Rute 1 - MUKANDA USANDU WA ZAMBI 1975

¹ Ha matangwa muze ngaji ayulile mwapwile kapunga mu chifuchi, mba umwe lunga wa ku Mbeteleme-Yunda wayile mukutwama mu chifuchi cha Moape hamwe ni mukwo-pwo ni anenyi aali a malunga.

² Jina lia mwe lunga Elimeleke; pwo lienyi iye Noemi; ana jenyi a malunga aali Malone ni Chilione. Eswe apwile A-Efrata a ku Mbeteleme-Yunda. Ayile ku Moape, yatungako.

³ Alioze Elimeleke lunga lia Noemi wafwile, yahichika pwo ni anenyi aali.

⁴ O ambachile mapwo A-Moape. Jina lia mukwo Orpa, jina lia mukwo Rute. Chocho atwamineko ngwe kumi lia miaka.

⁵ Mba Malone ni Chilione afwile eswe aali, chocho mwe pwo yafwisa anenyi aali ni lunga lienyi.

⁶ Mba yakatuka ni atembwa-anenyi ahiluke ku chifuchi cha Moape mumu te hevwa mu chifuchi cha Moape ngwo, Yehova hanangisa atu jenyi, haaha kulia.

⁷ Chocho yakatuka kuze, atwamine hamwe ni atembwa-anenyi aali yapwila mu jila ya kuya ku chifuchi cha Yunda.

⁸ Alioze Noemi yamba kuli atembwa-anenyi aali ngwenyi, Yénu, hilukenu ku mazuwo ja anoko. Yehova anulinge vumbi ngwe hinwalinga ni waze hanafu, ni yami nawa.

⁹ Yehova akanukwase nukawane malo, mweswe mu zuwo lia lunga lienyi. Chocho yaaha mbeju, mba o yalila ni liji linene.

¹⁰ Yamba ngwo, Hi chocho ko. Kumutuya ni yena kuli atu je.

¹¹ Alioze Noemi yamba ngwenyi, Hilukenu anami. Kuchi te munuya ni yami? Te ana akwo a malunga nguli no mu jimo mahasa kupwa malunga jenu?

¹² Anami hilukenu. Yénu kwenu, mumu nguli mukulwana naye kuya ulo. Chipwe mungwamba ngwami, Kutalatala nguli nacho; chipwe napwa ni lunga ufuku uno wene, chipwe mungusema ana a malunga,

¹³ te munwashimbwila ndo hakola? Te munutwama hashi mumu hali ayo? Hi chocho ko anami, mumu chinangusashila kuhiana hali yenu chize kwoko lia Yehova hilialimika ni yami.

¹⁴ Alilile cheka nawa ni liji linene, mba Orpa wambejele nayeweno, alioze Rute yamukakaminya.

¹⁵ Noemi yamba ngwenyi, Tala nyalie kanahiluka kuli atu jenyi ni kuli mazambi jenyi. Hiluka yena nawa umukaule.

¹⁶ Alioze Rute yamba ngwenyi, Kanda ungushinjila kukwehuka hanji kukuhichika nikuhilukila kunyima. Mumu kweswako muoya yena ni yami munguya; kweswako mutwama yena ni yami mungutwama kwenako. Atu je kumapwa atu jami, ni Zambi ye kumapwa Zambi yami.

¹⁷ Kweswako mufwila yena, ni yami mungufwila ukangufunde kuze kwene. Yehova akangulambe nyi natayiza chipwe kufwa kutuhandununa yena ni yami.

¹⁸ Muze Noemi yamona ngwenyi, Kanajikiza kuya ni yami, iye kahanjikile nawa.

¹⁹ Chocho ayile eswe ni aali ndo ku Mbeteleme. Muze ahetele ku Mbeteleme chihunda cheswe chalishimwokene mumu hali ayo. Mapwo yamba ngwo, Au Noemi nyi?

²⁰ Iye yamba kuli ayo ngwenyi, Kanda nunguvuluka ngwenu, Noemi, ambenu ngwenu, Mara, mumu mwe Mukwa-Ndundo-Jeswe hangulinga yuma yisasu chikolo.

²¹ Nakatukile wa tò, alioze Yehova hananguhilwisa wa upolongo. Kuchi te nunanguvuluka ngwenu, Noemi muze Yehova hananguyindamisa, mwe Mukwa-Ndundo-Jeswe hanangunehena kuji-ni-tomo?

²² Chocho Noemi yahiluka hamuwika ni Ka-Moape Rute tembwa-mwanenyi yoze wakatukile ku chifuchi cha Moape. Ejile ku Mbeteleme te machiputuka kucha sevada.