Nehemia 6 - MUKANDA USANDU WA ZAMBI 1975

¹ Muze hatwala liji kuli Sambalate ni Tobia, ni kuli Ka-Arabia Ngesheme, ni kuli akwa kole jetu akwo chize yami hinatunga chipanga-cha-mawe, nichimwe chituwa kuchasalileho (hindu ndo tangwa lize kanda nguchimika mapito mu yikolo),

² Sambalate ni Ngesheme yatuma liji kuli yami ngwo, Tweya tukatakane mu chihunda chimwe cha ha chikulo cha Ono. O te kananyongo kungulinga chipi.

³ Kashika yingutuma tunganda kuli ayo ngwami, Ngunalingi milimo yinene, kashika Chahashile kupalumuka. Ngushihe milimo ha kuyihichika, ngukapalumuke kuli yenu?

⁴ O yatuma kuli yami kawana chizechene; ni yami chochene naakumbulwile.

⁵ Henaho Sambalate yatuma ngamba yenyi chochene kamuchitano ni mukanda wa washi mu kwoko,

⁶ mwenamo mwasonewa ngwo, Kanachambe hakachi ka mavungu, ni Geshemu kanachambe nawa ngwo, Yena ni A-Yunda nunambe kuvunduka; kashika nunatungu chipanga-cha-mawe. Ni maliji jo nawa ngwo, Yena muopwa mwanangana wo.

⁷ Chikwo nawa ngwo, Yena hiwasela aprofeta akakwambulule mu Yerusaleme ngwo, A-Yunda kali ni mwanangana. Chocho meza kutwala liji kuli mwanangana nikulita ni maliji wano. Kashika tweya tukakwate chiyulo hamuwika.

⁸ Namutumine liji ngwami, Kalingile yuma yize unambe. Unatutambilayo mu mbunge ye.

⁹ Mumu te kanafupu kutukolesa woma ngwo, Mutuhongesa moko jo ku milimo mba kechi kuyilinga. Alioze yena Zambi, ungukolese moko jami haliapwila.

¹⁰ Nayile ku zuwo lia Shemaia mwana Ndelaia mwana Mehetapele mumu iye wa kuyikila. Aye yamba ngwenyi, Tutakanenu mu zuwo lia Zambi mwe mu tembele, tukayike mapito a tembele, mumu kaneza kukushiha. Ha ufuku meza kukushiha.

¹¹ Yingwamba ngwami, Te nguli mutu wa kuchina? Mutu wapwa ngwe yami machinyina mu tembele kulamwina mwono wenyi, iya jina lienyi? Chichi kunjilamo.

¹² Mumu nanyingikine ngwami, Hi Zambi ko wamutumine; alioze waprofetezele chocho kulimika ni yami; a Tobia ni Sambalate hamufweta.

¹³ Hamufweta hanga angukolese woma ngumutayize, nguvulumune, hanga o akapwe ni chikuma cha kunguchoka nacho, afumanyise saki.

¹⁴ Zambi yami, iwuluka kama Tobia ni Sambalate nikulita ni yitanga yo; ni profeta wa pwo Noadia, ni aprofeta akwo waze anazange kungukolesa woma.

¹⁵ Chocho chipanga-cha-mawe twachimanunwine ha tangwa makumi aali ni liamuchitano lia kakweji Elule, milimo ya makumi atano a matangwa ni matangwa aali.

¹⁶ Mba muze akwa kole jetu achivwile, mavungu eswe a kutujingilika evwile woma; ahombwele kumeso mumu anyingikine, milimo yino hayilinga kuli Zambi yetu.

¹⁷ Chikwo nawa ha matangwa aze, alemu a A-Yunda apwile nikutumatuma mikanda kuli Tobia, ni mikanda yinji yapwile nikukatuka kuli Tobia nikwiza kuli ayo.

¹⁸ Mumu anji mu Yunda halikata nenyi ni shingo se iye hambata mwana wa Shekania mwana Ara. Ni mwanenyi Jehohana hambata mwana wa Meshulame mwana Mberekia.

¹⁹ No nawa apwile nikungwambulwila yitanga yenyi yipema, mba mamulweza maliji jami. Mba Tobia wapwile nikutumatuma mikanda ya kungukolesa woma.