Nahume 1 - MUKANDA USANDU WA ZAMBI 1975

¹ Liji liakutwala ku Ninive. Mukanda wa usolwelo wa Nahume wa ku Elekoshe.

² Yehova iye Zambi ya ukwa, mukwa kukala milonga. Yehova mukwa kukala milonga ni ufwatulo. Yehova kakufwetesa akwa kulimika nenyi; akwa kole jenyi kakwatulikila ufwatulo wenyi.

³ Yehova mukwa makoke kutenuka, alioze ndundo jenyi jinene. Yehova kechi kuhasa kusambisa akwa kuhia, chipwe hakehe. Jila yenyi yili mu chijimbi ni mu kangonga; malelwa o fufuta ya ku yiliato yenyi.

⁴ Kakukanjisa kalunga-lwiji ni kumuumisa; kakuumisa njiji jeswe. Mbashane ni Karmela kuyakulila, ni yitemo ku Lebano kuyakuma.

⁵ Milundu kuyakuchikima kumeso jenyi ni mindundena yakusangunuka. Hashi kuhakwalumuka ha hululu kumeso jenyi; ni muno-muze ni enyamo eswe.

⁶ Iya mahasa kulikoleza ku ufwatulo wenyi? Iya mahasa kujikiza mu chivukuminya cha utenu wenyi? Kakuzukula ufwatulo wenyi ngwe kahia; kakupula ndusu yimawe.

⁷ Yehova iye mupema; ha tangwa lia lamba kapwa ngwe chihunda cha kukolesa; kananyingika waze akuswamina muli iye.

⁸ Alioze makasulisa liakulu akwa kulimika nenyi ni sanga lia kusupwokela. Makahanga akwa kole jenyi ndo mu milima.

⁹ Yehova nunamutwama punga kuchi? Iye kumakapatula kamuwika kunahu; kechi kalamba kaali.

¹⁰ Kakwalalisa ngwe mikalale ya kuliselieka. Shimbu machizengewa makaalalisa ngwe mwambu umu.

¹¹ Te kukwatuhukile hakachi kenu umwe mukwa kutakila yipi Yehova, nikulongesa ungulungulu?

¹² Yehova kanambe ngwenyi, Chipwe mapwa akwa tachi anji hindu makasutuka, makajimuka. Chipwe hinanuyindamisa, chichi kanuyindamisa nawa.

¹³ Mba haliapwila mungunumakwina kanga yenyi nikupula mihipu yenu ndusu.

¹⁴ Yehova hahana shimbi ha kutwala kuli yena ngwenyi, Kechi kulindulula jina lie nawa. Ku zuwo lia mazambi je munguteta tuponya twa kwola ni tuponya twa kuzuzulula. Mungufula fuka lie mumu uli mukwa luchisa.

¹⁵ Talenu ha milundu molu ja mukwa kuneha lusango mupema; kakwambujola sambukila. Enu A-Yunda fungenu yiwanyino yenu. Linga yilakenyo yenu ya shingo, mumu chingulungulu kechi keza kulimika ni yenu nilimwe tangwa; hamutetaho.