Nehemia 5 - MUKANDA USANDU WA ZAMBI 1975

¹ Kwapwile nawa muteto unene kuli atu ni kuli mapwo jo wa kulimika ni atu jo A-Yunda.

² Mumu amwe yamba ngwo, Etu ni ana jetu a malunga ni a mapwo tuli anji; tufupenu mbuto tulie tumone mwono.

³ Amwe akwo ambile ngwo, Tunatokesa minda yetu, ni mitondo yetu ya uva, ni mazuwo jetu ngwe tombo, tutambule mbuto mumu ha zala.

⁴ Akwo yamba ngwo, Hitwatambula mbongo ja kufweta mulambu wa mwanangana, alioze minda yetu ni mitondo yetu ya uva hiyaya ngwe tombo.

⁵ Hindu musunya wetu wapwa ngwe musunya wa akwetu, ni ana jetu ngwe ana jo; hindu twakuhana ana jetu a malunga ni a mapwo ku undungo, ni amwe anetu a mapwo hapwa kulu ndungo. Kutwahashile kulinga nichimwe, mumu minda yetu ni mitondo yetu ya uva yili mu moko ja atu akwo.

⁶ Ha kwivwa muteto wo ni maliji ano natenukine chikolo.

⁷ Nanyongene, mba nalitachikile ni alemu ni akwa kuyula ngwami, Enu nwakufwetesa mbwezo mutu mweswe kuli usoko wenyi. Mba nasanyikine chikungulwila chinene ha kusopa no.

⁸ Yingwamba kuli ayo ngwami, Etu nikulita ni kuhasa chetu hitwakula usoko wetu A-Yunda waze aalanjishile kuli akwa mavungu, mba haliapwila te munulanjisa akwenu, twakule nawa yetu? Yahola, kapwile ni liji lia kukumbulula.

⁹ Yingwamba nawa ngwami, Chino chuma nunalingi hi chipema ko. Chanutamba kwenda ni woma wa Zambi mumu ha sau lia akwa kole jetu a mavungu.

¹⁰ Chipwe yami nawa ni usoko wami ni atu jami mutuhasa kwaaha mbongo ni mbuto ha mbwezo. Ngunaliumbu, litwaminenu chuma chino cha mbwezo.

¹¹ Hilwisenu kuli ayo musono uno mande jo, ni minda yo ya uva, ni ya olevwe, ni mazuwo jo. Hilwisenu nawa chihanda chimuwika cha kulakaji cha mbongo, ni mbuto, ni vinyu, ni maji yize nwakutambula kuli ayo.

¹² O yamba ngwo, Mutuyihilwisa. Kutuchi kwafwetesa nichimwe. Chocho mutulinga ngwe hiwamba. Mba nasanyikine asasendote; naashingishile akalinge nikulita ni chilakenyo chino.

¹³ Yingusakumuna hina liami nikwamba ngwami, Chocho Zambi asakumwine ku zuwo lienyi, ni ku milimo yenyi mutu mweswe yoze kalingile nikulita ni chilakenyo chino; chocho amusakumwine ni kumumwanga. Ni akwa chikungulwila eswe yamba ngwo, Amene, ni kuhalisa Yehova. Mba atu yalinga nikulita ni chilakenyo chino.

¹⁴ Chuma chikwo nawa, chize ku tangwa lize angutongwele kupwa mukwa kwayula mu chifuchi cha Yunda, chize ku mwaka makumi aali wa Artasherke ndo ku mwaka wenyi makumi atatu ni wamuchiali (ngwami, kumi lia miaka ni miaka yiali), chipwe yami, chipwe usoko wami kutwahle mbolo ya nguvulu.

¹⁵ Alioze akwa kuyula a kushi shimbu kanda ngwiza, o yaalisa kuli atu. Yatambula kuli ayo mbolo ni vinyu helu lia makumi awana a shekele ja prata. Chipwe tuvumbi two alumukine akwa kuyula atu. Alioze yami chalingile chocho mumu ha woma wa Zambi.

¹⁶ Chikwo nawa nanyongonwene mu milimo ya chipanga chino cha mawe. Kutwalanjile minda niyimwe, ni ngamba jami eswe aswilile ku milimo.

¹⁷ Chikwo nawa nalishile ku mesa yami kulakaji ni makumi atano a malunga, A-Yunda ni akwa kuyula, helu lia waze akatukile hakachi ka mavungu a kutujingilika nikwiza kuli yetu.

¹⁸ Kulia chize twalulikile ha tangwa limuwika, ngombe umuwika, ni mapanga asambano a kutongola, hamwe ni tujila angululikilile. Mba kamuwika ha kumi lia matangwa alulikile milali yeka ni yeka ya vinyu. Hindu ha yino yuma yeswe chechile mbolo ya nguvulu, mumu ufunge walemenene wano atu.

¹⁹ Zambi yami, iwuluka kama hali yami yipema yeswe hinalingila atu ano.