo ku Gudegoda, katuke ku Gudegoda ndo ku Jotepata, chifuchi cha yitwetwe ya meya.

⁸ Ha mwaka uze Yehova yahandununa munyachi wa Levi, mukumbata mushete wa usendo wa Yehova, mukumana kumeso ja Yehova amuvumbike, akawahise ni jina lienyi ndo ku tangwa lino.

⁹ Kashika A-Levi keshi chihanda chipwe chihinga hamwe ni akwo. Chihinga cho, Yehova, nikulita ngwe ambile kuli iye Yehova Zambi yenu.)

¹⁰ Yingushimbula ha mulundu makumi awana a matangwa ni makumi awana a ufuku, ngwe ha shimbu litangu. Yehova yapanjika kuli yami ha mwaka uze nawa. Yehova te kafupile kunwonwona.

¹¹ Yehova yamba kuli yami ngwenyi, Katuka, uye wenyi we kumeso ja atu, o kumakanjila ni kuzuka chifuchi, nalishingile kuli tulamba two ngwami, Mungwaahacho.

¹² Haliapwila, enu A-Izalele, Yehova Zambi yenu kuchi anafupu kuli yenu? Kanafupu nuvwile woma Yehova Zambi yenu ni kwenda mu majila jenyi eswe, nikumuzanga, nikuvumbika Yehova Zambi yenu ni mbunge jenu jeswe ni alma jenu jeswe,

¹³ mukufunga maliji a shimbi a Yehova, ni yiyulo yenyi ngunanwambeyo musono, hanga nuwahe.

¹⁴ Kutala! Lilu lia mbala lia Yehova Zambi yenu, ni lilu lia malilu, hashi ni yeswe yiliho.

¹⁵ Alioze Yehova wawahililile muli tulamba twenu, nikwazanga. Yatongola ana jo kulutwe lio, te yenwene hakachi ka mavungu eswe ngwe chinapu musono.

¹⁶ Nulipwise ngalami, nuchize ulima wa mbunge jenu, kanda nupwa akwa kupangula nawa.

¹⁷ Mumu Yehova Zambi yenu iye Zambi ya tuzambi, Mwene wa ene, Zambi munene, mukwa ndundo, kole ni mwongo, keshi katonde, chipwe keshi kutambula chindo, ka.

¹⁸ Kakupatwila ni ululi shiwa ni twamishi, kazanga chilambala nikumwaha kulia ni mazalo.

¹⁹ Kashika zangenu yilambala, mumu yenu nwapwile yilambala mu chifuchi cha Engitu.

²⁰ Nukavwile woma Yehova Zambi yenu, nukamuvumbike iye, nukamulalaminye, nukalishinge ni jina lienyi.

²¹ Iye uhaliso wenu; iye Zambi yenu, hananulingila yuma yino yinene, kole ni mwongo, meso jenu hanayimono.

²² Tulamba twenu yapalumukina ku Engitu, makumi shimbiali a atu, haliapwila Yehova Zambi yenu hananupwisa mbunga ngwe matongonoshi a mwilu.