Mika 5 - MUKANDA USANDU WA ZAMBI 1975

¹ Ena mwana-pwo wa yihuji, likungulule mu yihuji mumu hanatuseleka. Mukwa kuyula Izalele makamulamba ha tafu ni mbwechi.

² Alioze yena Mbeteleme Efrata, mukepe Wahiana hakachi ka minyachi ya Yunda, kuli yena kumukungutuhukila umwe yoze makapwa mukwa kuyula Izalele. Chikota chenyi cha ku miaka, kwe ku shakulu.

³ Kashika kumakaakunjika ndo mwaka uze mukwa kufumbajala hasema. Henaho masalila ja usoko wenyi makahiluka kuli atu ja Izalele.

⁴ Kumakamana nikulisa mbunga yenyi ya mapanga mu tachi ja Yehova; mu ulamba wa jina lia Yehova Zambi yenyi. O kumakatwama kawape, mumu henaho iye kumakapwa munene ndo ku masongo a hashi.

⁵ Mba yono makapwa sambukila, muze A-Asuria makanjila mu chifuchi chetu nikuliata ha mavu jetu, se yetu mutukasolola kulimika nenyi tufunga shimbiali ni alemu ja atu nake.

⁶ O makayula chifuchi cha Asuria ni katana, ni chifuchi cha Nimorote machiyula ni katana wa kutomona. Makatupulula kuli A-Asuria muze manjila mu chifuchi chetu nikuliata muchima lia njiza yetu.

⁷ Henaho masalila ja Yakomba makapwa hakachi ka mavungu anji ngwe mume wa kuli Yehova; ngwe vula ha mwambu yoze kazeyele kuli atu chipwe kutwaminyina atu.

⁸ Masalila ja Yakomba makapwa hakachi ka mavungu. Makapwa hakachi ni hakachi ka mavungu anji, ngwe ndumba hakachi ka tushitu a mu musenge; ngwe mwevu wa ndumba hakachi ka mbunga ja mapanga, yoze ha kupalika kakuliata nikupapulula, ni yoze mapulula wakuhi.

⁹ Munukazundula kwoko lienu hali akwa kulimika, ni akwa kole jenu eswe munwatetaho.

¹⁰ Yehova kanambe ngwenyi, Ha tangwa lize mungukateta tuvwalu twenu hakachi kenu nikwonwona matemba jenu a jita.

¹¹ Mungukateta yihunda yenu yeswe mu chifuchi chenu, nikupuzula yihunda yenu ya kukolesa.

¹² Mungukatetaho wanga mu chifuchi chenu, kunuchi kapwa nawa ni tahi.

¹³ Mungukatetaho tuponya twenu ni manguji jenu hakachi kenu. Kunuchi kahetamina nawa ku yitanga ya moko jenu.

¹⁴ Mungutukula Ashera jenu hakachi kenu, nikwonwona yihunda yenu.

¹⁵ Ni utenu ni ufwatulo mungufwetesa mavungu aze kononokene.