Rute 3 - MUKANDA USANDU WA ZAMBI 1975

¹ Mba naye-weno Noemi yamba kuli iye ngwenyi, Mwanami te kuchangutambile kukufupila uhwimino chikapwe kanawa ni yena?

² Ni yono Mboaze ena walinganga ni ngamba jenyi a mapwo hi usoko wetu ko nyi? Mba musono ufuku mafuza sevada yenyi ha chizungwilo.

³ Sana, ulikwichile maji ukazale mazalo je apema, ukaye ku chizungwilo alioze kanda ulisolola kuli mwe lunga ndo hamana kulia ni kunwa.

⁴ Alioze muze hapomba tala kanawa muhela haze anapombo, mba ukafukule yiliato yenyi ukapombeko, mba iye makulweza chize Chakutamba kulinga.

⁵ Rute yakumbulula ngwenyi, Yeswe unambe mungulinga.

⁶ Chocho yapalumuka ku chizungwilo yalinga chizechene naye-weno hamwamba.

⁷ Muze Mboaze halia, hanwa, yevwa kuwaha mu mbunge yenyi. Mba yaya yapomba ku songo lia mulumba wa mbuto. Mwe pwo yeza makoke, yafukula yiliato yenyi, yapomba.

⁸ Ha muchima ufuku lunga yakasumuka, yalumuka, kumanyi pwo kanapombo ku yiliato yenyi!

⁹ Iye yamba ngwenyi, Yena iya? Yakumbulula ngwenyi, Yami Rute kavumbi kenu. Nungufuke kama yami kavumbi kenu ni hina lienu mumu nuli usoko wetu.

¹⁰ Lunga yamba ngwenyi, Mwanami, Yehova akuwahise; utu we wa kusula wahiana uze utangu se kwakawile akweze, apwe yiswale apwe pichi.

¹¹ Haliapwila mwanami, kanda wivwa woma, mungukulingila yeswe unechi mumu akwetu eswe ananyingika ngwo, Uli pwo wamwenemwene.

¹² Chamwenemwene nguli usoko wa ha muchima alioze kwali umwe wangukumba.

¹³ Hwima ufuku uno mba chimene nyi malinga milimo ya usoko wa ha muchima hali yena, chipema, alinge. Alioze nyi kazangile kulinga milimo ya usoko hali yena mba, ni mwono wa Yehova, yami mwene mungulinga milimo ya usoko wa ha muchima hali yena. Pomba ndo chimene.

¹⁴ Chocho wapombele ku yiliato yenyi ndo chimene, alioze wahindukile shimbu te umwe kahashile kumona mukwo chinyingi. Lunga yamba ngwenyi, Kanda achinyingika ngwo, Pwo wezanga ku chizungwilo.

¹⁵ Chikwo nawa yamba ngwenyi, Teleza hina lize unazala. Chocho yalitela mba yamuzongela njongo jisambano ja sevada, yamutwikajo, chocho iye yaya ku chihunda.

¹⁶ Muze heza kuli naye-weno iye yamba ngwenyi, Yika wamonanga mwanami? Rute yalumbununa yize yeswe lunga amulingila,

¹⁷ ngwenyi, Yangwaha njongo jino jisambano ja sevada mumu ngwenyi, Kuchakutambile kuya kuli noko-weno mokomoko.

¹⁸ Noemi yamba ngwenyi, Hwima mwanami ndo mumona chize chuma chino muchipwa, mumu yono lunga kechi kuhwima ndo hamana che chuma musono.