Nehemia 12 - MUKANDA USANDU WA ZAMBI 1975

¹ Asasendote ni A-Levi ayile ni Zorobabele mwana Salatiele, ni Yeshua: Seraia, ni Jeremia, ni Ezera;

² ni Amaria, ni Maluke, ni Hatuse;

³ ni Shekania, ni Rehume, ni Meremote;

⁴ ni Ido, ni Ginetone, ni Abija;

⁵ ni Mijamine, ni Madia, ni Biliga;

⁶ ni Shemaia, ni Joaribe, ni Jedaia;

⁷ ni Salu, ni Amoke, ni Hilekia, ni Jedaia. Wano te akwa lutwe ja asasendote ni usoko wo ha matangwa ja Yeshua.

⁸ Kwapwile nawa A-Levi: Yeshua, ni Binui, ni Kamiele, ni Sherebia, ni Yunda, ni Matania yoze wasongwelele kusakwila, iye ni usoko wenyi.

⁹ Bakubukia ni Uni nawa, usoko wo, amanyine hatalanganyi no mu uvumbiko.

¹⁰ Yeshua yasema Joiakime; Joiakime yasema Eliashipe; Eliashipe yasema Joiada;

¹¹ Joiada yasema Jonatas, Jonatas yasema Jadua.

¹² Ha matangwa a Joiakime kwapwile asasendote akwa lutwe mu minyachi ya atato: wa Seraia, Meraia; wa Jeremia, Hanania;

¹³ wa Ezera, Meshulame; wa Amaria, Jehohana;

¹⁴ wa Maluke, Jonatas; wa Shebania, José;

¹⁵ wa Harimi, Adana; wa Meraiote, Helekaia;

¹⁶ wa Ido, Zekaria; wa Ginetone, Meshulame;

¹⁷ wa Abija, Zikiri; wa Miniame wa Moadia, Pilitaia;

¹⁸ wa Biliga, Shamua; wa Shemaia, Jehonatane;

¹⁹ wa Joaribe, Matenaia; wa Jedaia, Uzi;

²⁰ wa Salaia, Kalaia; wa Amoke, Epere;

²¹ wa Hilekia, Hashabia; wa Jedaia, Netanele.

²² Ha matangwa a Eliashipe, ni Joiada, ni Johanane, ni Jadua, A-Levi, aasonekene akwa lutwe mu minyachi ya atato. Ni asasendote chocho nawa ha miaka ya kuyula Ka-Persia Dariu.

²³ A-Levi akwa lutwe mu minyachi ya atato aasonekene mu mukanda wa sango ndo ku matangwa a Johanane mwana Eliashipe.

²⁴ Akwa lutwe ja A-Levi: Hashabia, ni Sherebia, ni Yeshua mwana Kamiele, ni usoko wo hatalanganyi no, kuhalisa ni kusakwila nikulita ni shimbi ja mutu wa Zambi David; ngango hatalanganyi ni ngango.

²⁵ Matania, ni Bakubukia, ni Obadia, ni Meshulame, ni Talmone, ni Akube apwile akwa mapito a kufunga machila a ku yikolo.

²⁶ Achi ha matangwa ja Joiakime mwana Yeshua mwana Jozadake, ni ha matangwa ja Nehemia mukwa kuyula, ni ja sasendote Ezera mukwa kusonyeka.

²⁷ Ha kusela ku lisandu chipanga-cha-mawe cha Yerusaleme afupile A-Levi kweswako atwamine nikwaneha ku Yerusaleme akachisele ku usandu ni kulikwiza ni kusakwila, ni kwimba nawa ni sembalu, ni yisaji ya kusa, ni tulialia.

²⁸ Ana ja njimba akungulukile, nikukatuka ku chana cha kujingilika Yerusaleme, ni ku yihunda ya A-Netofate.

²⁹ Akatukile ku Mbete-Ngilingali nawa, ni ku minda ya Ngeba ni Azmave, mumu njimba te halitungila yihunda kwa kujingilika Yerusaleme.

