Mika 4 - MUKANDA USANDU WA ZAMBI 1975

¹ Muchikapwa ha matangwa a kusula mulundu wa zuwo lia Yehova makaukolesa ngwe mulundu uze Wahiana kusuha. Makalinangamisa helu lia mindundena mba mavungu mazombokelamo.

² Mavungu anji meza nikwamba ngwo, Tatuyenu, tukandukenu ku mulundu wa Yehova, ku zuwo lia Zambi ya Yakomba; atulongese ndako jenyi, tukendele mu majila jenyi; mumu mu Zaione mukukatuhukila shimbi; liji lia Yehova mulikatuhulcila ku Yerusaleme.

³ Iye kumakapatwila mavungu anji ni kukanjisa mavungu a tachi kusuku; mba kumakalumuna tutana two mu yikungo ya sharua, ni makunga jo makalumuna mu poko ja kululika mitondo. Vungu kulichi kakwata katana kulimika ni vungu likwo. Kechi kalilongesa jita nawa nilimwe tangwa,

⁴ alioze mutu mweswe matwama mushi lia mutondo wenyi wa uva hanji mushi lia mutondo wenyi wa makuyu; niumwe maavwisa woma mumu kanwa lia Yehova-wa-Tujita hilinahanjika.

⁵ Mumu mavungu kakwenda vungu lieswe mu jina lia zambi yalio, alioze yetu mutwenda mu jina lia Yehova Zambi yetu ku miaka yeswe ya mutolo.

⁶ Yehova kanambe ngwenyi, Ha tangwa lize mungukakungulula yilema; mungukakonga waze aahumine ni waze nayindamishine.

⁷ Yilema mungukaapwisa masalila, ni waze aambilile mungukaapwisa vungu lia tachi mba Yehova makapwa mwanangana wo mu mulundu wa Zaione chize ku mwakono ndo ku miaka yeswe.

⁸ Mba kuli yena kaposhi wa mbunga ya mapanga kanda mulundu wa mwana-pwo Zaione, kuli yena muchikeza, chiyulo cha ku shakulu muchikeza; wanangana wa mwana-pwo Yerusaleme.

⁹ Haliapwila kuchi te wakuteta ni liji linene? Mwanangana wakuhi hakachi kenu? Misongo hiyakukwata ngwe mukwa kufumbajala mumu mukwa kukwaha mana hanafu nyi?

¹⁰ Mwana-pwo Zaione, pinda ni mikuma ngwe mukwa kufumbajala, mumu haliapwila mukatuka ku chihunda ukatwame mu yambu, kumuoya ku Babilonia. Kwenako makakupulwila; kwenako Yehova makakukulila ku tachi ja akwa kole je.

¹¹ Haliapwila mavungu anji hanakukungulukila ngwo, Akamujilule! Meso jetu atale Zaione—ne.

¹² Alioze kanyingikine manyonga ja Yehova. Chize Yehova hanalulika kuchaalumbunukine, iye hanaakungika ngwe yichita ku chizungwilo.

¹³ Mwana-pwo Zaione, katuka uzungule! Mumu mungupwisa mbinga ye ya utale, ni sende je ja unengu ukapalwole mavungu anji. Kumukatumbikila kufumbuka cho kuli Yehova; upite wo mukauhana kuli Mwene wa hashi heswe.