Nehemia 4 - MUKANDA USANDU WA ZAMBI 1975

¹ Muze Sambalate wevwile ngwo, Kanafungu chipanga-cha-mawe, yatenuka chikolo ni ufwatulo wunji. Yalenya A-Yunda.

² Yamba kumeso ja usoko wenyi ni tujita twa Samaria ngwenyi, Wano A-Yunda amokomoko yika analingi? Te kumalikolesa? Te kumalambula yitapo? Te kumamanununa tangwa limuwika? Mahasa kuvumbula mawe mu milumba ya yiswaswa muze hawema?

³ Ka-Amone Tobia te kanamana hamwe nenyi, aye yamba ngwenyi, Chipwe chino anatungu, nyi mukuza manyinaho mapuzula chipanga cho cha mawe.

⁴ Zambi yetu, ivwa, mumu kanatulelesa. Hilwisa sau lio ha mitwe yo ene, ukaakunjike akapwe a kupupa mu chifuchi cha unjize.

⁵ Kanda ufuka uhenge wo; mulonga wo kanda uujimuna kumeso je, mumu hakwihia ku utenu kumeso ja akwa kutunga.

⁶ Chocho twatungile chipanga-cha-mawe, necho cheswe achinungine ndo ku chihanda cha ha muchima cha Chizundamo chacho; mumu te atu apwile ni mbunge ya kukilikita.

⁷ Muze Sambalate, ni Tobia, ni A-Arabia, ni A-Amone, ni A-Ashedode hevwa ngwo, Milimo ya kululika yipanga-ya-mawe ya Yerusaleme yinayi kulutwe, ni yituwa kanaputuka kuyijika, yatenuka chikolo.

⁸ Yatwama punga eswe hamuwika eze akase jita ni A-Yerusaleme akaapinjise.

⁹ Alioze etu twalembele kuli Zambi yetu, ni kusela tulayi mwalwa ni ufuku mumu hali ayo.

¹⁰ A-Yunda yamba ngwo, Tachi ja akwa kututa yiteli hijatepuluka ni yiswaswa yinji yiliko; kashika kutwahashile kutunga chipanga-cha-mawe.

¹¹ Ni akwa kulimika ni yetu yamba ngwo, Kechi kunyingika chipwe kumona, ndo hitwaheta mukachi ko nikwashiha ni kukwika ye milimo yikafwe.

¹² Chikwo nawa, waze A-Yunda atwamine hakachi ko ha kukatuka ku yihela yo nikwizaza, yamba kuli yetu kumi lia yisuho ngwo, Chanutamba kuhiluka kuli yetu.

¹³ Kashika nasele muze mwakuluka kunyima lia chipanga-cha-mawe mu yituwa, ngwami, nasele e atu nikulita ni yisemuko yo, kanakwata tutana, ni makunga, ni mata a manana.

¹⁴ Natalile, mba yingukatuka yingwamba kuli alemu, ni kuli akwa kuyula, ni kuli atu akwo, ngwami, Kanda nwavwila woma. Iwulukenu Mwene, mwe munene kole ni woma, nukase jita hali akwenu, ni ana jenu a malunga ni a mapwo, ni mapwo jenu, ni mazuwo jenu.

¹⁵ Muze akwa kole jetu hevwa chino chuma, ngwe etu hitwanyingika mana jo, ni Zambi halelesa kutaka cho, mba etu eswe twahilukile ku chipanga, mutu mweswe ku milimo yenyi.

¹⁶ Chize ku tangwa lize chihanda cha ha muchima cha atu jami alingile milimo, ni chihanda chikwo cha ha muchima akwachile makunga ni kepwe ni mata, ni mazalo ja utale, ni akwa kuyula akolesele munyachi weswe wa Yunda.

¹⁷ Ni waze atungile chipanga-cha-mawe, ni waze atuchile yiteli, ni waze aatwikile, mutu mweswe ni kwoko limuwika alingile milimo, ni kwoko likwo wakwachile chitwa chenyi.

¹⁸ Ni akwa kutunga mutu mweswe watungile ni katana kenyi wa kuswelela mu zalilo. Mukwa kuhumuna chitavwi aye wamanyine hamuwika ni yami.

¹⁹ Yingwamba kuli alemu, ni kuli akwa kuyula, ni atu akwo, ngwami, Milimo yino yinene, yatoha, ni yetu hitwalitopwola ha chipanga-cha-mawe, umwe mapwa kusuku ni mukwo.

²⁰ Kashika kweswako munuvwila liji lia chitavwi hizombokenuko kuli yetu. Zambi yetu matwashila jita.

²¹ Chocho twakilikichile mu milimo; chihanda cha ha muchima cha atu akwachile makunga chize ku kuvumbuka chimene ndo ku kusoloka cha matongonoshi.

²² Matangwa aze ene yingwamba nawa kuli atu ngwami, Mutu mweswe ni ngamba yenyi apombe mwe mu Yerusaleme hanga akapwe ngwe tulayi kuli yetu ha ufuku, mba ha mwalwa makilikita.

²³ Chocho chipwe yami, chipwe akwetu, chipwe atu jami, chipwe tulayi akwa kungukaula, niumwe hakachi ketu wazulile mazalo jenyi. Mutu mweswe wayile ku meya ni chitwa chenyi mu kwoko.