Nehemia 1 - MUKANDA USANDU WA ZAMBI 1975

¹ Maliji a Nehemia mwana Hakalia. Chapwile ha kakweji wa Chisleve ha mwaka makumi aali, napwile mu zuwo lia mwanangana ku Shushane,

² umwe mukwetu Hanani wejile ni amwe akwo a ku Yunda. Naahulile ha kutwala kuli A-Yunda waze apulukile, asalile kuli akwa unjize, ni ha kutwala ku Yerusaleme.

³ Yangulweza ngwo, Masalila waze a ku unjize aliko mu chifuchi kanatwama mu huli ni sau. Chipanga-cha-mawe cha Yerusaleme nawa chapuzuka ni yajilo yacho hiyawema ni kahia.

⁴ Ha kwivwa maliji ano natwamine hashi nikulila nikulinyenga matangwa lume. Chatambwile kulia; nalembele kumeso ja Zambi ya mwilu,

⁵ ngwami, Ngunalembe, Yehova Zambi ya mwilu, Zambi munene, kole ni woma. Kuwakukolesa usendo ni utu wa zango kuli waze akukuzanga nikufunga shimbi je.

⁶ Matwi je akapanjike; meso je akatale, wivwe kulemba cha yami kavumbi ke, chino ngunalembe kumeso je haliapwila, mwalwa ni ufuku, hali tuvumbi twe A-Izalele, shimbu ngunashikisa milonga ya A-Izalele yize hitwakuvulumuna; ewa, ni yami ni munyachi wa tata hitwavulumuna.

⁷ Hitwalinga ni uhulia kuli yena, kutwafungile shimbi, chipwe yiyulo, chipwe upatwilo, yize watumine kavumbi ke Mose.

⁸ Ngunalembe, iwuluka liji lize watumine kavumbi ke Mose ngwe, Nyi munuvulumuna mungunumwanga hakachi ka mavungu.

⁹ Alioze nyi munuhiluka kuli yami ni kufunga shimbi jami ni kujilinga, chipwe akwa kumwangana haya ku masongo a hashi, hindu mungwachizako ni kwaneha kuma kuze binatongola kusako jina liami.

¹⁰ Ngwami, Wano tuvumbi twe ni atu je hiwakula ni ngolo je ni kwoko lie lia tachi.

¹¹ Mwene, ngunalembe, twitwi lie Ukapanjike ku kulemba cha yami kavumbi ke ni ku kulemba cha tuvumbi twe waze akwivwa chiseke ha kulemesa jina lie. Wahisa kama yami kavumbi ke musono, ngunalembe, ukangwehe keke kumeso ja yono lunga. Mumu napwile mukwa kuhana musenge kuli mwanangana.