Shimbi 1 - MUKANDA USANDU WA ZAMBI 1975

¹ Maliji ano ambile Mose kuli A-Izalele eswe mu sali lia Yordau, mu puya, mu Arapa chatalangana ni Kalunga-lwiji Muchila, hakachi ka Parane, ni Tofele, ni Lapane, ni Hazerote, ni Dizahabe.

² Katuke ku Horepe, kuchapwa wenyi wa kumi lia matangwa ni tangwa limuwika ku jila ya mulundu wa Sere kuheta ku Kandeshe-Mbania.

³ Mba ha mwaka makumi awana, ha kakweji kumi ni limuwika, ha tangwa litangu lia mwe kakweji, Mose yamba kuli A-Izalele, nikulita ni yeswe amuhele Yehova ni shimbi hali ayo,

⁴ muze te iye halamba Sahone mwanangana wa A-Amore, atwamine ku Heshebone, ni Oge mwanangana wa Mbashane, Watwamine ku Asatarote, ku Endreya.

⁵ Mu sali lia Yordau mu chifuchi cha Moape, Mose waputukile kulumbununa shimbi yino ngwenyi,

⁶ Yehova Zambi yetu wambile kuli yetu ku Horepe ngwenyi, Nwashimbula ku mulundu uno, miaka hiyacha.

⁷ Tewulukenu, nuye mu wenyi wenu, nuye ku chifuchi cha A-Amore ku milundu, ndo kuma kweswe kwasulangana nacho mu Arapa, ni mu chifuchi cha milundu, ni mu yana, ni ku Negeve, ni ku ngenge ya Kalunga-lwiji, chifuchi cha A-Kanana, ni cha Lebano, ndo ku lwiji munene, mwe lwiji Ufrateze.

⁸ Kutala! Ngunase kumeso jenu che chifuchi, nunjilemo, nuchizuke, Yehova walishingile kuli tulamba twenu, kuli Apalahama, ni kuli Izake, ni kuli Yakomba mukwaahacho ni ku munyachi wo kulutwe lio.

⁹ Nambile kuli yenu ha mwaka uze ngwami, Ami chichi kuhasa kunumbata ukawami.

¹⁰ Yehova Zambi yenu hananwokesa. Kumanyi musono, kunwapwa mbunga ngwe matongonoshi a mwilu.

¹¹ Yehova, Zambi ya tulamba twenu, akanwokese mutu ni mutu nukapwe tununu, akanuwahise, ngwe iye walakenyene.

¹² Ngwe kuchi yami ukawami munguhasa kumbata kutatama chenu, ni chiteli chenu, ni vunda lienu?

¹³ Nulitongwele malunga akwa mana, a yinyingi, akwa lufuma, nikulita ni minyachi yenu, mungwapwisa akwa lutwe jenu.

¹⁴ Nwangukumbulwile ngwenu, Chino Wahanjika chinawaha kulinga.

¹⁵ Mba yinguchiza akwa lutwe ja minyachi yenu, akwa mana, akwa lufuma, hikwaapwisa akwa lutwe jenu, miata ja tununu, miata ja kulakaji, miata ja makumi atano, miata ja kumi, yilolo, nikulita ni minyachi yenu.

¹⁶ Yingwamba ngaji jenu ha mwaka uze ngwami, Panjikenu yikuma hakachi ka akwenu, nupatule ni ululi hakachi ka mutu ni mukwo, ni njize waze ali hamwe ni yenu.

¹⁷ Kanda nupwa ni katonde ha kupatula. Nupanjike akepe ni anene chizechene. Kanda nupwa ni woma wa meso ja mutu, mumu upatwilo wa mbala wa Zambi. Chikuma chikalu naye hali yenu nungunehenecho. Munguchipanjika.

¹⁸ Yingunwamba mwaka uze yeswe chanutambile kulinga.

¹⁹ Yitukatuka ku Horepe, yitupalika ndusu puya yeswe yinene yakola woma, yenu nwayimwene, mu jila ya kuya ku chifuchi cha A-Amore ku milundu ngwe atwambile Yehova Zambi yetu. Yituheta ku Kandeshe-Mbania.

²⁰ Nambile kuli yenu ngwami, Hinwaheta ku chifuchi cha A-Amore ku milundu anatwehecho kuli Yehova Zambi yetu.

²¹ Kutala! Yehova Zambi yenu kanase kumeso jenu che chifuchi, nukanduke, nuchizuke ngwe Yehova Zambi ya tulamba twenu ambile kuli yenu. Kanda nwivwa woma, chipwe mwongo, ka.

