Rute 4 - MUKANDA USANDU WA ZAMBI 1975

¹ Mba Mboaze wayile ku chikolo cha chihunda, yatwamako. Kumanyi mwe usoko wa ha muchima yoze Mboaze hamuvuluka yapalika. Mba Mboaze yamba ngwenyi, A mukwetu tweya ku kuno Utwame. Iye yeza, yatwama.

² Mba yatongola kumi lia malunga hakachi ka makulwana a chihunda, yamba ngwenyi, Twamenu hano. O yatwama.

³ Yamba kuli mwe usoko wa ha muchima ngwenyi, Yono Noemi hakatuka ku Moape kanalanjisa chihanda cha munda chize chapwile cha usoko wetu Elimeleke.

⁴ Kashika namba ngwami, Mungukulwezacho, ngwami, Uchilande kumeso ja wano anatwama kuno, ni kumeso ja makulwana ja atu jami. Nyi muchikula, kulako; alioze nyi kwazangile ungulweze nguchinyingike, mumu niumwe mukwo wakuhi helu lia yena, ni yami ngunakuhate ha kota. Iye yakumbulula ngwenyi, Munguchikula.

⁵ Mba Mboaze yamba ngwenyi, Cheswe mulanda munda ku kwoko lia Noemi unalande nawa Rute mwe Ka-Moape, twamishi wa mwe mufu, hanga ukahilwise jina lia mufu ha chihinga chenyi.

⁶ Mba mwe usoko wa ha muchima yamba ngwenyi, Chahashile kuchikula hali yami mwene kuchina mungulumbula chihinga cha yami mwene. Chiyulo chami cha kukula chitambule yena mwene mumu Chahashile kuchikula.

⁷ Ndako apwile nayo kushi mu Izalele ha kutwala ku kukula hanji kulanda. Kukolesa che chuma umwe wazulile luhaku nikumuhana kuli mukwo, chenacho chapwile chikuma cha kukolesa mu Izalele.

⁸ Chocho muze mwe usoko wa ha muchima wambile kuli Mboaze ngwenyi, Chilande hali yena mwene, iye wazulile luhaku wenyi.

⁹ Mba Mboaze yamba kuli makulwana ni kuli atu eswe ngwenyi, Enu nuli yela musono. Ami ngunalande ku kwoko lia Noemi cheswe chapwile cha Elimeleke ni cheswe chapwile cha Chilione ni cha Malone.

¹⁰ Chikwo nawa ngunakula Rute Ka-Moape twamishi wa Malone akapwe pwo liami, mukulindulula jina lia mwe mufu mu chihinga chenyi, kuchina jina lia mwe mufu mulikajimuka hakachi ka ana-akwo ni ayayo mu chikolo cha chijima chenyi. Enu nuli yela musono.

¹¹ Aho atu eswe apwile mu chikolo hamwe ni makulwana yamba ngwo, Tuli yela. Ni yono pwo ananjila mu zuwo lie, Yehova akamupwise ngwe Rakele ni Liya waze hamuwika asangwile munyachi wa Izalele. Ukawahe mu Efrata, ukafumane mu Mbeteleme.

¹² Munyachi we ukapwe ngwe munyachi wa Pereze yoze Tama wasemene kuli Yunda ha kutwala kuli ana Yehova makwaha kuli yono mwana-pwo.

¹³ Chocho Mboaze wambachile Rute, wapwile pwo lienyi. Wanjilile kuli iye mba Yehova yamwaha kwaka, yasema mwana wa lunga.

¹⁴ Mba mapwo ambile kuli Noemi ngwo, Yehova akafumane se musono kakuhichikile kushi usoko; jina lia yono likafumane mu Izalele.

¹⁵ Kumakapwa kuli yena mukwa kuhuzulula mwono kanda mukwa kukuhoka mu ushinakaji we, mumu yono wamusema, iye tembwa-mwané, kanakuzange, kuli yena kahiana chipwe shimbiali a ana a malunga.

¹⁶ Noemi yanda mwe mwana yamusa mu kondo, yapwa ndeji yenyi.

¹⁷ Chocho mapwo a chifuchi chize yamwaha jina ngwo, Noemi hasema mwana. Yamuluka jina lienyi Opete. Iye tato ya Yese, yoze wasemene David.

¹⁸ Asemukine kuli Pereze wano, Pereze iye yasema Hezerone,

¹⁹ Hezerone yasema Rame, Rame yasema Aminandambe,

²⁰ Aminandambe yasema Nasone, Nasone yasema Salamone,

²¹ Salamone yasema Mboaze, Mboaze yasema Opete,

²² Opete yasema Yese, Yese yasema David.