Nehemia 8 - MUKANDA USANDU WA ZAMBI 1975

¹ Mba atu eswe akungulukilile ngwe mutu umuwika mu lwaza kulutwe lia chikolo cha meya. Yamba kuli Ezera mukwa kusonyeka anehe we mukanda wa shimbi ja Mose jize Yehova watuminyine A-Izalele.

² Sasendote Ezera yaneha shimbi kumeso ja chikungulwila, ni malunga ni mapwo, hanga eswe akevwe ni kusa chinyingi he ha tangwa litangu lia kakweji wamuchishimbiali.

³ Iye yatangamo ha lwaza kulutwe lia chikolo cha meya, chize ku chimenemene ndo tangwa ha muchima, kumeso ja malunga ni mapwo, ni waze eswe muchialumbunuka. Matwi ja atu eswe apwile kwe ku mukanda wa shimbi.

⁴ Mba mukwa kusonyeka Ezera wamanyine ha chitamba cha mitondo hatunga ha milimo yenayo. Kwamanyine hamuwika nenyi Matitia, ni Shema, ni Anaia, ni Uriya, ni Hilekia, ni Maseia, ha chindume chenyi. Ha chimeso chenyi kwamanyine Pedaia, ni Mishaele, ni Malekia, ni Hashume, ni Hashabadana, ni Zekaria, ni Meshulame.

⁵ Ezera yapakula mukanda kumeso ja atu eswe (iye wapwile helu lia atu eswe) mba muze haupakula atu eswe yamana ha molu.

⁶ Ezera yahalisa Yehova mwe Zambi munene, ni atu eswe yakumbulula ngwo, Amene! Amene! nikuzundula moko jo. Yahetamisa mitwe yo nikuwayila Yehova nikufulamana hashi.

⁷ Mba Yeshua nawa, ni Mbani, ni Sherebia, ni Yamine, ni Akube, ni Shabetai, ni Hodia, ni Maseia, ni Kelita, ni Azaria, ni Jozabade, ni Hanane, ni Pelaia, ni A-Levi, o yalumbununa shimbi kuli e atu. Atu te kanamana kuma kwo.

⁸ Yatanga mu mukanda, mu shimbi ja Zambi zwa, nikulumbununa hanga kutanga chikaalumbunuke.

⁹ Nehemia mukwa kuyula, ni sasendote Ezera mukwa kusonyeka, ni A-Levi waze alongesele atu, yamba kuli atu eswe ngwo, Tangwa lino lisandu kuli Yehova Zambi yenu, kanda nulinyenga chipwe kulila. Mumu atu eswe alilile ha kwivwa maliji a shimbi.

¹⁰ Aye yamba kuli ayo ngwenyi, Yénu kwenu nukalie ya maji, nukanwe yiyema, nukatume yihanda kuli waze kaalulikilile nichimwe. Mumu tangwa lino lisandu kuli Yehova, kashika kanda nwivwa chinyengo, mumu tachi jenu jinejila ku uwahililo wa Mwene wetu.

¹¹ Chocho A-Levi yaholesa atu eswe ngwo, Holenu, mumu tangwa lino lisandu. Kanda nulinyenga.

¹² Mba atu eswe yaya akalie, akanwe, akatume yawana, akalikwize chikolo mumu maliji aze haambulwila yaalumbunuka.

¹³ Ha tangwa liamuchiali akwa lutwe mu minyachi ya atato hakachi ka atu eswe, ni asasendote, ni A-Levi, yakungulukila kuli mukwa kusonyeka Ezera akapanjike ku maliji a shimbi.

¹⁴ Yachiwana mu shimbi chize Yehova watumine Mose, chatamba A-Izalele atwame mu yisakila ha chiwanyino cha kakweji wamuchishimbiali,

¹⁵ ni chize chaatamba kufumanyisa ni mutambi mu yihunda yo yeswe ni mu Yerusaleme ngwo, Yénu ku mulundu nukanehe mitango ya olevwe, ni ya olevwe wa mu musenge, ni ya miluta, ni ya mingaji, ni ya mitondo yajika nukatunge yisakila nikulita ni chize asonekene.

¹⁶ Chocho e atu yatuhuka, yayineha, yalitungila yisakila mutu mweswe ha fulumba lia zuwo lienyi, ni mu yize yenyi, ni mu yize ya zuwo lia Zambi, ni ha lwaza ku chikolo cha meya, ni ha lwaza ku chikolo cha Eframe.

¹⁷ Chikungulwila cha waze eswe hanakatuka ku unjize yatunga yisakila nikutwamamo, mumu chize ku matangwa a Yeshua mwana Nune ndo tangwa lienalio A-Izalele kachilingile. Kwapwile kulikwiza chinji.

¹⁸ Chikwo nawa tangwa ha tangwa chize ku tangwa litangu ndo ku tangwa liasula watangile mu mukanda wa shimbi ja Zambi. Yafunga chiwanyino matangwa shimbiali, mba ha tangwa liamuchinake kwapwile kukunguluka chilemu nikulita ni shimbi.