Nahume 3 - MUKANDA USANDU WA ZAMBI 1975

¹ Lamba ku chihunda cha manyinga, cha tò ni mahuza ni upite wa kupupa— yuma ya kupunda kechi kuhasa kuyalula!

² Liji lia shikote, kunuma cha maroda; tuvwalu kanazomboka; matemba kanatumbwoka.

³ Akwa tuvwalu kanalundumuka ni tutana kupeyima, ni makunga kulejima. Mbunga ya afu, milumba ya mijimba, mijimba ya afu ni kuyalula ka— kakutalinga ha mijimba!

⁴ Chino cheswe chinakatuka ku ukoi wa mwe chikoi yoze mupema; kali ni uleza wa kushihisa. Kakuhandukulula mavungu ni ukoi wenyi; kakuhandukulula atu ni uleza wenyi.

⁵ Yehova-wa-Tujita kanambe ngwenyi, Kunalimika ni yena, kashika mungukufukula mahina je ndo ku meso, hanga mavungu amone uselesele we ni mawanangana amone sonyi je.

⁶ Mungukukuwa luchisa; mungukusaula; mungukupwisa chitaletale lume.

⁷ Waze eswe makumona makususukila ngwo, Ninive hanamwenyeka, iya mamulila? Kulihi mungumufupila akwa kumulembejeka?

⁸ Ena te wapema kuhiana No-Amone yoze Watwamine ku Nilo wa kujingilika ni meya, yoze watengele kalunga-lwiji chipanga chenyi, ni meya apwile lusaso wenyi, nyi?

⁹ Etiopia yapwile tachi jenyi ni Engitu nawa, ni songo liakuhi ku tachi. Ni Pute ni A-Lubimi apwile yikwashi jenyi.

¹⁰ Hindu yamutwala; yaya ku ufunge. Anenyi akepe yaahwotola ku mitwe ku malindalinda ja matapalo eswe. Malunga jenyi alemu yaatela chela; malunga jenyi anene aakashile malenge.

¹¹ Ni yena nawa mukazengewa; mukevwa chishete; mukafupa chiswamo kuli akwa kole.

¹² Yihunda yenu yeswe ya kukolesa yapwa ngwe mikuyu ya mihuko yitangu kuhia nyi mayinyika mihuko muyiholoka mu kanwa lia mukwa kulia.

¹³ Tujita twenu hapwa ngwe mapwo hakachi kenu. Yikolo ya chifuchi chenu yapwa yawashi kuli akwa kole jenu. Njalo jenu hijawema ni kahia.

¹⁴ Tahenu meya ha jita ya kuseleka; kolesenu yihunda yenu ya tachi. Yénu ku uma, chakenu ndambo, kwatenu ku forma ya ndope.

¹⁵ Kwenako kahia mukanulalisa, ni katana manutetaho. Manulia ngwe makumbi. Liokesenu ngwe makumbi; okenu ngwe mapasu.

¹⁶ Okesele akwa kutalika jenu kuhiana matongonoshi a mwilu. Makumbi kanatande mapulwa jo, kanahumuka!

¹⁷ Alemu jenu anapu ngwe mapasu; akwa kusonyeka jenu ngwe malelwa ja makumbi waze akupwila ha yipanga ha tangwa lia chishika. Ha kuvumbuka tangwa, kakuhumuka; niumwe manyingika kuze anayi.

¹⁸ Mwanangana wa Asuria, tufunga twe mu tulo ali; alemu je kananongwoka. Atu je hanamwangana ha milundu ni akwa kwakunga akuhi.

¹⁹ Yikola ye kuyichi katepuluka; mbandu ye yipi chikolo. Waze eswe anevu lusango we kanasakwila koshi, mumu iya yoze katambwile chipi che chize kuchishi kahwa?