Nahume 2 - MUKANDA USANDU WA ZAMBI 1975

¹ Mukwa kupalwola heza kulimika ni yenu. Fungenu yipanga; layilenu ha tapalo; lijichikenu mu mazalilo; takamenu.

² (Mumu Yehova kanahilwisa nawa ulamba wa Yakomba ngwe ulamba wa Izalele. Se yingumba hanaahulula ni kulumbula mitango yo.)

³ Kepwe ja akwa ndundo jenyi jachila; maswalale jenyi kanazala ngengu. Matemba jo a jita kanalejima ngwe kahia muze maakungulula mu mikana. Tuvwalu kanasambe.

⁴ Matemba-a-jita kanachungula mu matapalo, kanalihiji ku malindalinda, kanatemuka ngwe masoka a kahia, kanazomboka ngwe mihenyo.

⁵ Tupitau kanaasanyika; kanayi nikutalinga; nikutambuka ahete ku chipanga-cha-mawe; kanalulika chitamba cha jita.

⁶ Yikolo ya ku lwiji hanayazulula ni akwa palasiu kanatatajala.

⁷ Huzabe yayo kanamufukula nikumumbata. Ndungo jenyi ja mapwo kanalili lungungu, nikulishimwoka ngwe tutele nikulilambalamba ha pambo ni chinyengo.

⁸ Ninive hiyalumuka ngwe Chitende meya jacho hachina. Kakuteta ngwo, Manenu! Manenu! Alioze niumwe Natewulukile.

⁹ Pundenu prata! pundenu oru! Upite wa kulumbama uliko kuushi kuhwa ni upite wa yuma yeswe yilemu.

¹⁰ Cheswe cha hululu! Cha kwenyeka ni kulumbula! Mbunge jinalezumuka ni makungunwa kanachikima. Misongo yakwata ku miongo yeswe; meso eswe analumuka a woma.

¹¹ Chivwenge cha ndumba Chilihicho? Wendelo wa mievu ja ndumba ulihiwo? Kuze te ndumba wapwile nikuneha yifwo yenyi, kuze kwatwamine ana jenyi mba niumwe mahasa kwasunga.

¹² Mwe ndumba wapapulwile ya kulumbama hali ana jenyi; wawondele kulia hali yihwo jenyi; wazalishile yivwenge yenyi ni yifwo ya kushiha; wazalishile mena jenyi ni musunya wa kupapulula.

¹³ Yehova-wa-Tujita kanambe ngwenyi, Kunalimika ni yenu. Kashika mungwocha matemba jenu a jita ni mwishi, ni katana malia mievu jenu a ndumba. Munguteta kulia chenu hashi, ni liji lia mikeji jenu kechi kalivwa nawa.