²² Mba yenu eswe, mutu ni mutu yinukundama kuli yami ngwenu, Tutetekesenu malunga, atwendesele chifuchi, mba atunehene liji ni kutulweza jila chatutamba kukandukila, ni membo mutukahetako.

²³ Chino changuwahilile. Yingutongola kuli yenu kumi lia malunga ni malunga aali, mutu ku munyachi, mutu ku munyachi.

²⁴ O yatewuluka, yakanduka mulundu, yaheta ku chikulo cha Esekole. Yachendesa.

²⁵ Yambata ha moko jo mihuko yimwe ya ku chifuchi, yapalumuka nayo kuli yetu, yatunehena liji ngwo, Che chifuchi Yehova Zambi yetu anatwehecho kuchawaha.

²⁶ Hindu kunwatayile kukanduka, alioze yinukolema shimbi ya Yehova Zambi yenu.

²⁷ Yinulinyenyeta mu mbalaka jenu ngwenu, Mumu te Yehova anatuvwila kole, iye watuchijile ku chifuchi cha Engitu, mukutukunjika ku moko ja A-Amore, atukuwise.

²⁸ Tukandukile kulihi nyi? Akwetu hanatushihi mbunge jetu ngwo, Atu jako anene, atolomoka kuhiana yetu. Membo anene, yipanga yo yaheta ku malilu. Chikwo nawa, yitumonako ana ja A-Anake a malunga.

²⁹ Henaho yingwamba kuli yenu ngwami, Kanda nupwa ni mwongo, chipwe kwavwila woma, ka.

³⁰ Yehova Zambi yenu manutetekela, iye makanwashila jita, nikulita ni yeswe anulingilile mu Engitu ku meso jenu.

³¹ Ni mu puya, nwamwenemo ngwe Yehova Zambi yenu anumbachile ngwe lunga mambata mwanenyi, mu jila yeswe nwayilemo, ndo nwejile kuno.

³² Hindu ni chino kunwafulielele Yehova Zambi yenu.

³³ Iye wanutetekelele mu jila, mukufupa chihela cha kujikila mbalaka jenu, ha ufuku ni kahia anulweze jila Chanutamba kuya, ni ha mwalwa ni lelwa.

³⁴ Yehova yevwa liji lia kuhanjika chenu, iye yatenuka, yalishinga ngwenyi,

³⁵ Chamwenemwene mutu niumwe wa chisemuko chino chipi mamona chifuchi chipema nalishingile kuhana kuli tulamba twenu,

³⁶ shina Kalemba, mwana wa Yefune, iye makachimona. Mungukanwaha chifuchi iye waliachileho, ni kuli ana jenyi, mumu iye hanakaula liakulu Yehova.

³⁷ Yehova yangutenukina nawa mumu hali yenu ngwenyi, Ni yena nawa kuchi kunjilamo.

³⁸ Yoshua, mwana wa Nune, wakumana kumeso je, iye makanjilamo. Mutakamise, mumu iye makatungisamo A-Izalele.

³⁹ Chikwo nawa, ana jenu akepe nwambile ngwenu, O kumapwa funge, ni ana jenu haliapwila kanyingikine chipema chipwe chipi, o kumakanjilamo, mungukaahacho, o kumakachizuka.

⁴⁰ Alioze yenu, tewulukenu, nuye wenyi wenu ndo mu puya mu jila ya Kalunga-lwiji Muchila.

⁴¹ Yinungukumbulula ngwenu, Twavulumuna Yehova, kumutukanduka, twase jita, nikulita ni yeswe Yehova Zambi yetu hanatwambe. Mutu ni mutu yalipakata yitwa yenyi. Yinulipupula kukanduka ku chifuchi cha milundu.

⁴² Yehova yamba kuli yami ngwenyi, Amba kuli ayo ngwe, Kanda nukanduka, chipwe kwasa jita, ka, mumu te chishi hakachi kenu; kuchina munulambama kumeso ja akwa kole jenu.

⁴³ Kashika yingwamba kuli yenu, kunwapanjikile, alioze yinukolema shimbi ya Yehova, yinulengumuka, nikukanduka ku chifuchi cha milundu.

⁴⁴ A-Amore akutwama ku chifuchi chize cha milundu, yatuhuka alimike ni yenu, yanuhanga ngwe puka akulinga, yanulamba hashi ku Sere, ewa ndo ku Horoma.

⁴⁵ Yenu nwahilukile, yinulila kumeso ja Yehova; alioze Yehova kapanjikile ku liji lienu, chipwe kanuvwile.

⁴⁶ Chocho yinutwama matangwa anji ku Kandeshe, nikulita ni matangwa nwatwamineko.