Obadia 1 - MUKANDA USANDU WA ZAMBI 1975

¹ Usolwelo wa Obadia uno. Mwene Yehova kanambe ha kutwala kuli Endome ngwenyi, Hitunevu lusango wa kuli Yehova. Hatuma kanganda hakachi ka mavungu nikwamba ngwenyi, Katuka; tukatukenu kulimika nenyi mu jita.

² Tala, hinakupwisa mukepe hakachi ka mavungu. Kanakulelesa chinji.

³ Kulengumuka cha mbunge ye hichakwonga, ena watunga mu yivwenge ya mu mawe, zuwo lie liapwa kwilu; kuwakwamba mu mbunge ye ngwe, Iya manguhulumuna hashi?

⁴ Yehova kanambe ngwenyi, Chipwe mulinangamisa ngwe pupa; chipwe muosa walo we hakachi ka matongonoshi hindu mungukuhulumunako.

⁵ Hakwenyeka Chichize! Nyi kachi eji ejile kuli yena, kachi yingumba ha ufuku, kachi heya ndo hayuka, kunahu. Nyi kachi akwa kuhela uva, kachi hahichika yimwe ya kuhuhulula.

⁶ Alioze hapupa Esau Chichize! Cho kupolongoza nikufupa upite wa kusweka!

⁷ Masepa je hakuhanga ndo ku njiza. Waze Watwamine no ni sambukila hakwonga, hakukumba. Waze alile kulia che hakutela muheto. Kwapwile ni mana a kuchinyingika.

⁸ Yehova kanambe ngwenyi, Ha tangwa lienalio mungwonwona akwa mana mu Endome. Mungwonwona malinjekela mu mulundu wa Esau.

⁹ Ena Temane! Malunga je a ndundo makalishimwoka, hanga eswe akaatete ku mulundu wa Esau nikwashiha.

¹⁰ Kumakakutetako ku miaka ya mutolo, sonyi mujikufuka mumu ha upupilo walingilile mwanakwenu Yakomba.

¹¹ Ha tangwa lize yena wamanyine ku lumbu. Ha tangwa lize yilambala apunjile yikumba yenyi, ni tundaka anjilile ku yajilo yenyi nikulela chela Yerusaleme, chipwe yena wapwile hamuwika no.

¹² Kuchakutambile kutala ha tangwa lia mwanakwenu; ha tangwa lia lamba lienyi. Kuchakutambile kuwahilila ha kumona A-Yunda ha tangwa lia kwaonwona, chipwe kuhanjika nikulengumuka ha tangwa lia luyinda.

¹³ Kuchakutambile kunjila ku chajilo cha atu jami ha tangwa lio lia kuji-ni-tomo. Kuchakutambile kutala kupinda cho ha tangwa lia kuji-ni-tomo, chipwe kukwata ku yikumba yo ha tangwa lia kuji-ni-tomo.

¹⁴ Kuchakutambile kumana ku makano nikushiha waze te anomboka, chipwe kuhandukula atu jenyi asalile ha tangwa lia luyinda.

¹⁵ Mumu tangwa lia Yehova hiliakundama ku mavungu eswe. Chizechene walingile yena, chocho nawa makulinga. Yitanga ye muyikahilukila ha mutwe we.

¹⁶ Chizechene ngwe hiwanwa yena ha mulundu wami usandu chocho mavungu eswe kumakanwanwa. Ewa, kumakanwa, kumakapiepieta, kumakajimuka.

¹⁷ Alioze mu mulundu wa Zaione kumukukapwa akwa kwomboka; muukapwa usandu. Munyachi wa Yakomba kumakazuka chihinga cho.

¹⁸ Munyachi wa Yakomba muupwa kahia; munyachi wa José muupwa mulengi; mba munyachi wa Esau muupwa mwambu umu. Kumakalengenya hakachi ko ni kwalalisa. Kukuchi kasala niumwe wa ku munyachi wa Esau, mumu Yehova hachamba.

¹⁹ Akwa Negeve kumakazuka mulundu wa Esau. Akwa Shefela kumakazuka A-Filistea. Kumakazuka chifuchi cha Eframe ni chifuchi cha Samaria. Mbenjamine kumakazuka Ngiliate.

²⁰ Funge a ku tujita wano, a kuli A-Izalele, waze atwama hakachi ka A-Kanana, o kumakazuka ndo ku Zarafata. Mba funge a ku Yerusaleme, waze atwama mu Shefarade, o kumakazuka membo a ku Negeve.

²¹ Akwa kulamwina kumakaya ku mulundu wa Zaione akayule mulundu wa Esau, mba wanangana kumuukapwa wa mbala wa Yehova.