Mika 2 - MUKANDA USANDU WA ZAMBI 1975

¹ Lamba kuli waze akutaka ungulungulu, nikunyonga yipi ha mihela yo! Mu kucha mayilinga mumu machihasa ni tachi jo.

² Kakuvwila kuzo ya minda, mba mayitambula. Kakuvwila kuzo ya mazuwo, mba maachiza. Kakupinjisa mutu ni zuwo lienyi, ni mutu ni chihinga chenyi.

³ Kashika Yehova kanambe ngwenyi, Ha kutwala ku munyachi uno ngunanunyongena chuma chikalu; kunuchi kahasa kutusulako makota jenu. Kunuchi kenda nawa nikulizelula mumu muchikapwa mwaka upi.

⁴ Ha tangwa lize makanwimbila mwaso wa kuchoka makalila mbimbi ni liji lisasu. Makamba ngwo, Hanatulumbula liakulu. Hanalumuna chihinga cha atu jami. Kanachichiza kuli yami Chichize! Kanapangila minda yetu hakachi ka akwa kutukwata.

⁵ Kashika kuchi kapwa ni mutu yoze manufunjikila chihinga cha kukupwila mu chikungulwila cha Yehova.

⁶ Kakwamba ngwo, Kanda nwambulula! Kuchatambile kwambulula yino yuma; mumu kusauka kuchichi katuwana.

⁷ Enu munyachi wa Yakomba, te chinawaha kuhanjika chocho? Te Spiritu ya Yehova kakulipupula? Yitanga yino te niyenyi? Te maliji jami kalingile chipema kuli yoze menda ni kululama?

⁸ Alioze yenu nwakukatukila atu jami ngwe akwa kole; nwakuzula hina lia ngungu kuli mukwa sambukila ni kuli waze kanapalika nikunufuliela, kanyongene jita.

⁹ Mapwo ja atu jami nwakwahuma ku mazuwo jo apema. Nwakuchiza uhenya wami kuli ana jo akepe ndo ku miaka yeswe.

¹⁰ Katukenu, yénu, hi kuno ko munuhasa kuhwimina ha mukunda wa luchisa umwe wa kwonwona ni kwonwonachipi.

¹¹ Nyi mutu mendangana nikwambulula fuji ni mahuza ngwenyi, Mungunulumbunwina yuma ya vinyu ni kunwa chisasu kachi mwenawo mapwa Chilumbununyi wa wano atu!

¹² Enu A-Yakomba, pundu mungukanukunga eswe; mungukakunga masalila ja Izalele. Mungwasela hamuwika ngwe mapanga mu limba; ngwe mbunga ya mapanga ku ulilo wo; mbunga ya malunga ni chimbangwinya.

¹³ Mukwa kulokola kumakaatetekela; o makalokola, makanjila ku chikolo nikutuhukilako. Mwanangana wo makaatetekela; Yehova kulutwe lio.