Nehemia 13 - MUKANDA USANDU WA ZAMBI 1975

¹ Ha tangwa lize yatanga mu mukanda wa Mose kumeso ja atu eswe, yawanamo kuze asonekene ngwo, Ka-Amone hanji Ka-Moape kechi kanjila mu chikungulwila cha Zambi ndo ku miaka ya mutolo;

² mumu kapatwijile A-Izalele ni kulia ni meya, ahoze afwetele Mbalau akaashinge. Alioze Zambi walumwine shingo mu chiwape.

³ Ha kwivwa shimbi yahandununa kuli A-Izalele mbunga yeswe ya kuchinga.

⁴ Shimbu-kanda te, mwe sasendote Eliashipe, yoze amusele kuyula helu lia yipatulo ya zuwo lia Zambi yetu, walifutwile ni Tobia.

⁵ Halingila Tobia chipatulo chimwe chinene, chize te chapwile cha kutulikila milambu ya wunga, ni libano, ni yikwachilo, ni yihanda ya kumi ya mbuto, ni vinyu, ni maji, yize ayihanyine nikulita ni shimbi kuli A-Levi, ni njimba, ni akwa mapito; ni milambu ya kuzundula ya asasendote.

⁶ Shimbu lino lieswe yami te chapwile ku Yerusaleme, mumu ha mwaka makumi atatu ni wamuchiali wa Artasherke nayile ku Babilonia kuli mwanangana. Mba kulutwe lia matangwa nechile kuli mwanangana;

⁷ nejile ku Yerusaleme mba changulumbunukine chipi chize Eliashipe halinga ha kusela Tobia chipatulo mu yize ya zuwo lia Zambi.

⁸ Yichinguvwisa chinyengo chinji, kashika yingumbila yikashi yeswe ya Tobia nikuyikatwisa mu chipatulo chize.

⁹ Naahele shimbi, mba yapemesa ye yipatulo; yinguhilwisamo yikwachilo ya zuwo Iia Zambi, hamwe ni milambu ya wunga ni libano.

¹⁰ Yingumona nawa yihanda ya A-Levi kaaheleyo, kashika A-Levi ni njimba akwa milimo hanayi mutu mweswe ku munda wenyi.

¹¹ Yingusopa ni akwa kuyula ngwami, Kuchi te hanehuka zuwo lia Zambi? Yingwakungulula nikwasela muma mwo.

¹² A-Yunda eswe yaneha chihanda cha kumi cha mbuto ni vinyu ni maji ku mazuwo a upite.

¹³ Yingusela akwa kufunga upite; sasendote Shelemia ni mukwa kusonyeka Zadoke; kuli A-Levi, Pedaia. Kwahata ayo kwapwile Hanane mwana Zakure, mwana Matania, mumu aamwene atu a jika, mba milimo yo yapwile ya kupangila kuli akwo.

¹⁴ Zambi yami! Ungwiwuluke kama ha chuma chino; kanda ukajimuna yitanga yami yipema yize nalingila zuwo lia Zambi yami ni ha shimbi jalio jeswe.

¹⁵ Ha matangwa aze yingumona mu Yunda amwe akwa kuliachila uva ha tangwa lia Sambata, ni kucha yichita ya mbuto, nikuyitwika hali yimbulu, hamwe ni vinyu, ni uva, ni makuyu, ni yiteli yeka ni yeka, nikuyineha mu Yerusaleme ha tangwa lia Sambata. Yingwashindakenyacho ha tangwa lize alanjishile kulia.

¹⁶ Kwapwileko nawa malunga a Teru, o apwile nikuneha yishi ni yuma yeswayo yakutalika, nikuyilanjisa ha Sambata kuli A-Yunda ni mu Yerusaleme.

¹⁷ Nasopele ni alemu ja A-Yunda ngwami, Chuma chino chipi nunalingi kuchi? Nunajilula tangwa lia Sambata.

¹⁸ Tulamba twenu alingile chocho mba, ngwami, Zambi watukokelele lamba lino lieswe hali yetu ni ha chihunda chino. Hindu munukokela A-Izalele utenu nawa ukwo ha kujilula Sambata.

¹⁹ Muze kwatayile ku yikolo ya Yerusaleme ha kuheta ku Sambata yingwamba akájile mapito, yingwamba nawa kanda aazulula ndo Sambata hiyapalika. Nasele amwe ngamba jami kuyula yikolo hanga kanda apalikisamo nichimwe chiteli ha tangwa lia Sambata.

²⁰ Chocho yitalika ni akwa kulanjisa yapomba haze lia Yerusaleme kashi kaali.

²¹ Mba yingwashindakenya ngwami, Kuchi te nwakupomba kwa kujingilika chipanga-cha-mawe? Nyi munuchilinga nawa mungunulamba. Chize ku tangwa lize kejile nawa ha Sambata.

²² Yingwamba A-Levi alipemese, eze afunge mapito akasele ku usandu Sambata. Zambi yami Wiwuluke chino chuma nawa kuli yami ukangufunge nikulita ni unene wa utu wa zango lie.

²³ Ha matangwa aze nawa yingumona amwe A-Yunda hambata mapwo a ku Ashedode, ni Amone, ni Moape,

²⁴ ni ana jo ahanjikile nikuchinga chihanda cha limi lia Ashedode; kahashile kuhanjika limi lia A-Yunda alioze mweswe wahanjikile mu limi lia atu jenyi.

²⁵ Yingulitachika no, nikwashinga, nikulamba amwe, ni kusuta kambu jo, nikwashingisa ni Zambi ngwami, Kunuchi kuhana anenu a mapwo kuli anó a malunga, chipwe kumbata anó a mapwo hali anenu a malunga hanji hali yenwene.

²⁶ Ngwami, Solomone mwanangana wa Izalele wavulumwine ni wano. Hakachi ka mavungu anji kukwapwile mwanangana walita nenyi. Zambi yenyi wamuzangile, ni Zambi wamupwishile mwanangana wa A-Izalele eswe. Hindu chipwe chocho mapwo yilambala amuvulumwishine.

²⁷ Mba mutunutayiza kulinga chipi chino cheswe kuvulumuna Zambi yetu ha kumbata mapwo yilambala?

²⁸ Umwe wa ana a malunga ja Joiada mwana Eliashipe mwe sasendote mukwa lutwe, aye te hambata mwana wa Sambalate Ka-Horone. Aye namuhumine lume.

²⁹ Ewuluke Zambi yami, mumu hachisa usasendote, ni usendo wa usasendote, ni wa A-Levi.

³⁰ Chocho naapemesene kuli yilambala eswe; nasele milimo ya asasendote ni A-Levi, mutu mweswe ni milimo yenyi;

³¹ ni ha mulambu wa kunyi ha matangwa jajo, ni ha mbuto yitangu. Zambi yami, ungwiwuluke kama, unguwahise.