³⁰ Asasendote ni A-Levi yalipemesa; yapemesa nawa e atu, ni mapito, ni chipanga-cha-mawe.

³¹ Mba yinguneha alemu ja A-Yunda ha chipanga-cha-mawe. Yingutongola mbunga jinene jiali akwa kusakwila ja kwenda chizechene mu wunji wajo, yimwe yiyiya ha sali lia chindume ha chipanga kutalikisa ku chikolo cha pinga.

³² Kwaakawile Hoshaia ni chihanda cha ha muchima cha alemu ja A-Yunda,

³³ ni Azaria, ni Ezera, ni Meshulame,

³⁴ ni Yunda, ni Mbenjamine, ni Shemaia, ni Jeremia,

³⁵ ni amwe a kuli ana ja asasendote ni yitavwi: Zekaria mwana Jonatas, mwana Shemaia, mwana Matania, mwana Mikaia, mwana Zakure, mwana Asafwe,

³⁶ ni usoko wenyi Shemaia, ni Azarele, ni Milalaia, ni Gilalaia, ni Maia, ni Netanele, ni Yunda, ni Hanani, ni yisaji ya David mutu wa Zambi; ni mukwa kusonyeka Ezera kulutwe lio.

³⁷ Yaya ndo ku chikolo cha fuji lia meya ndusu kulutwe yakanduka ku ukandukilo wa chihunda cha David, ku kukanduka cha chipanga helu lia zuwo lia David ndo ku chikolo cha meya kwatalikisa ku Chivumbuko.

³⁸ Mbunga yikwo ya akwa kusakwila yalijinga kutakana no, ni yami kwakaula ni chihanda chikwo cha atu ha chipanga-cha-mawe helu lia kaposhi ka tengo ndo ku chipanga chinene cha mawe.

³⁹ Yituya ndusu helu lia chikolo cha Eframe, ni chikolo chikulu, ni chikolo cha yishi, ni kaposhi ka Hananele, ni kaposhi ka Hamea ndo ku chikolo cha mapanga. Yamana lume ku chikolo cha tulayi.

⁴⁰ Chocho mbunga jiali jamanyine ja waze akusakwila mu zuwo lia Zambi, ni yami, ni chihanda cha ha muchima cha akwa kuyula hamuwika,

⁴¹ ni asasendote Eliakimi, ni Maseia, ni Miniame, ni Mikaia, ni Elionai, ni Zekaria, ni Hanania, eswe ni yitavwi;

⁴² ni Maseia ni Shemaia, ni Eleazare, ni Uzi, ni Jehohana, ni Malekia, ni Elame, ni Ezere. Njimba yemba ni tachi ni kasongo ko Jezraia.

⁴³ Yalambula milambu yinene tangwa lize nikulikwiza; mumu Zambi waahele kulikwiza cha uwahililo unene. Ni mapwo ni ana nawa yalikwiza; chocho uwahililo wa Yerusaleme yawivwa chipwe kusuku.

⁴⁴ Ha tangwa lize yatongola malunga kuyula mazuwo a upite; ha milambu ya kuzundula, ni mbuto yitangu, ni yihanda ya kumi kuyikunga nikulita ni minda ya yihunda, yihanda yize ayifunjikile mu shimbi hali asasendote ni A-Levi; mumu A-Yunda awahilile hali asasendote ni A-Levi akwa uvumbiko.

⁴⁵ O yalinga milimo ya Zambi yo, ni milimo ya kupemesa, chimuwika ni njimba, ni akwa mapito, nikulita ni shimbi ja David ni mwanenyi Solomone.

⁴⁶ Mumu ha matangwa a David ni Asafwe kushi, kwapwile umwe kasongo ka njimba, ni mimbo ya uhaliso ni kusakwila kuli Zambi.

⁴⁷ Ha matangwa a Zorobabele ni a Nehemia nawa, A-Izalele eswe ahanyine yihanda ya njimba ni akwa mapito nikulita ni tangwa ha tangwa. Yasela ku usandu hali A-Levi, ni A-Levi yasela ku usandu hali ana ja Arone.