Nehemia 3 - MUKANDA USANDU WA ZAMBI 1975

¹ Henaho sasendote mukwa lutwe Eliashipe yakatuka ni asasendote ni akwo; yatunga chikolo cha mapanga. Yachisela ku usandu; yamika mapito; ndo lume ku kaposhi ka Hamea yachisela ku usando ndo ku kaposhi ka Hanande.

² Yahatako ha kutunga malunga a Yeriku, mba kuli ayo hikuhata Zakure mwana Imiri.

³ Chikolo cha yishi yachitunga kuli ana ja Hasena. Yasa manguji ni mikambo; yamika mapito jako, ni yikungo yako, ni njalo jako.

⁴ Yahatako ha kutunga Meremote mwana Uriya mwana Koze. Hikuhatako ha kululika Meshulame mwana Mberekia mwana Meshezabele. Hikuhatako ha kululika Zadoke mwana Bana.

⁵ Yahatako ha kululika A-Tekoa, alioze alemu jo kasele kota jo ku milimo ya mwene wo.

⁶ Chikolo chikulu achilulikile kuli Jehoiada mwana Pasea ni Meshulame mwana Besodea. Yasa manguji ni mikambo yako; yamika mapito jako, ni yikungo yako ni njalo jako.

⁷ Yahatako ha kululika Melatia Ka-Ngibeone ni Jadone Ka-Merono, malunga a ku Ngibeone ni a ku Mizepa, a ku chiyulo cha nguvulu sali lize lia Lwiji.

⁸ Yahatako ha kululika Uziele mwana Halahaia, akwa kufula oru. Yahatako ku milimo Hanania umwe wa kuli akwa yitumbo, o akolesele Yerusaleme ndo ku chipanga-cha-mawe chinene.

⁹ Yahatako ku milimo Refaia mwana Hure mukwa kuyula chihanda cha ha muchima cha chifuchi cha Yerusaleme.

¹⁰ Yahatako ku milimo Jedaia mwana Harumafa hatalanganyi ni zuwo lienyi. Yahatako ku milimo Hatuse mwana Hashabania.

¹¹ Malekia mwana Harimi ni Hasube mwana Pahata-moape o yalulika chihanda chikwo hamwe ni kaposhi ka tengo.

¹² Yahatako ha kululika Shalume mwana Halohesha mukwa kuyula chihanda cha ha muchima cha chifuchi cha Yerusaleme, iye te ni anenyi a mapwo.

¹³ Chikolo cha chikulo yachilulika kuli Hanune ni akwa Zanoa. Yachitunga nikumika mapito jako, ni yikungo yako, ni njalo jako, ni kanunu ka mbandu ja chipanga-cha-mawe ndo ku chikolo cha pinga.

¹⁴ Chikolo cha pinga yachilulika kuli Malekia mwana Rekabe, mukwa kuyula chifuchi cha Mbete-hakereme. Yachitunga ni kumika mapito jako, ni yikungo yako, ni njalo jako.

¹⁵ Chikolo cha fuji lia meya yachilulika kuli Shalume mwana Kole-hoze, mukwa kuyula chifuchi cha Mizepa. Yachitunga ni kuchifuka ni kumika mapito jako, ni yikungo yako, ni njalo jako, ni chipanga-cha-mawe cha ku Chitende cha Shiloa hakamwihi ni munda wa mwanangana ndo ku ukandukilo uze wa kupalumukina ku chihunda cha David.

¹⁶ Yahatako ha kululika Nehemia mwana Azubuku, mukwa kuyula chihanda cha ha muchima cha chifuchi cha Mbete-Zure, ndo hatalanganyi ni mafuka a David, ni ndo ku Chitende chize alingile, ni ku zuwo lia akwa ndundo.

¹⁷ Yahatako ha kululika A-Levi; Rehume mwana Mbani. Yahatako Hashabia, mukwa kuyula chihanda cha ha muchima cha chifuchi cha Kela, ngwami, ha chifuchi chenyi.

¹⁸ Yahatako usoko wo, Bavaia mwana Henadade, mukwa kuyula chihanda cha ha muchima cha chifuchi cha Kela.

¹⁹ Yahatako ku milimo Ezere mwana Yeshua, mukwa kuyula Mizepa. Yalinga chihanda chikwo hatalanganyi ni jila ya kukanduka ku zuwo lia yikungo ha chihata cha yipanga-ya-mawe.

²⁰ Hikuhatako Baruke mwana Zabaia, yalulika chihanda chikwo ni mbunge yeswe, chize ku chihata cha yipanga-ya-mawe ndo ku chikolo cha zuwo lia sasendote mukwa lutwe Eliashipe.

²¹ Hikuhatako Meremote mwana Uriya mwana Koze, yalulika chihanda chikwo, chize ku chikolo cha zuwo lia Eliashipe ndo ku songo lia zuwo lia Eliashipe.

²² Yahatako ku milimo asasendote malunga ja chana.

²³ Hikuhatako Mbenjamine ni Hasube, yalulika hatalanganyi ni zuwo lio. Hikuhatako Azaria mwana Maseia mwana Anania sali lia zuwo lienyi mwene.

²⁴ Yahatako Binui mwana Henadade, yalulika chihanda chikwo, chize ku zuwo lia Azaria ndo ku chihata cha yipanga-ya-mawe ni ndo ku mbango.

²⁵ Palale mwana Uzai yalulika hatalanganyi ni chihata cha yipanga-ya-mawe ni ku kaposhi yoze watunda ku zuwo lia mwanangana ku tunda, kwe ku yize ya tulayi. Yahatako ku milimo Pedaia mwana Paroshe.

²⁶ (Achi A-Netinime yatwama mu Ofele kuze kwatalanganyi ni chikolo cha meya ku Chivumbuko ni kaposhi yoze watunda.)

²⁷ Yahatako A-Tekoa, yalulika chihanda chikwo hatalanganyi ni kaposhi munene watunda, ni ku chipanga-cha-mawe cha Ofele.

²⁸ Helu lia chikolo cha tuvwalu asasendote yalulika, mutu mweswe hatalanganyi ni zuwo lienyi.

²⁹ Hikuhatako Zadoke mwana Imere, yalulika hatalanganyi ni zuwo lienyi. Yahatako ku milimo Shemaia mwana She kania kalayi ka chikolo cha Chivumbuko.

³⁰ Yahatako Hanania mwana Shelemia ni Hanune mwana wamuchisambano wa Zalafe, yalulika chihanda chikwo. Yahatako Meshulame mwana Mberekia, yalulika hatalanganyi ni chipatulo chenyi.

³¹ Yahatako Malekia, umwe wa fuli ja oru, yalulika ndo ku zuwo lia A-Netinime ni lia akwa kusepa, hatalanganyi ni chikolo cha Hamifikade ndo ku ukandukilo wa mbango.

³² Hakachi ka ukandukilo wa mbango ni chikolo cha mapanga yalulika fuli ja oru ni akwa kusepa.