Mika 3 - MUKANDA USANDU WA ZAMBI 1975

¹ Yingwamba ngwami, Ivwenu, enu akwa lutwe mu Yakomba, akwa kuyula mu munyachi wa Izalele! Te kuchanutambile kunyingika upatwilo wa kulita?

² Enu, chipema chanupihila; nwakuzanga chipi. Nwakuzununa kowa lia atu jami, ni musunya ha yifwaha yo.

³ Enu nwakulia musunya wa atu jami, ni kwazununa makowa, ni kumakwona yifwaha yo, nikwatetateta ngwe yifwo mu ndeho; ngwe musunya mu lundeho.

⁴ Mba kumakateta kuli Yehova alioze aye kechi kaakumbulula. Kumakaaswekela meso jenyi ha mwaka uze mumu yitanga yize halinga yipi.

⁵ Ha kutwala kuli aprofeta aze akupiangula atu jami, waze akwamba ngwo, Sambukila, muze maaha yuma ya kulia, alioze masa jita ni yoze kasele chuma mu makanwa jo, Yehova kanambe ngwenyi,

⁶ Kashika kumukukapwa kuli yenu ufuku kuushi usolwelo; milima kuli yenu, ni kutaha chakuhi. Tangwa mulikanjila hali aprofeta; tangwa lize mulikapwa lilá hali ayo;

⁷ akwa munanyi makasauka; tahi mevwa sonyi; eswe makafuka ku mivumbo yo mumu kumbululo liakuhi lia kuli Zambi.

⁸ Alioze ha kutwala kuli yami hananguzalisa ni tachi, ni Spiritu wa Yehova, ni ululi, ni ndundo, ngukalumbunwine Yakomba uvulumunyi wenyi ni kuli Izalele shili yenyi.

⁹ Panjikenu, enu akwa lutwe mu munyachi wa Yakomba, ni akwa kuyula mu munyachi wa Izalele. Enu upatwilo wa kulita wanupihila, nwakuhengesa ululi weswe.

¹⁰ Nwakutungisa Zaione ni manyinga, nwakutungisa Yerusaleme ni uhenge.

¹¹ Akwa lutwe jako kakupatula ha chindo; asasendote jako kakulongesa ha fweto; aprofeta jako kakutaha ha mbongo; hindu kakujamina hali Yehova nikwamba ngwo, Yehova hwali hakachi ketu; nichimwe chipi muchikatuwana.

¹² Kashika ha mukunda wa yenu Zaione muyikapwa ngwe munda wa kuchipa; Yerusaleme muyikalumuka mulumba wa yipuzupuzu ni mulundu wa lie zuwo muukapwa mulundu wa usaki.