Rute 2 - MUKANDA USANDU WA ZAMBI 1975

¹ Noemi wapwile ni umwe usoko wa mukwo-lunga, pichi, wa ku usoko wa Elimeleke, jina lienyi Mboaze.

² Mba Rute mwe Ka-Moape yamba kuli Noemi ngwenyi, Ngutayize kama kuya ku munda nikuhuhujola hakachi ka mbuto kunyima lia yoze manguvwila vumbi. Yamba kuli iye ngwenyi, Yako mwanami.

³ Kashika yakatuka yaya nikuhuhujola mu munda kunyima lia akwa kucha mbuto. Yapwila chipwilila mu munda wa Mboaze usoko wa Elimeleke.

⁴ Kumanyi Mboaze yakatuka ku Mbeteleme, yamba kuli akwa kucha mbuto ngwenyi, Yehova apwe hamwe nenu. O yakumbulula ngwo, Yehova anuwahise.

⁵ Mboaze yamba kuli kapatashi kenyi yoze wafungile akwa kucha mbuto ngwenyi, Yono pwo liaya?

⁶ Mwe kapatashi ka akwa kucha mbuto yakumbulula ngwenyi, Yono mwe Ka-Moape wakatukile ku chifuchi cha Moape, wejile ni Noemi.

⁷ Iye kamba kuli yetu ngwenyi, Ngunalembe nungutayize kuhuhujola nikutongona mbuto hakachi ka yichita kunyima lia akwa kucha mbuto. Kashika keza, mba hanyongonona chize ku chimenemene ndo haliapwila, shina kashimbu wika kahwimanga mu zuwo.

⁸ Mba Mboaze yamba kuli Rute ngwenyi, Panjika mwanami. Kanda ukatuka ku munda uno ukaye nikuhuhujola mbuto mu munda weka, alioze linga hakamwihi ni ana-mapwo jami.

⁹ Talikisa meso je ku munda uno anachimo mbuto ukaakaule. Hinamba akweze jami kanda akulinga chipi. Muze muwivwa pwila muoya ku sapa ukanwe aze akweze hataha.

¹⁰ Rute yafulamana ha meso jenyi nikuhetamina hashi, yamba kuli iye ngwenyi, Kuchi te hinawana vumbi kumeso je ungusele chinyingi, yami nguli kandaka?

¹¹ Mboaze yamukumbulula ngwenyi, Hanangwambulwila yize yeswe hiwalingila noko-weno katu ku kufwa cha mukwenu-lunga, ni chize hiwahichika tatenu ni noko ni chijima che, ukeze kuli atu te kanda uchianyingika.

¹² Yehova akukundulule yize yeswe walinga; akakwehe kwononona cheswe cha muwundu kuli Yehova Zambi ya Izalele, se hiweza kuswamina mushi ha mapulwa jenyi.

¹³ Mba pwo wambile ngwenyi, Mwata, vumbi unangulingi nikungulembejeka nikuhanjika ni utu kuli yami kavumbi kenu, chipwe chapwile kavumbi kenu.

¹⁴ Ha ola ya kulia Mboaze yamba kuli iye ngwenyi, Tweya kuno ukalie mbolo ukatáte mu vinyu. Chocho yatwama hakachi ka akwa kucha mbuto mba Mboaze yamutuma mbuto ya kwanyika, yalia ndo hakuta, hindu yimwe yiyilisalaho.

¹⁵ Muze hakatuka mukuhuhujola mbuto Mboaze yamba akweze jenyi ngwenyi, Mwechenu akahuhujole chipwe hakachi ka yichita, kanda numuchoka.

¹⁶ Chizenu yimwe nawa mu yichita hali iye akayihuhujole, kanda numukanjisa.

¹⁷ Chocho yahuhujola mu munda ndo chingoloshi mba yazungula yize hahuhujola. Yapwile ngwe efa yimuwika ya sevada.

¹⁸ Yayimbata, yaya ku chihunda. Yalweza naye-weno yize hahuhujola mba yachiza kulia chalisalanga muze iye hakuta, yamwahacho.

¹⁹ Mba naye-weno yamba kuli iye ngwenyi, Kulihi wayanga nikuhuhujolela mbuto? Kulihi walinganga milimo? Akawahe, mwe lunga yoze wakuselanga chinyingi. Kashika yalweza naye-weno yoze alinga nenyi milimo, ngwenyi, Yoze nalinganga nenyi milimo Mboaze.

²⁰ Noemi yamba kuli tembwa-mwanenyi ngwenyi, Akamuwahise kuli Yehova yoze kambilile utu wenyi kuli amwono hanji kuli afu. Noemi yamba ngwenyi, Iye usoko wetu, wapwa umwe usoko wa ha muchima.

²¹ Rute mwe Ka-Moape yamba ngwenyi, Chikwo nawa yangwamba ngwenyi, Linga hakamwihi ni ngamba jami ndo hamana kucha mbuto yami.

²² Noemi yamba kuli tembwamwanenyi Rute ngwenyi, Mwanami, chipema ukaye ni ana-mapwo jenyi kuchina hanji mu munda weka makakulinga chipi.

²³ Chocho walalaminyine kuli ana-mapwo a Mboaze nikuhuhujola mbuto ndo hamana kucha sevada ni tiliku. Kanatwama mu zuwo lia naye-weno.