Nehemia 2 - MUKANDA USANDU WA ZAMBI 1975

¹ Ha kakweji wa Nisane ha mwaka makumi aali wa mwanangana Artasherke, shimbu kwapwile vinyu kumeso jenyi, yingwanda vinyu, yinguhana kuli mwanangana. Ndo tangwa lize te kanda ngusoloka ni chinyengo kumeso jenyi.

² Mwanangana yamba kuli yami ngwenyi, Kuchi te uli ni chinyengo ku meso je se kuwayijile? Acho chinyengo cha mu mbunge, hi chuma cheka ko. Aho nevwile woma wunji.

³ Yingwamba kuli mwanangana ngwami, Vulie, mwanangana. Te chichi kupwa ni chinyengo ku meso, shimbu chihunda kuze kwatwama mafuka ja tulamba twami chapwa cha hululu, ni yajilo yako hiyinaweme ni kahia?

⁴ Mba mwanangana yamba kuli yami ngwenyi, Yika unazange kwita? Kashika yingulemba kuli Zambi ya mwilu.

⁵ Yingwamba kuli mwanangana ngwami, Nyi chinanupemena mwanangana, ni yami kavumbi kenu hinawana vumbi kumeso jenu, ngunazange nungutume ku Yunda, ku chihunda cha mafuka ja tulamba twami, ngukachitunge.

⁶ Mwanangana yamba kuli yami (mwazovu te kanatwama hamuwika) ngwenyi, Wenyi we wa tukweji angahi? Mwiji muka muhiluka? Chocho chapemena mwanangana kungutuma, mba namushikile haze munguhiluka.

⁷ Yingwamba nawa kuli mwanangana ngwami, Nyi chinanupemena mwanangana, angwehe mikanda kuli akwa kuyula sali lize lia Lwiji akangutayize kupalika ndo ku Yunda,

⁸ ni mukanda kuli Asafwe, kalayi ka usaki wa mwanangana, akangwehe mitondo ya manguji ni mikambo ya yajilo ya mbonge yize yatwala ku zuwo, ni ya chipanga-cha-mawe cha chihunda, ni ya zuwo lize mungutwama yami. Mba mwanangana yangutayiza nikulita ni kwoko lipema lia Zambi yami hali yami.

⁹ Chocho nejile kuli akwa kuyula lize sali lia Lwiji. Yingwaaha mikanda ya mwanangana. Mwanangana aye hatuma ni yami tupitau twa tujita ni akwa tuvwalu.

¹⁰ Mba muze Ka-Horone Sambalate, ni Ka-Amone Tobia mwe ndungo achivwile yichaapihila kuhiana kunyonga ngwo, Hikweza umwe lunga kufupa kuwahisa A-Izalele.

¹¹ Chocho yingwiza ku Yerusaleme ni kutwamako matangwa atatu.

¹² Yingukanduka ha ufuku, yami ni malunga amwe hamuwika. Chalwezele niumwe chize Zambi yami hasa mu mbunge yami kulinga ha Yerusaleme; chipwe umwe chimuna chishi nenyi hamwe ni yami shina yoze nanyinyine.

¹³ Yingutuhuka ha ufuku ku chikolo cha chikulo kutalikisa ku shima lia mikuza, ni ku chikolo cha pinga, nikutala yipanga-ya-mawe ya Yerusaleme, hiyinapuzuka ni yajilo yayo hiyinaweme ni kahia.

¹⁴ Mba yinguhiana ndo ku chikolo cha fuji lia meya ni ku Chitende cha mwanangana; alioze chimuna yoze nanyinyine kawanyine kuze mapalikila.

¹⁵ Mba yinguya ha ufuku ku chitwetwe nikutala chipanga-cha-mawe. Chocho yingulijinga ni kunjila nawa ku chikolo cha chikulo, hinguhiluka.

¹⁶ Akwa kuyula kanyingikine kuze nayile, chipwe chize nalingile. Chipwe kuli A-Yunda kanda nguchialwezacho, chipwe kuli asasendote, chipwe akwa lutwe, chipwe akwa kuyula, chipwe akwo waze alingile milimo.

¹⁷ Henaho nambile kuli ayo ngwami, Nunamono chipi chize twatwama nacho, chize Yerusaleme hiyinapuzuka, ni yajilo yako hiyinaweme ni kahia. Tuyenu tutunge chipanga-cha-mawe cha Yerusaleme, kanda tupwa nawa ngwe twasauka.

¹⁸ Naambulwilile ha kutwala ku kwoko lia Zambi yami lize liapwile lipema hali yami, ni maliji nawa aze mwanangana wahanjikile ni yami. O yamba ngwo, Tukatukenu, tutungenu! Chocho atakamishine moko jo ha milimo yipema.

¹⁹ Alioze muze Ka-Horone Sambalate, ni Ka-Amone Tobia mwe ndungo, ni Ka-Arabia Ngesheme yachivwa yatuseha ni lenyo, yatulelesa nikwamba ngwo, Chino munulinga chika? Te munukatukila mwanangana?

²⁰ Mba naakumbulwile ngwami, Zambi ya mwilu iye kumatuwahisa, kashika yetu tuvumbi twenyi mutukatuka tutunge, alioze yenu kunushi chihanda, chipwe chiyulo, chipwe chinyingi mu Yerusaleme.